Read Paite Chin 1 SAMUEL 28 Bible Online

1 SAMUEL 28 - Paite Chin bible

1 SAMUEL 28

¹Huan, hichi ahi a, huailai in Philistia mite’n a sepaihte uh Israel mite sual a dou din a kaikhawm uh. Akish in David kiang ah, “Nang leh na mite kei toh galdou dia na hong kuan ngeingei ding uh ahi, chih thei in” a chi hi

²David in Akish kiang ah, “Awle, na sikha in bang a hihthei a chih na thei ding” a chi hi. Akish in David kiang ah, “A hoih ve, kei hon vengpa din k’on bawl den ding” a chi hi.

³Samuel a sita a, Israel mi tengteng in a kah ua, amah khua mah Ramah ah a vui uhi. Saul in dawi aisansiam zawlte leh dawisiamte a gam apan a delhkhe khin hi.

⁴Philistia mite a ki kaikhawm ua, Shunem ah panmun a khoh uh. Saul in Israel mi tengteng a kaikhawm a, Gilboa ah panmun a khoh sam hi.

⁵Saul in Philistia sepaihte a muhtak in a lau a, a lungsim a ling tonton maimah hi.

⁶Saul in TOUPA a dot in leng TOUPA mang hiam, Urim hiam, zawlnei hiam in leng a dawng himhim kei hi.

⁷Saul in a sikhate kiang ah, “Dawi aisansiam zawl numei a kiang a ka hoh a ka dot ding hon zon khiaksak un,” a chi hi. A sikhate’n a kiang ah, “Ngai in, Endor khua a dawi aisansiam numei om eive” a chi uhi.

⁸Saul a kibawl lamdang a, puan dang a silh a, amah leh midang nih a hoh uh. Zan in numei kiang a va tung uhi. Dawi aisanna in ai honsan sak inla, na kiang a, a min ka gen peuhmah hon sapsak in, a chi hi.

⁹Numei in a kiang ah, “Ngai in, Saul thilhih na thei a, a gam a dawi aisansiam leh dawisiamte a hihmang khinta a, bangdia ka sihna dia ka hinna thangkam khum dia kisa na hia?” a chi hi.

¹⁰Saul in “TOUPA minlou in, TOUPA hinna lou in ka gen hi. Hiai thil ziak in na tung ah gawtna a tungkei ding” chi’n a kiang ah a kichiam hi.

¹¹Numei in, “Kua k’on sapkhiaksak dia?” a chi hi. Aman, “Samuel hon sapkhiaksak in” a chi hi.

¹²Numei in Samuel a muh leh ngaihtak in a kikou a, Saul kiang ah, “Bangdia hon zekhem, Saul lah na hi ngal a?” a chi hi.

¹³Kumpipa’n a kiang ah, “Lau ken. Bang a na muh?” a chi hi. Numei in Saul kiang ah, “Lei apan pathiante hong pawtkhia ka mu” a chi hi.

¹⁴A kiang ah, “Bangchi bang ahia?” a chi hi. Aman, “Putekpi a hongpawt a, puanaktual a silh” a chi hi. Saul in Samuel ahi chih a thei a, a mai a leisi in a kun hi.

¹⁵Samuel in Saul kiang ah, “Bangdia hihbuai a honsam khia na hia?” a chi hi. Saul in a dawng a, “Ka lung a zing mahmah a ahi. Philistia mite’n a hondou ua, Pathian in lah a hon lehngatsan a, zawlnei hiam, mang hiam in leng lah a hon dawng himhim kei hi. Huaiziak in, ka hih ding honhilh din ka honsam ahi” a chi hi.

¹⁶Samuel in, “Huchi a TOUPA hon lehngatsan in na melma a hong hita, chih theigige kawm a bangdia thu hon dong?

¹⁷Kei honzang a, a gen bang in TOUPA’N na tung a hih eita ve. TOUPA’N na khut apan gam a honsuta, na invengpa David a peta hi.

¹⁸TOUPA thu na manlouh ziak leh Amalekte tung a a heh mahmah dungzui a na tangtun louh ziak in. Tuin na tung ah hiai thil a hihta hi.

¹⁹Huailou leng, TOUPA’N nang leh Israelte leng Philistia mite khut ah a honpe dia; zingchiang in nang leh na tapate ka kiang ah na hongom ding uh. TOUPA’N Israel sepaihte leng Philistia mite khut ah a pe ding” a chi hi.

²⁰Huchi in Samuel thugen ziak in Saul a lau mahmah a, lei ah a puk vialvual maimah hi. Tha leh zung himhim a neikei a, nitum leh zankhua a an ne lou ahi ngal a.

²¹Numeinu Saul kiang ah a hoh a, a dah mahmah chih a thei hi. A kiang ah, “Ngai in, na sikhanu in na gen ka taksang a, sih leh sih ka kiang a na thugente ka zui hi.

²²Huaiziak in, nang leng na sikhanu thu taksang sam in. An tawmchik bek ka honlui dia, huchi in na pai chiang a hatna na neih theihna din ne in” a chi hi.

²³Himahleh a utkei a, “Ka nekei ding” a chi hi. Himahleh a sikhate’n numei toh a sawl teitei ua; a thu uh a mangta hi. Lei apan a thou a, lupna ah a tuta hi.

²⁴Numei in bawngnou vakthau a inn ah a nei a, a gouzok a; tangbuang a la a, a mek a, silngou sohlouh tanghou a bawl hi.

²⁵Saul leh a sikhate ma ah a lui a, a na neta uh. Huchi in a thou ua, huai zan in a paita uhi.