Read Paite Chin 1 SAMUEL 26 Bible Online

1 SAMUEL 26 - Paite Chin bible

1 SAMUEL 26

¹Huan, Ziphte Gibeah ah Saul kiang ah a hoh ua, “David gamdai chin a Hakilah tang ah a kibu kei maw?” chi in a vagen uhi.

²Huchi in Saul a thou a, Ziph gamdai ah Israel mite lak apan tel khiak mi sang thum pi in Ziph gamdai ah David zong din a hoh sukta uh.

³Saul in gamdai chin, lamkal ah Hakilah tang ah panmun a khoh a, David gamdai ah a omlai hi. Saul amah zong in gamdai ah a hong chih a thei hi.

⁴Huaiziak in, David in enkhemite a sawl a, Saul a hong taktak chih a thei telta hi.

⁵David a thou a, Saul panmun khohna ah a hoh hi. David in Saul leh a sepaih heutu, Ner tapa Abner lupna a mu hi. Saul kangtalai um sung ah a lum a, a kim ah mite’n om mun a bawl uhi.

⁶David in Hit mi Abimelek leh Joab unau Zeruiah tapa Abisai kiang ah, “Saul panmun ah kua ahia ka kiang a hongding?” chi’n a gen hi. Abisai in, “Kei na kiang ah ka hongsuk sam ding” a chi hi.

⁷Huchi in David leh Abisai mipite omna ah zan in a va hoh uhi. Ngai in, Saul bel kangtalai um sung ah lum in a ihmu hi. A lu lam ah a teipi lei ah a siat tal a, Abner leh mite bel a kim ah lum in a ihmu uhi.

⁸Abisai in David kiang ah, “Tuni in Pathian in na melma na khut a honpia eive. Huaiziak in, teipi in khatvei in lei ah k’on sunden suk ding aw? Ka sun tuan nawn kei ding” a chi hi.

⁹Himahleh David in Abisai kiang ah, “Hih mangthang ken, TOUPA thaunilh tung a khut kha a mawhlou kua a om thei a?” a chi hi.

¹⁰David mah in, “TOUPA hinna lou in ka gen hi. TOUPA’N a tung ah khut kha na ve. Ahihkeileh leng a sih ni a hongtung na ding. Ahihkeileh leng, kidouna ah a hoh dia, a mangthang mai ding.

¹¹TOUPA thaunilh tung ah khut ka kha hetkei ding. A lu kiang chin a teipi leh tuithawl ahihleh la inla, pai ni” a chi hi.

¹²Huchi in David in Saul lu kiang chin a teipi leh tuithawl a la a, a pai nawnta uh. Kuamah in a mu kei ua, kuamah in phawkin a khanglou sam kei. TOUPA’N nuamtak a a ihmut sak ziak in avek un nakpi’n a ihmu uhi.

¹³Huchi in David galkhat lam ah a hoh a, gamla kuam ah mualvum ah ading a; a kikal uh gamlapi ahi.

¹⁴David in mipite leh Ner tapa Abner zak in a kikou a, “Abner, n’on dawng kei dia hia?” chi in a sam hi. Huchi in Abner in a dawng a, “Kumpipa sam nang kua na hia?” a chi hi.

¹⁵David in Abner kiang ah, “Mi hangsan na hi kei maw? Israelte lak ah nang bang kua a om a? Bangchidan ahia kumpipa, na toupa na ven louh? Kumpipa, na pu hihmang din kuahiam khat a hongpai hi.

¹⁶Na thilhih dan a hoihkei. TOUPA hinna lou in ka gen hi. TOUPA thaunilh toupa na ven hoihlouh ziak in si dia kilawm na hi. Kumpipa lu chin a teipi leh tuithawl om koi a om ahita a? En him dih” a chi hi.

¹⁷Saul in David aw a thei a, “Tua nang aw hia, ka tapa David?” a chi hi. David in, “He, toupa, kumpipa aw, ka aw ahi” a chi hi.

¹⁸“Bangziak in ahia ka toupa in a sikha a delh? Bang thil ka hih a ahia? A khut ah thil gilou bang ahia om?

¹⁹Huaiziak in, toupa, ka kumpipa’n a sikha thu ngaikhia hen. Kei dou dia na lungtang tokthoupa TOUPA ahihleh thillat pom teitei hen. Mihing tate a hih uleh TOUPA ah hamsia thuak in om uhen. Pai inla, pathian dangte na sem in, chi a TOUPA gou ka luah theihlouhna dia tuni a hon delhmang lah ahi ngal ua.

²⁰Huaiziak in, ka sisan TOUPA muh phaklouh in lei ah luang kei hen. Vengkeng gem dia tang a mi a gamvak bang un Israel kumpipa uihik leltak zong dia paikhia eive” a chi hi.

²¹Saul in, “Ka na khialta hi. Ka tapa David, hongpai nawn in. Tuni a na mitmuh a ka hinna a manphat mahmah ziak in bangmah himhim ka hihta kei ding hi. Ngai in, thil haihuai mahmah ka na hihta a, ka nak khelh mahmah hi” a chi hi.

²²David in a dawng a, “toupa aw, teipi en dih, tangval khat hong henla, hongla hen.

²³TOUPA’N michih a diktat man uleh a muanhuai man uh a pe ding. Tuni’n TOUPA’N ka khut ah nang a honpe na a, TOUPA thaunilh tung ah ka khut ka lik nuam kei a ahi.

²⁴Ngai in, tuni a na hinna k’on mantam sak mahmah bang in TOUPA’N ka hinna hon mantam sak henla, mangbatna tengteng apan hon hunkhia hen” a chi hi.

²⁵Huchi in Saul in David kiang ah, “Ka tapa David, vualzawl in om in. Thilhihthei tak in na om dia, na zouzel ding” a chi hi. Huchi in David a pai a, Saul leng a mun ah a pai nawnta hi.