Read Paite Chin 1 SAMUEL 8 Bible Online

1 SAMUEL 8 - Paite Chin bible

1 SAMUEL 8

¹Huan, hichi ahi a, Samuel a upata a, a tapate Israel mite tung a vaihawmmi in a bawl hi.

²A ta masapen min Joel ahi a, a zom min Abijah ahi. Amaute Beer — sheba a vaihawmmite ahi uhi.

³Himahleh a tate’n a ma omdan a lakei ua, sum leh pai a delh ua, golhna a la ua, dik a vaihawmna a kaikawi uhi.

⁴Huchi in Israel mite upate tengteng a kikhawm ua, Ramah khua ah Samuel kiang ah a hoh uhi.

⁵A kiang ah, “Ngai in, na upa mahmahta a, na tapate’n lah na omdan a lakei hial uh. Namdang tengteng bang a ka tung ua vaihawm ding kumpipa hon bawlsak in” a chi uhi.

⁶Himahleh a kiang a, “Ka tung ua vaihawm ding kumpipa honpia in” a chih un Samuel a kipaksak kei hi. Huchi in Samuel TOUPA kiang ah a thum hi.

⁷TOUPA’N Samuel kiang ah, “Mite’n na kiang a, a gen tengteng uh ngaikhia in. Nang hon deihlou ahi kei ua, a tung ua kumpipa dia kei hondeih lou ahizaw uhi.

⁸Aigupta gam apan ka pikhiak ni apan tutan a a thilhih dan tengteng uh, hon lehngatsan a pathian dangte na a hon sepsan zel uh mah bang in nang tung ah a hih uhi.

⁹Huaiziak in, a thu uh ngaikhia in. Himahleh chitaktak in vauhilh inla, a tung ua vaihawmmi kumpipa tatdan ding kawkmuh in” a chi hi.

¹⁰Samuel in TOUPA thu tengteng kumpipa ngen mipite a hilhvek hi.

¹¹“Na tung ua vaihawmmi ding kumpipa tatdan hichibang ahi ding. Na tapate uh a la dia, amah mah ading, sakol kangtalai ading leh a sakol tungtuangmite ding in a sep ding. A khente a sakolkangtalai ma ah a tai ding uh.

¹²A sepaih sang heutu ding leh sawmnga heutu ding a sep dia; khenkhatte a leilet ding, a buhla ding, galvante bawl ding, a kangtalai van bawl ding in a zang ding hi.

¹³Na tanute uh gimlim bawl ding, anhuan ding leh tanghou bawl din a zang ding hi.

¹⁴Na lou, na grephuan, olive huan a a hoih tata a honsut dia, a sikhate a pe ding hi.

¹⁵Na haichi leh na grephuan a sawm a khat a hon laksak dia; a sikhate leh heutute a pe ding hi.

¹⁶Na sikhapate, na sikhanute, na tangval hoihhoihte leh na bawngte a honsut dia, a nasem din a zang ding.

¹⁷Na belamhon lak a sawm a khat a hon laksak dia; nou a sikhate na hi ding uhi.

¹⁸Huai hun chiang in na tel ding uh kumpipa ziak in na kapkhe ding uh. Himahleh huai hun chiang in TOUPA’N a hon ngaikhe kei ding” a chi hi.

¹⁹Himahleh mipite’n Samuel thu a zui nuam kei uh. “Ahi kei, kumpipa i neih ngeingei ding uh ahi.

²⁰Huchi in namdang tengteng bang i honghi dia, i kumpipa’n vai a hon hawmsak dia, i namte pi in galte a hon doupih ding” a chi uh.

²¹Samuel in mipite thugen tengteng a za a, TOUPA bil ah a gen sawn hi.

²²TOUPA’N Samuel kiang ah, a thu uh la inla, kumpipa bawlsak in, a chi hi. Samuel in Israel mite kiang ah, “Michih noumau khua chiat ah paita un,” a chi hi.