Read Paite Chin 1 SAMUEL 23 Bible Online

1 SAMUEL 23 - Paite Chin bible

1 SAMUEL 23

¹Huan, ngai in, “Philistia mite’n Keilah khua a sual ua, phual a buhte a laksak vek uh” chi in David a hilh uh.

²Huchi in David in, “TOUPA, huai Philistia mite ka vasual diam?” chi in a dong hi. TOUPA’N David kiang ah, “Philistia mite vasual inla, Keilah khua va humbit in” a chi hi.

³David mite’n a kiang ah, “Ngai in Judah gam a om nangawn i lau ua, Keilah khua a hohsuk a Philistia sepaihte vasual lauhuai zawsem nan chia” a chi uhi.

⁴David in TOUPA a dong nawn hi. TOUPA’N a dawng a, a kiang ah, “Thou inla, Keilah khua ah hohsuk in, Philistia mite na khut ah k’on pe ding” a chi hi.

⁵Huchi in David leh a mite Keilah khua ah a hoh ua, Philistia mite a vasual ua, a gante uh a laksak ua, tamtak a that uh. Huchibang in David in Keilah khomite a humbitta hi.

⁶Hichi ahi a, Ahimelek tapa Abiathar Keilah khua a David kiang a, a tailai in siampu puanak tawi in a paisuk hi.

⁷Keilah khua ah David a hoh chih Saul a hilh uh. Saul in, “Pathian in ka khut a amah honpia eive. Kulh kongpi leh a kalhna nei khua ah lah lut in a kikhumta ngal a” a chi hi.

⁸Saul in mi tengteng kidou din Keilah khua va sual a David leh a mite va um din a samkhawm hi.

⁹David in Saul in a tung ah thil hoihlou a sawm chih a na thei hi. Siampu Abiathar kiang ah, siampu puanak honla dihve, a chi hi.

¹⁰Huchi in David in, “Aw TOUPA, Israelte Pathian, Saul kei ziak a khua hihse din Keilah ah hong paisuk a tum, chih kei na sikha in ka za hi.

¹¹Keilah khua a mite’n a khut ah honpe ding uam? Na sikha in ka zak bang in Saul a hong paisuk diam? Aw TOUPA, Israelte Pathian, hehpih in na sikha honhilh in” a chi hi.

¹²TOUPA’N, “A hongsuk ding” a chi hi. Huchi in David in, “Keilah khua mite’n kei leh ka mite Saul khut ah a honpe ding uam?” a chi hi. TOUPA’N, “A honpe ding uh” a chi hi.

¹³Huchi in David leh a mite, guk hiam tak a thou ua Keilah khua apan a pawt ua, a lemna lamlam ah a paita uh. David Keilah khua apan a tai kheta, chih Saul a hilh ua; huchi in kuankhiak a kikhel sakta hi.

¹⁴David gamdai ah, leikawhawm ah a om hi. Ziph gamdai a tanggam ah a om nilouh hi. Saul in niteng in amah a zong a, himahleh Pathian in a khut ah a pekei hi.

¹⁵David in amah thah tum in Saul a hong kisa chih a thei a; huchi in David Ziph gamdai gamlak ah a om hi.

¹⁶Saul tapa Jonathan a thou a, gamnuai ah David kiang ah a hoh a, David khut TOUPA ah a hatsak hi.

¹⁷A kiang ah, “Lau hetken, ka pa Saul khut in a hong zongkhe kei ding, Israelte tung ah kumpi na honghi dia, kei nang hon zompa ka hi ding. Hiai leng ka pa Saul in a thei kilkel hi” a chi hi.

¹⁸A nih un TOUPA ma ah thukhun a bawl ua, David gamnuai ah a om nilouh a, Jonathan bel a inlam ah a paita hi.

¹⁹Huchi in Ziph mite Gibeah ah Saul kiang ah a hohtou ua, David ka kiang uah gamnuai a leikawhawm ah, gamdai simlam sang Hakilah tang ah a na kibu nilouh a kei maw?

²⁰Huaiziak in, aw kumpipa, hong paisuk na ut lamtak ahi bang in hong paisuk inla, kou ka hih ding uh ahihleh kumpipa khut amah honpiak ahi ding, a chi uhi.

²¹Saul in, “TOUPA’N hon vualzawl hen. Noute’n n’on hehpih mahmah uhi.

²²Pai unla, va chian nawnsem unla, a nung vazui unla, a mumi leng va chian hoihnawn sese un. Lepchiah piltak in thil a hihnak chih min a honhilh uhi.

²³Huaiziak in, a bukna mun tengteng thei sipsip unla, ka kiang ah hong nawn ngeingei unla, nou kiang ah keileng ka hong sam ding hi. Hichi ahi ding a, hiai gam a a om peuhmah leh Judah mi sang tampi lak apan ka zongkhe ding” a chi hi.

²⁴Huchi in a thou ua, Saul ma in Ziph ah a hoh uh. Himahleh David leh a mite gamdai simlam Arabah a Maon gamdai ah a om uhi. Huai mun Jashimon simlam a om ahi.

²⁵Saul leh a mite amah zong din a hoh uh. David a hilh ua, huchi in suangpi zuan in a pawtkhia hi. Maon gamdai ah David a delhta hi.

²⁶Saul tang langkhat lampang ah a pai a, David leh a mite bel tang langkhat lampang ah a pai uhi. David Saul lau in kintak in a tai a; Saul leh a mite’n lah David leh a mite mat tum in a um kimvel ngal ua.

²⁷Himahleh Saul kiang ah, “Kinmeng inla, hongpai in, Philistia mite’n i gam uh a hongsual uh” chi’n thangkou a hongtung hi.

²⁸Huchi in Saul in David a delhlai a kiksan hi. Philistia mite sual din a paita hi. Huaiziak in huai mun Sela hammah lekoth a chi uhi.

²⁹David huai a kipan a paitou a, En gedi leikawhawm ah a om hi.