Read Paite Chin 1 SAMUEL 4 Bible Online

1 SAMUEL 4 - Paite Chin bible

1 SAMUEL 4

¹Huan, Samuel thu Israel mi tengteng lak ah a thangkheta hi. Israel mite Philistia mite dou din a kuan khia uh. Ebenezer kiang ah panmun a khoh ua, Philistia mite’n Aphek ah panmun a khoh uhi.

²Philistia mite Israel mite na dal din a na kiphalh uh. A hong kidou uleh Philistia mite ma ah Israel mite a zahlakta ua, kidouna mun ah sepaih sang li vel a that uhi.

³Mipite a giahmun ua a vapai uleh Israel upate’n, “Bangziak in ahia tuni a Toupa’n Philistia mite ma a hon zahlaksak mahmah? I kiang ua om a i melmate khut apan hon hondam din Shiloh apan TOUPA thukhun bawm i va la ding uh” a chi uhi.

⁴Huchi in mipite’n Shiloh ah mi a sawl ua, huai apan Cherubim tung a tu, sepaihte TOUPA thukhun bawm a vala ua; huai ah Pathian thukhun bawm toh Eli tapate nih Hophni leh Phinehas a om uhi.

⁵Huchi in TOUPA thukhun bawm a giahmun uh a hongtun in, Israel mi tengteng ngaihtak in a kikou zuazua ua, lei nangawn a thawn ging zuazua hi.

⁶Philistia mite’n a kikou husa uh a zak un, “Hebrute giahmuna kikou husa gingta zuazua mai bang chihna ahia leh?” a chi uh. A giahmun uah TOUPA thukhun bawm a hongtung ahi, chih a theita uhi.

⁷Philistia mite’n a lau ua, “Giahmun ah Pathian a hong hi” a chih ziak un. “I tung a gik hi! Tuma lam in huchibang a om ngei ngal kei a, a chi uhi.

⁸I tung a gik hi! Huai Pathiante khut hattak apan kua in ahia hon hondam ding? Huai Pathiante ahi, Aigupta mite gamdai a hipi chiteng a that hi.

⁹Aw, nou Philistia mite aw, nou sikha ua a om bang ua nou Hebrute sikha a na omlouhna ding un hattak in om unla, ki pasal sakun. Ki pasal sakunla sual un” a chi uhi.

¹⁰Huchi in Philistia mite’n a sual ua, Israel mite a zahlak sak ua, michih a puanin lam chiat uah a taikek uhi. A nakthah mahmah ua, Israelte sepaih sing thum a si uhi.

¹¹Pathian bawm a laksak ua, Eli tapa nih, Hophni leh Phinehas leng a that uhi.

¹²Sepaih lak a Benjamin suan, mi khat a tai a, a puankhawng kikek nengnungin leh a lu a leikai niaunuau in huai ni mahmah in Shiloh a va tung hi.

¹³A hongtun in, ngai in, Eli in lampi gei a tutna a tukawm in a na en nilouh a, Pathian bawm ziak in a lungtang a ling ngal a. Min khua a tun a tanchin a gen leh a khaw miteng a kapkhia uhi.

¹⁴Eli in a kikou husa uh a zak in, “Tua thawm ging vengvung bang chihna ahia?” a chi hi. Mi khat kintak in a va hoh a, Eli a va hilh hi.

¹⁵Eli bel kum sawmkua leh giat a upa ahi a, a mit a mialta a, khua a mu thei nawn kei.

¹⁶Huai mi’n Eli kiang ah, “Sepaih lak apan hong paikhia ka hi. Tuni a sepaih lak apan hong taikhia ka hi” a chi hi. Aman, “Ka tapa, bangchibang in thil a om a oi?” a chi hi.

¹⁷Tanchin hontun pa’n a dawng a, “Israel mite Philistia mite ma ah a taikek ua, mipi lak ah kithahna thupitak a omlai a, na tapate nih Hophni leh Phinehas leng a si uh, Pathian bawm leng a lak sakta uhi” a chi hi.

¹⁸Hichi ahi a, Pathian bawm thu a gentakin kongpi bul a tutphah apan a thalpuk a, a ngawng a kitan a, a sita hi. Amah tekta a kikhouh zou nawn lou a hih ziak in. Israel tung ah kum sawmli sung vai a hawm hi.

¹⁹A mounu, Phinehas zi in a naupai a, a neih a hun mahmahta hi. Aman Pathian bawm laksak a hih thu leh a pu leh a pasal a si uh chih a zak in a kun suk a, nau a veita hi, a na in phata hi.

²⁰A sihdek lai in a kiang a ding numeite’n a kiang ah, “Lau ken, tapa na neita” a chi uhi. Himahleh a dawng hetkei a, a limsak sam kei hi.

²¹“Thupina in Israel a pawtsanta” chi in nau min Ikabod, a sa hi. Pathian bawm lah a laksakta ua, a pa leh a pasal lah a sita ngal ua.

²²“Thupina in Israel a pawtsanta, Pathian bawm lah a lak sakta ngal ua” a chi hi.