Read Paite Chin 1 SAMUEL 24 Bible Online

1 SAMUEL 24 - Paite Chin bible

1 SAMUEL 24

¹Huan, hichi ahi a, Saul Philistia mite vadelh hong paikik in ngai in, “David En Gedi gamdai ah a om” chih hilh in a om hi.

²Huchi in Saul in Israel mi tengteng lak a telkhiak tuam mi sang thum a pi a, sathakte tenna suangpi lak lam ah David leh a mite zong in a hohta uh.

³Lamkal ah belam huang kawkhuk omna a va tung uh. Saul khawl din a valut hi. David leh a mite kawkhuk sunggil lam ah a om uhi.

⁴David mite’n, a kiang ah, “Ngai dih, TOUPA’N na kiang ah, ngai in, na khut ah na melma k’on pedia, a tung ah hoih na saksak in na hih ding, a chih ni ahita ve” a chi uh. Huchi in David a thou a, simtham tak in Saul puan mong a vatan hi.

⁵Hichi ahi a, a den chiang in Saul puanmong a vatan in David lungsim a sun mahmah hi.

⁶Huchi in a mite kiang ah, TOUPA sathaunilh ahi, chih thei napi a, a tung a khutzang a TOUPA sathau nilh ka toupa tung a hiai thil ka hih louh ding hi a“ a chi hi.

⁷David in huai thu in a mite a khamdai a, Saul sual dia a kuan uh a phalta kei hi. Saul bel kawkhuk apan a pawt a, a pai nawnta hi.

⁸A nung zek in David leng a thou a, kawkhuk apan a pawt a, “Kumpipa, ka toupa” chi in Saul a nungsap hi. Saul nunglam ah a hong kihei a, David in a mai a lei ah a kunsuk hi.

⁹David in Saul kiang ah, “Ngai in, David in na siatna a zong, chi a mite’n na kiang a, a gen uh bangdia gingta na hia?

¹⁰Ngai in, tuni in TOUPA’N kawkhuk ah ka khut ah nang a honpia chih na mit mahmah in na mu hi. Mi khenkhatte’n nang that din a honchi uh. Himahleh ka honhawi hi. Ka toupa tung ah ka khut himhim ka khakei ding, TOUPA sathau nilh ahi ngal a” ka chi hi.

¹¹Huai kia leng hilou in, pa, en in, na puanmong leng ka tawi hi. Na puanmong ka tan theih a, k’on thah louh na ah ka khut ah thil hoihlou leh tatlekna a omkei, chih leh ka hinna laktum in honzong zong lechin leng, na tung ah ka khialkei chih thei in.

¹²TOUPA’N nang leh kei kikal ah vaihawm henla, TOUPA’N na tung ah ka phu hon laksak hen. Himahleh ken zaw na tung ah khut ka kha kei himhim ding.

¹³Nidanglai a paunak in, Migilou apan gitlouhna a pawt zel, a chi hi. Himahleh ken bel na tung ah khut ka kha kei ding.

¹⁴Israel kumpipa kua zong in ahia a hongpawt khiak? Kua ahia na delh? Ui sisa, uihik lel.

¹⁵Huaiziak in, TOUPA vaihawmpa hi henla, nang toh kei kikal ah vaihawm hen, honmu in hon genpih henla, na khut apan hon hunkhia hen” a chi hi.

¹⁶Hichi ahi a, David in Saul kiang a hiai thute a gen khit in, Saul in, “Hiai ka tapa David aw hilou a maw?” a chi hi. Huchi in aw suah in Saul a kapta hi.

¹⁷David kiang ah, “Kei sang in na diktat zaw, nang zaw ka tung ah thil hoih na hih a, ken bel thil hoihlou ka hih hi.

¹⁸Tuni in ka tung a thil hoih na hih dan na hihlang a, TOUPA’N na khut a kei a honpiak a leng n’on thah louhna ah.

¹⁹Min a melma muta leh bangmahlou in a khahmawk diam? Huaiziak in, tuni a ka tung a na thilhih ah TOUPA’N thil hoih in nang honthuk hen.

²⁰Ngai in, kumpipa na hong hingei dia, Israel gam na khut a hihkip in a om ding chih ka theita hi.

²¹Huaiziak in, ka nung a ka suan hongom dingte hihmanglou ding in TOUPA min in ka kiang ah kichiam inla, ka pa inkawte apan ka min thaimang ken” a chi hi.

²²Huchi in Saul kiang ah David a kichiam hi. Huchi in Saul inn ah a pai a, David leh a mite leikawhawm ah a paitou uhi.