Read Paite Chin 1 SAMUEL 2 Bible Online

1 SAMUEL 2 - Paite Chin bible

1 SAMUEL 2

¹Huan, Hannah a thum a hichi in a chi hi: “Ka lungtang TOUPA tung ah a kipak mahmah, ka ki TOUPA ah pahtawi in a om. Ka melmate tung ah ka kam letsak in a om a, na hotdamna a ka kipah mahmah ziak in.

²“TOUPA bang a siangthou a omkei uh. Nang bang mahmah lah a om ngalkei uh. I Pathian bang suangpi himhim leng a omsam kei.

³Huchi tel a kisathei in thu gennawn kei unla; na kam ua pan pau uang himhim pawt kei hen. TOUPA lah pilna Pathian ahi ngal a, aman thilhihte hoihtak in a bukzel hi.

⁴Mi hat thalpeute a kitansak a, a kisuite taihatna a gak in a om hi.

⁵Niang leh tai a omte nekding zong in a lohtawm ua, gilkialte kial nawnlou uhi. A chingnu’n ta sagih a neita a, ta tampi neinu a bahta hi.

⁶TOUPA’N a that a, a hingsak hi. Han ah a paisuk sak a, a pikhe tou hi.

⁷TOUPA’N a zawngsaka, a hausa sak a, a hihniam a, a hihsang hi.

⁸Leivui apan a zawngte ading tousak a, ekvu apan khutdohte a dom tou hi. Mi liante kiang a a omsak theih a, thupina mangtutphah a tan theihna ding un. Lei kingaknate TOUPA a ahi a, aman khovel lah a tung uah a ngata ngal a.

⁹“A misiangthoute khe a kem dia, migiloute bel miallak ah daihsak in a om ding uh. Hatna a kuamah in zoulou ding ahi ngal a.

¹⁰TOUPA melmate a kitam gawp ding ua, van apan vanpiging bang in amaute a dou ding. TOUPA’N kawlmong pha in vai a hawm dia; a kumpipa kiang ah hatna a pedia, a thaunilhpa ki a pahtawi ding” a chi hi.

¹¹Huchi in Elkanah bel Ramah ah a inn ah a paita hi. Huchi in naupang in siampu Eli ma ah Toupa na a semta hi.

¹²Eli tapate Belial tate ahi ua; TOUPA a theikei uh.

¹³Mite lak a siampute hihdan ngeina ahihleh min kithoihna a honglat chiang un, sahuan laitak in siampu sikha sa thukna sikkhut zum thum nei tawi in a hongpai zel hi.

¹⁴Belgong za hiam, belgong nei hiam, belkhaina nei hiam, bel hiam sung a sunsuka, huai sa thukna zum in a hon thukkhiak tengteng siampu in a lazel hi. Huchibang in Israel mi huai a hongpai tengteng apan Shiloh khua ah a na hihsak zel uhi.

¹⁵A thau a khul ma un siampu sikha a hongpai a, kithoihmi kiang ah, “siampu ading haimin ding sa honpia in. Na sa huan a deihkei, a sial a deih hi” a chi hi.

¹⁶Min a kiang ah, “A thau pen khul phot uhenla, huaikhit chiang in na hinna in a deih zahzah na la ding” a na chih chiang un aman, “Hilou e, tu mah a n’on piakpah ding ahi. N’on piak kei leh thagum in ka la ding” a chi hi.

¹⁷Huchi in tangvalte khelhna TOUPA mitmuh in a thupi mahmah a, mite’n lah TOUPA kiang a kithoihna lat thilkihhuai in a ngaita uhi.

¹⁸Himahleh Samuel in bel naupang mahleh, puanmalngat siampu puanak silh in TOUPA ma ah na a sem hi.

¹⁹Huailou leng a nun puanaktual neu a khui sak a, kumteng kithoihna uh lan dia a pasal toh a hoh chiang un kumteng in a tawisak zel hi.

