Read Paite Chin 1 SAMUEL 9 Bible Online

1 SAMUEL 9 - Paite Chin bible

1 SAMUEL 9

¹Huan, Benjamin gam a Benjamin suan mi khat mi hat leh hangsan mahmah a om a, a min Kish ahi. Huai mi Abiel tapa ahi a, huai mi Zeror tapa ahi a, huai mi Bekorath tapa ahi a, huai mi Aphia tapa ahi.

²Aman tapa khat a nei a, a min Saul ahi. Tangval deihhuai tak ahi a, Israel mite lak ah amah sang a deihhuai himhim a omkei. Kuamah a liangzang khup leng a omkei uhi.

³Saul pa Kish sabiltungte a mang hi. Kish in a tapa Saul kiang ah, “Thou inla, sikha khat pi inla sabiltungte va zong dihve” a chi hi.

⁴Huchi in Ephraim tanggam ah a vak a, Shalisha gam ah a vak hi. Himahleh a mu kei uh. Huchi in Shalim gam ah a vak ua, huai ah leng a mu kei uh. Benjamin mite gam ah a vaknawn ua, himahleh a mu tuankei uhi.

⁵Zuph gam a tun un Saul in a kiang a om a sikha kiang ah, “Kisa dih, i pai nawn mai ding, huchih kei leh ka pa’n sabiltungte awlmoh nawnlou in ei a hon ngaihtuah zaw kha ding” a chi hi.

⁶Aman a kiang ah, “Ngai in, hiai khua ah Pathian mi a om a, mi zahtakhuai tak ahi. A gen peuhmah a hongtung ngeingei nak hi. Kisa in, huai ah i hoh ding, i hohna lampi a hon hilhthei zenzen khak leh” a chi hi.

⁷Huchi in Saul in a sikha kiang ah, “Ahi na a, ngai dih, hoh hita le hang, huai mi ading bang i tawi dia? I bawm ah lah tanghou a om nawn kei. Pathian mi kipahman tawi ding a om hetkei hi. Bang i nei a eita?” a chi hi.

⁸Sikha in Saul a dawng nawn a, “Ngai in, dangka sekel mun li a khen, mun khat ka tawilai hi. Hiai i hohna ding a honhilh man din Pathian mi ka pe ding” a chi hi.

⁹Tuma siah Israelte lak a min Pathian dot a ut leh, “Kisa dih, mutheipa kiang ah i hoh ding, a chi nak uh. Tulai a zawlnei a chih uh tuma lam in mutheipa a chi uhi.

¹⁰Huchi in Saul in a sikha kiang ah, “Hoih geih e, va hoh peuhmah ni,” a chi hi. Huchi in Pathian mi omna khua ah a hohta uhi.

¹¹Khozotna lampi a a paitouh lai un nungak tuitawi dia hong kuante a mu ua, a kiang uah, “Hiai ah mutheipa a om hia?” a chi uhi.

¹²Amau a dawng ua, “Om mah e, ngai in, na ma uah a pai, kin un, tuni in khua ah a na hoh hi. Tuni in munsang ah mite a kithoih uhi.

¹³Khua a na luttouh tak un mun sang a an ne dia a hoh ma in na va mungal ding uh. Kithoihna vualzawlpa ding a hih ziak in a tun mateng mipi’n an a nekei ding uh. Huaikhit chiang in a misapte un an a ne zel uhi. Huaiziak in hohtou meng unla, na va mu pah ding uh” a chi uhi.

¹⁴Huchi in, khua ah a hohtou uh. Khua a lut uleh, ngai in, Samuel munsang a hoh ding in amau a kituahpih hi.

¹⁵Saul hong ma ni khat in Samuel kiang ah TOUPA a kilak a;

¹⁶“Zingchiang in hichi hun in Benjamin gam apan na kiang ah mi khat k’on hohsak dia, ka mi Israelte tung a heutu ding in thau na nilh ding ahi. Aman Philistia mite khut apan ka mite a hondam ding. A kikou husa uh ka kiang a hongtun tak ziak in ka mite zaw ka limsak ahi” a chi hi.

¹⁷Samuel in Saul a muh in TOUPA’N a kiang ah, “En dih, na kiang a ka mi gen; amahmah in ka mite tung ah vai a hawm ding” a chi hi.

¹⁸Huchi in kulh kongpi ah Saul in Samuel a va naih a, “Mutheipa inn koilai a om ahia, honhilh dihve” a chi hi.

¹⁹Samuel in Saul a dawng a, “Kei huai mutheipa ka hi. Ka ma ah mun sang lam zuan in pai inla, tuni in ka kiang ah an nane ding hi. Zingchiang zingsang in k’on paisak ding. Na lungtang a om tengteng leng k’on hilh ding.

²⁰Ni thum paita a mang na sabiltung thu lunghimawh ken. Muh ahita uh. Israelte lunggulh kua tung ah ahia a om? Nang leh na pa inn a mi tengteng tung ah ahi kei maw?” a chi hi.

²¹Saul in a dawng a, “Israel nam lak a neupen, Benjamin nam ka hi kei maw? Ka inkuan leng Benjamin inkuan tengteng lak a neupen ahi kei maw? Bangchidan a hichidan ka kiang a gen na hia?” a chi hi.

²²Samuel in Saul leh a sikha a pi a, mikhual indan ah a pilut a, a sap uh, mi sawmthum lak ah mun zahtakhuai ah a tusak hi.

²³Samuel in anhuan mi kiang ah, “Na kiang a koihtuam ding ka chih, tantuan k’on piakpen honla dih” a chi hi.

²⁴Huchi in anhuan mi in a phei leh a tung a om a hontawi a, Saul ma ah a lui hi. Samuel in, “En dih, ka na koihtuam, um inla ne in. A hun sehsa adia hiai mite ka chialkhawm lai a k’on sehsak him ahi, ka na chita ngal a” a chi hi. Huchi in huai ni’n Saul in Samuel toh Ankuang a umkhawm uhi.

²⁵Munsang apan khua a hong paisuk un intung ah Saul in Samuel a houpih hi.

²⁶Zing khangpi in a thou a; nisuah kuan in Samuel in intung a om Saul a sam hi. “Thou in, k’on paisakta ding” a chi hi. Huchi in a nih un a paikhia ua, Saul leh Samuel a pawtta uh.

²⁷Khaw nawl a tunsuk un Samuel in Saul kiang ah, “Sikhapa i malam ah paisak inla, amah a paita a, nang bel khawl tadih in, Pathian thu k’on hilh ding” a chi hi.