Read Paite Chin 1 SAMUEL 31 Bible Online

1 SAMUEL 31 - Paite Chin bible

1 SAMUEL 31

¹Huan, Philistia mite’n Israelte a sual ua; Israelte Philistia mite apan a taikek ua, Gilboa tang ah thah in a om zelzul uhi.

²Philistia mite’n Saul leh a tapa a delhzui vengveng uh. Philistia mite’n Saul tapate: Jonathan, Abinadab leh Melkishua a that uhi.

³Saul a naksual mahmah ua, thalkap mite’n a kap khat a ua, thal kapmite’n nasatakin a kapliam uhi.

⁴Huchi in Saul in a galvan tawipa kiang ah, “Na namsau dok inla, honsun pailet in. Huchilou in zaw hiai zeksumlouhte a hongpai ding ua, a hong sun pailet ding ua, a hon bawlse kha ding uh” a chi hi. Himahleh a galvan tawipan a hih utkei; a lau mahmah ngal a. huaiziak in, Saul in a namsau a la a, a boh khumta hi.

⁵A galvan tawipan Saul a si chih a theih in aman leng a namsau a boh khum samta a, a sikhawmta uh.

⁶Huchi in Saul, a tapa thumte, a galvan tawipa leh a mi tengteng huai ni mah in a sikhawm vek uhi.

⁷Guam galkhat lam a Israel mi omte leh Jordan gal a omte’n Israel mite a taikek uh, chih leh Saul leh a tapate a si uh chih a theih un khuate a pawt khiaksan ua, a taimangta uhi. Huchi in Philistia mite’n a va luahta uhi.

⁸Hichi ahi a, a zingsang in Philistiate a galthahte uh puansilh suahsak dia a vapai uleh Saul leh a tapate thum Gilboa tang a si a va mu uhi.

⁹A lu a tan ua, a galvan a suahkhiak sak ua, mite kiang leh a milim pathiante inn a suah din a kim ua Philistia mite gam teng ah a khak uhi.

¹⁰A galvan Ashtaroth inn ah a koih ua; a luang Bethsan kulhbang ah a tak uhi.

¹¹Jabesh-Gilead a omte’n Philistia mite’n Saul a bawldan thu a na zak un,

¹²Mi hangsan tengteng a thou ua, zankhua in a pai ua, Saul luang leh a tapate luang Bethshan kulhbang apan a la uh. Jabesh a tung ua, huai ah a hal uhi.

¹³A guhte a la ua, Jabesh a sing nuai ah a vui ua, ni sagih sung an a ngawl uhi.