²⁰Eli in Elkanah leh a zi a vualzawl a, “TOUPA adia na thillat uh mun luah ding numei suan TOUPA’N honpia hen” a chi hi. Huchi in a in uah a paita uhi.

²¹TOUPA’N Hannah a veh a, nau a pai a, tapa thum leh tanu nih a nei hi. Naupang Samuel TOUPA ma ah a hong khang lianta hi.

²²Eli bel a tek mahmahta hi. Israel mi tengteng tung a a tate thilhih tengteng leh Kihoupihna Puanin kongkhak bul a nasem numeite a na luppih zel thute uh a za hi.

²³Huchi in a kiang uah, “Bangdia hichibang thilhih na mai ua? Hiai mi tengteng apan na thilhih dan hoihloute uh ka naza ngal a.

²⁴Hichi di hilou ahi, Ka tate aw, na tanchin uh ka zak a hoihlou lam ngen ahi. TOUPA mite na taleksak uhi.

²⁵Mi khat, midang tung a a khelh leh Pathian in vai a hawmsak ding hi. Himahleh TOUPA tung a mi a khelh leh kuan amah adin a ngetsak dia?” a chi hi. Huchi pipi in leng a pa uh aw a ngaikhe kei ua, TOUPA’N amaute a thah ding ziak in.

²⁶Naupang Samuel a khang lian deuhdeuh a; Pathian leh mihing deihsak in a om hi.

²⁷Eli kiang ah Pathian mi khat a hong a, a kiang ah, “TOUPA’N hichi in a chi. ‘Aigupta gam a Pharo inn a na omlai un na pa inkawte kiang ah ka kilak kei maw?

²⁸Israel nam tengteng lak apan ka siampu hi ding, ka maitam a thillan ding, gimlim hal ding leh siampu puanak silh dia amah ka tel ahi kei maw? Na pa inkawte kiang ah Israel mite haltum thillat teng ka pia ahi kei maw?

²⁹Bangziak in ahia ka tenna a na lat ding ua ka thupiak ka kiang a kithoihna leh kei a tuam dia thillat pen lei toh sikden a, kei sang a na tate na zahtak zawk a, noumau na kisukthauna dia ka mi Israelte kithoihna a hoih pente na zat uh?’

³⁰Huaiziak in TOUPA Israelte Pathian in, ‘Ken zaw na inkawte leh na pa inkawte tangtawn in ka ma ah na om ding uh,’ ka na chi ngei hi. Himahleh tuin TOUPA’N, ‘Na om hetkei ding uh. Hon zahtak peuhmah ka zahtak dia, hon musit peuhmah ka musit ding,’ a chi hi.

³¹Ngai in, ‘na bante leh na pa inkawte bante ka tankhiat ni a hongtung, na inn ah tekkun a dam a omkei ding uh.

³²Ka tenna inn ah, Pathian in Israel hauhsakna a piak teng ah melma na mu dia, tangtawn in na inn ah tekkun a dam a omkei ding uh.

³³Ka maitam apan ka hihman louh ding na mi pen na mit hihkhamtu leh na lungsim lungkham saktu ahi ding. Na inn a hongpiang peuhmah a dawnsih zel ding uhi.

³⁴Hiai, na tapate nih Hophni leh Phinehas tung a thiltung ding nang adin chiamtehna ahi ding. Ni khat in a nih un a si tuaktuak ding uhi.

³⁵Kei adin siampu muanhuai ka ding khesak dia, huai in ka lungtang leh ka lungsim toh kituak in na a sem ding. Inkuan kiptak in ka lamsak dia, tangtawn in ka thaunilhmi ma ah a om ding.

³⁶Hichi ahi ding a, na inn a omlai tengteng dangka leh tanghou ngen in a kiang ah a kuan ding ua, tanghou tawmchik bek nekding ka muh theihna ding un siampu na khat bek hon semsak ve aw, chi’n k’ong thum hi, a chi ding uh’ ” a chi hi.