Read Paite Chin 1 SAMUEL 6 Bible Online

1 SAMUEL 6 - Paite Chin bible

1 SAMUEL 6

¹Huan, TOUPA bawm Philistia mite gam ah kha sagih sung a om hi.

²Philistia mite’n, “TOUPA bawm bang i loh ding ua? A omna ngei mah a paisak nawn dan honhilh dihve ua” chi in a siampute leh aisansiamte a sam uhi.

³Amau, “Israelte Pathian bawm na paisak ding uleh leng a vuak in paisak hetkei un. A kiang ah tatlek kithoihna lan ngeingei un. Huchi in hihdam in na om ding uh. Huchi in bangdia a khut nou apan lakkhiat a omlou ahia chih na thei ding uh” a chi uhi.

⁴Huchi in amau, “A kiang a ka tatlekna thillat ding bang ahia?” a chi uh. Amau, “Philistia hausate zah dangkaeng zangtan lim nga leh dangkaeng sansim lim nga; na vek ua tung leh na hausate uh tung a leng hipi lah khat ahi ngal a.

⁵Huaiziak in, na zangtan lim uh leh na gam uh hihsetu sansim limte bawl un. Israelte Pathian thupina pia un, huchi in a khut na tung uah, na pathiante uleh na gam uh tung ah a zang sak nuam khamoh kei ding” a chi uhi.

⁶Aigupta mite leh Pharo in lungsim a khauhsak bang un bangdia na lungtang uh khauh sak na hi ua? A lak ua thillamdang a hih in mite paisak in a pawtkhe sak uh, hilou maw?

⁷Huaiziak in, tuin kangtalai thak sutuah unla, bawngpi nih a nawi suklai, hakkol paw ngeilou toh; huai bawngpite kangtalai ah khih unla, a noute uh amau apan in ah honpi un.

⁸TOUPA bawm la unla, kangtalai ah koih unla; tatlek thoihna dia na lat uh dangkaeng thil pen singlem ah thun in a sik ah koih unla, paisak unla, khah un.

⁹Huchi in gamgi lampang lampi tawn in Beth-shemesh ah a pai hiam en un, a pai leh i tung ua thil hoihlou tak amah hih a na hi dia; a paikei leh ei hon gawtpa amah khut a na hi kei chih i thei ding ua, i tung ua hong omsam himhim lel ahi ding, a chi uhi.

¹⁰Mite’n huchibang in a hih ua; bawngpi a nawi suklai nih a pi ua, kangtalai ah a khih ua, a noute uh bel in lam ah a khum uhi.

¹¹TOUPA bawm kangtalai ah a koih ua, dangkaeng sansim lim leh zangtan lim koihna singlem toh.

¹²Bawngpite’n Beth-shemesh lam zuan in lampi a zui vengveng ua; huchi in ham kawmkawm in lampi a zui ua, taklam ah hiam, veilam ah hiam a pial hetkei uh. Philistia hausate’n Beth-shemesh gamgi pha in a zui uhi.

¹³Beth-shemesh khomite’n phaizang ah buh a na la ua, a daktou ua, bawm a mu ua, a kipahpih mahmah uhi.

¹⁴Huai Kangtalai Beth-shemesh a mi Joshua lou ah a lut a, suangpi lian mahmah omna tak ah a khawlta hi. Kangtalai sing a ek ua, bawngpite TOUPA kiang ah haltum thillat in a lanta uhi.

¹⁵Levi chite’n TOUPA bawm dangkaeng thil omna singlem toh a la khia ua, suangpi tung ah a koih uh. Beth-shemesh khomite’n huai ni mah in haltum thillatte leh kithoihnate TOUPA kiang ah a lan uhi.

¹⁶Huai Philistia hausa ngate’n a muh nung un, huai ni mahmah in Ekron kholam ah a pai nawnta uhi.

¹⁷Philistia mite’n dangkaeng zangtan lim TOUPA kiang a tatlek thoihna dia a lat uh, Ashdod khaw tuam adin khat, Gaza khaw tuam adin khat, Ashkelon khotuam adin khat, Gath khotuam adin khat, Ekron khaw tuam adin khat ahi.

¹⁸Dangkaeng sansim lim ahihleh khaw tengteng kulh nei khua leh singtang lam khua leng sim vek a hausa ngate a Philistia mite khaw zah ahi. TOUPA bawm a ngakna suangpi mahmah uh Beth-shemesh khaw mi Joshua lou ah tunitan in a om nilouh lai hi.

¹⁹TOUPA bawm sung a et ziak un Beth-shemesh khomite Aman a gawt a, a lak ua mi sang nga leh sawmsagih tak a that hi. TOUPA’N a nak thah ziak in mite’n sun uhi.

²⁰Beth-shemesh khomite’n, hiai Pathian siangthou TOUPA ma ah kua ading thei in ei apan kua kiang ah ahia a paitouh ding? a chi uh.

²¹Huchi in Kiriath-jearim khomite kiang ah, “Philistia mite’n TOUPA bawm a hong koih nawn ua, hongsuk unla na kiang uah latou dih ua” chi a hilh din thupaw mite a sawlta uhi.