Read Paite Chin 1 SAMUEL 29 Bible Online

1 SAMUEL 29 - Paite Chin bible

1 SAMUEL 29

¹Philistia mite’n a sepaih tengteng uh Aphek ah a kaikhawm vek ua, Israel mite’n Jezreel a tuikhuk kiang ah panmun a khoh uhi.

²Philistia kumpipate a zaza in, a sangsang in a pai ua, David leh a mite’n Akish toh a nung uh a zui uhi.

³Philistia Kumpipate’n, “Hiai Hebrute’n bang ahia a hih uh?” a chi uh. Akish in Philistia kumpipa kiang ah, “Hiai David Israelte kumpipa Saul sikha, hichi tan a ka kiang a omkhin a, ka kiang a, a honglut nung a lah tu tan a leng a diklouhna ka muhlouhna pa ahi kei maw?” a chi hi.

⁴Himahleh Philistia kumpipate a tung ah a heh uhi. Philistia kumpipa’n a kiang ah, “Hiai mi na mun sehsak a pai din kiksak inla, kidouna ah i kiang uah hongsuk kei heh. Huchilou in zaw kidouna ah i melmate lam ah a pangkha ding. Hiai mite lu din hiai mipa leh a pu kilem nawn ve un teh aw?

⁵Hiai David mah ahi kei maw, Saul in asang asang a that, David in asing asing, chi a, a tungtang thu la a sak uh?” a chi uhi.

⁶Huchi in Akish in David a sam a, a kiang ah, “TOUPA hinna lou in ka gen ahi. Mi dik mahmah na hi a, sepaihte lak a ka kiang a na kuan leh na hong leltak ka mitmuh in a hoih mahmah hi. Ka kiang a na hong ni apan tunitan in na tung ah bangmah hoihlouhna himhim ka mu hetkei hi. Himahleh Kumpipate’n a hon ngaikei uhi.

⁷Huaiziak in, Philistia kumpipate na hih lungkimlouh louhna din kik inla, lungkimtakin pai in” a chi hi.

⁸David in Akish kiang ah, “Ahihleh, bang thil ahia ka na hih? Na kiang a ka omsung teng in tunitan in, ka toupa kumpipa melma dou lou a ka kiknawn maimah ding, na sikha tung ah bang mu na hia oi?” a chi hi.

⁹Akish in a dawng a, “David kiang ah, Ka mitmuh in Pathian angel bang in na hoih chih ka thei hi. Himahleh Philistia Kumpipate’n, Kidouna ah i kiang ah a hongsam kei ding, a chi bikbek mawk uhi.

¹⁰Huaiziak in, na kiang a om na pu sikhate toh zingkhang in thou unla, zingkhang a na thohphet ua khua a vak chiang in pai un” a chi hi.

¹¹Huchi in David leh a mite Philistia gam a kiknawn din zingsang a pawtkhe ding in a thouta uh. Philistia mite Jezreel ah a hohtou uhi.