Read Paite Chin 1 SAMUEL 22 Bible Online

1 SAMUEL 22 - Paite Chin bible

1 SAMUEL 22

¹Huchi in David bel huai apan a pawtkhia a, Adullam kawkhuk ah a omta hi. A unaute leh a pate inkawte tengteng in a zak un huai ah a kiang ah a hohsuk uh.

²Lungkham peuhmah, leiba nei peuhmah leh lungkimlou peuhmahte a kiang ah a ki kaikhawm uh. Huchi in, a heutu un a omta hi. A kiang ah mi za li hiam tak a om uhi.

³David bel huai apan Moab gam a Mizpah ah a hoh hi. Moab kumpipa kiang ah, “Pathian in a hon hihsak ding thil ka theih masiah ka nu leh ka pate na kiang ah na om le uh” a chi hi.

⁴Moab kumpipa ma ah amau a pi a; huchi in kawkhuk a David a omlai teng a kiang ah a om uhi.

⁵Zawlnei Gad in David kiang ah, “Kawkhuk ah om nilouh ken. Pawt inla Judah gam ah pai in” a chi hi. Huchi in David a pawt a, Hareth gammang ah a lutta hi.

⁶Saul in “David leh a kiang a omte a muta uh” chih a naza hi. Saul bel Gibeah a Ramah khua a tamarisk sing nuai ah teipi tawi in a tu hi. A kim ah a sikha tengteng ading uhi.

⁷Saul in a kim ading a sikhate kiang ah, “Nou Benjamin mite aw, ngaikhia un; Jesse tapa in loute leh grephuante honpia in a sepaih sang heutu leh a sepaih za heutu in a honbawl dia hia?

⁸Na vek un n’on sawm ua, ka tapa in Jesse tapa kiang a thu a khun ka kiang a hihlang himhim na omkei uh. Ka tapa in ka sikha kei hondou ding leh tuni nasan a kei hon tang dia a hanthawn thu ka kiang a hihlang na omlouh uh?” a chi hi.

⁹Huchi in Saul sikhate kiang a ding Edom mi Doeg in a dawng a, “Jesse tapa Nob khua a Ahitub tapa Ahimelek kiang a, a hong ka mu hi.

¹⁰Aman TOUPA a dotsaka, nek ding a pia a, Philistia mi Goliath namsau leng a pelai hi” a chi hi.

¹¹Huchi in kumpipa’n Ahitub tapa Ahimelek leh Nod khua a siampu a pang a pa inkawte tengteng a samsak hi.

¹²Saul in, “Nang, Ahitub tapa, na ngaikhia in” a chi hi. Aman, “Ka toupa, hiai ah ka om” a chi hi.

¹³Saul in a kiang ah, “Tanghou leh namsau na pia a, TOUPA bang dotsaka, tuni a kei hondou ding leh hontang dia bang ding a nang leh Jesse tapa in hon guksawm na hi ua?” a chi hi.

¹⁴Ahimelek in kumpipa a dawng a, “Kumpipa makpa, na thumang, na inkuan sung ua mi zahtakhuai David bang a muanhuai na sikhate tengteng lak ah kua a om ua?

¹⁵Amah adia Pathian thu ka dotsak a masapen ahi ahia? Ahi kei. Kumpipa’n a sikha hiam, ka pa inkawte kuapeuh hon ngoh mahmah kei hen. Na sikha in hiai thu bangmah ka theikei hi” a chi hi.

¹⁶Kumpipa’n, “Ahimelek, na si ngeingei ding ahi, nang leh na pa inkawte tengteng toh” a chi hi.

¹⁷Kumpipa’n a kiang a ding sepaihte kiang ah, “Kihei unla, TOUPA siampute that un, David lam a apan ua, a taimang chih thei napi a ka kiang a a genlouh ziak un” a chi hi. Himahleh kumpipa sikhate’n TOUPA siampute sual ding in khut a zak nuam kei uhi.

¹⁸Kumpipa’n Doeg kiang ah, “Nang kihei inla, siampute sual in” a chi hi. Edom mi Doeg a kihei a, siampute a sual a, huai ni’n puanmalngat siampu puanak silh, mi sawmgiat leh nga a that hi.

¹⁹Nob, siampu khua namsau in a sual a; numei leh pasal naupang leh nawi nelaite na ngawn, bawngte, sabiltungte leh belamte toh namsau in a satlum hi.

²⁰Ahitub tapa Ahimelek tapate lak a khat, a min Abiathar a tai khia a, David kiang ah a taitung hi.

²¹Abiathar in Saul in TOUPA siampute a thah thu David a hilh hi.

²²David in Abiathar kiang ah, “Edom mi Doeg huai a, a omni mah in Saul a hilh ngeingei ding chih theisa in ka om hi. Na pa inkuan tengteng kei ziak a si ahi uh.

²³Nang ka kiang ah om inla, lau ken. Kei thah hon tumte’n nang leng thah a hontum ding uh. Ka kiang ah om lechin na bit ding hi” a chi hi.