Read Paite Chin 1 SAMUEL 27 Bible Online

1 SAMUEL 27 - Paite Chin bible

1 SAMUEL 27

¹Huan, David in a lungsim in, “Chikchiang hiam a zaw Saul khut a mangthang khongkhong ding kei ve. Philistia mite gam a taimang sang a hoih zaw omlou ding ahi. Huchi in Saul in Israel gam a hon zonna a lungdong dia, huchi in a khut apan ka suakta ding” a chi hi.

²David a thou a, amah leh a kiang a mi za guk omte Maok tapa Gath kumpipa Akish kiang ah a paita uhi.

³David leh a mite, michih a inkuan kuan un, David zi nihte, Jezreel mi Ahinoam leh Nabal zi Karmel mi Abigail te toh Gath khua ah Akish kiang ah a tengta uhi.

⁴David Gath khua ah a tai chih Saul a hilh ua, huchi in a zong nawnta kei hi.

⁵David in Akish kiang ah, “Hon hehpih inla, na gam a khua khat ah tenna ding mun hon pesam inla, huai ah ka teng ding uh. Na sikha bang ding in kumpipa khua ah na kiang ah a om nilouh dia?” a chi hi.

⁶Huchi in Akish in huai ni’n Ziklag khua a peta hi. Huaiziak in, Ziklag tunitan in Judah gam kumpipate a ahi nilouh hi.

⁷Philistia gam a David a omsung kum khat pumpi leh kha li ahi.

⁸David leh a mite a vahoh tou ua, Geshur mite, Girzi mite leh Amalek mite a vadou uhi. Huai namte Telam apan Shur gam lampang Aigupta gam pha a om ahi uh.

⁹David in gam a sual a, numei leh pasal hawi himhim a neikei. Belamte, bawngte, sabiltungte, sangawngsaute leh a puansilhte uh a laksak hi. A pai nawn a, Akish kiang ah a hoh hi.

¹⁰Akish in, “Tuni’n koilam na dou a?” a chi hi. David in, “Judah sim gam, Jerahmeelte sim gam leh Kente sim gam” a chi hi.

¹¹“Philistia gam a a omsung mawngmawng in ‘David in hichibang in a hihzel,’ ” a chi kha ding ua, chi in numei pasal Gath khua a pi ding hawi himhim a neikei hi.

¹²Akish in David thugen a taksang a, “A mi Israelte a kimudah sak mahmah ziak in, tangtawn in ka sikha din a om ding” a chi hi.