Read Kapampangan Genesis 4 Bible Online

Genesis 4 - Kapampangan bible

Genesis 4

¹Sipingnan neng Adan ing asawa nang i Eva at mebuktut ya, at beit ne i Cain. Ngana, Mikayanak kung metung a lalaki king saup na ning GINU. Inya Cain[11] ing pemalagyu na king anak na.

²Beit ne ing metung pang anak a lalaki. Abel ing lagyu na. Pastul ya i Abel at i Cain naman ortelanu ya.

³Dinatang ing aldo at i Cain migdala yang aibie na king GINU ibat king bunga na ning gabun.

⁴I Abel naman migdala yang metung karing pangane biseru karing tupa na, at inain na ing masanting diling dake. Metula ya ing GINU kang Abel at king daralan nang ain.

⁵Oneng e ya metula kang Cain at king ain a darala na. Mimua ya i Cain at meslam ya lupa.

⁶Ngana ning GINU kang Cain, Obat mua ka? Obat maslam ka lupa?

⁷Nung mayap ing gewa mu, sukat kang tumula;[12] nung e mayap, ing kasalanan manaya ya lele mung pasbul; pagnasan na ka, oneng sukat meng sambutan.

⁸Misan a aldo, nganang Cain kang Abel a kapatad na, Tara, munta kata king marangle. Minta la king marangle at kabang atyu la karin, lepitan neng Cain i Abel at pete ne.

⁹Kanita nganang mengutang ning GINU kang Cain, Nukarin ya ing kapatad mung i Abel? E ke balu, nganang mekibat. Aku wari ing talaingat king kapatad ko?

¹⁰Kanita ngana ning GINU, Obat gewa mu ing anti kanyan? Kukulait kanaku ibat king gabun ing daya na ning kapatad mu.

¹¹Manibat ngeni makasumpa ka at mitabi ka king gabun a mistulang asbuk a mininum king dayang pepatulu mu king kapatad mu.

¹²Mananaman ka man, oneng ala yang ibie pupul ing gabun; ala kang pupulan. Maglibut-libut ka king mabilug a yatu at e ka malyaring mipaindatun nu man karin.

¹³Nganang Cain king GINU, Kabayat nang pusanan niting binie yung parusa!

¹⁴Palakuan yu ku king gabun a iti at mabating ku ban e yu na ku akit; maglayas-layas kung alang tuknangan king lupa na ning yatu, at paten na ku ning ninumang manakit kanaku!

¹⁵E makanyan, ngana ning GINU kang Cain. Itang makamate keka, makatapitu yang besis miparusan. Mibili yang metung a tatak ing GINU kang Cain ban e ne paten ning ninumang taung manakit kang Cain.

¹⁶Meko ya i Cain king arapan na ning GINU at menuknangan ya king sakup ning Nod,[13] king dane nang aslagan ning Eden.

¹⁷Sipingnan neng Cain ing asawa na; mebuktut ya at beit ne i Enoc. Telakad neng Cain ing metung a siudad, at pekilagyu ne iti king anak nang i Enoc.

¹⁸I Irad ya ing meging anak nang Enoc, at meging anak na ne man Irad i Meuyael. Anak neng Meuyael i Metusael, at anak neng Metusael i Lamec.

¹⁹Adua ya asawa i Lamec; i Ada at i Zilla.

²⁰Beit neng Ada i Jabal; ya ing pipumpunan da ring taung manuknangan karing tolda at manese animal antimo ding baka.

²¹Jubal ne man lagyu ing kapatad na; ya naman ing pipumpunan da ring sablang manigtigan lira at plauta.

²²Beit neng Zilla i Tubal-Cain a pipumpunan da ring taung biasang gawa karing kasangkapan a tangsu at bakal. Naama ya lagyu ing kapatad nang babaing Tubal-Cain.

²³Nganang Lamec karing asawa na, Ada at Zilla, pakiramdaman yu ku! Pete ke ing metung a kayanakan uli ning penasakit na ku.

²⁴Nung ing makamate kang Cain makatapitu yang besis miparusan, ing kang Lamec naman makatapitung pulu't pitung besis.

²⁵Pasibayu neng sipingnan Adan ing asawa na, at menganak yang lalaki at pemalagyuan neng Set. Dininan na kung aliwang anak ning Dios, nganang Eva, bilang kalibe nang Abel a pete nang Cain.

²⁶Mikayanak yang metung a lalaki i Set, at pemalagyuan neng Enos. Kanita la megumpisang minaus ding tau king lagyu na ning GINU king karelang pamanyamba.