Read Paite Chin 1 SAMUEL 5 Bible Online

1 SAMUEL 5 - Paite Chin bible

1 SAMUEL 5

¹Huan, Philistia mite’n Pathian bawm a la ua, Ebenezer apan Ashdod ah a paipih uh.

²Philistia mite’n Pathian bawm a la ua, Dagon inn ah a la lut ua, Dagon kiang ah a koih uhi.

³Ashdod khomite a zing khangpi a, a thoh uleh, ngai in, TOUPA bawm ma ah Dagon a mai a leisi in a na puk vialvual mawk hi. Dagon a la ua, a omna mun ah a koih nawn uhi.

⁴A zing nawn zing khangpi a, a thoh uleh, ngai in, TOUPA bawm ma ah Dagon a mai a leisi in a na puk vialvual mawk a; Dagon lu leh a khutpek bawm lang nih ki tankhia kongpi bul ah a na kikham hi.

⁵Huaiziak in, Dagon siampu hiam, Dagon in a hongpaite in leng Ashdod a Dagon inn bul tunitan in a sikngam kei uhi.

⁶Huchi in TOUPA khut Ashdod khua mite tung ah a gik a, amaute a hihsia a, Ashdod khua leh a kiang vel a omte zangtan hipi in a gawtta hi.

⁷Huchi in Ashdod a mite’n huchibang thiltung a muh un, “Israelte Pathian bawm i kiang uah om gige kei hen, eimah leh i pathian Dagon tung ah a khutkhak a na tel mai” a chi uhi.

⁸huaiziak in, Philistia hausa tengteng a kiang uah a samkhawm ua, “Israelte Pathian bawm bang i loh dia?” a chi uh. Amau, “Israelte Pathian bawm Gath ah puak hi hen” chi in a dawng uhi. Huchi in Israelte Pathian bawm Gath ah a paipihta uhi.

⁹Hichi a honghi a, a paipih lai un TOUPA khut in huai khua a hihseta hi. Khomite a lian leh a neu a gawt vek a, a tung uah zangtan hipi a leng sak hi.

¹⁰Huchi in Pathian bawm Ekron ah a tun ua, Ekron khomite’n Israelte Pathian bawm eite leh i mite that din i kiang a hon tunta uh, chi in a kikou veng vung uhi.

¹¹Huchi in Philistia hausa tengteng a samkhawm ua, “Israelte Pathian bawm paimang sak unla, koute leh ka mite a hon thah louhna din a omna mun ngei ah pai nawn hen” a chi uh. Khaw pumpi ah sihna khop siatna a om a, Pathian khut lah huai khua ah a gik mahmah ngal a.

¹²A siloute’n zangtan a veichiat ua, huai khaw kikou husa van ah a tungtou hi.