Read Kapampangan Genesis 42 Bible Online

Genesis 42 - Kapampangan bible

Genesis 42

¹Abalitan nang Jacob king ating dakal a pamangan karin Ehipto,

²inya ngana karing anak na, Nananu kayu ken? Munta kayu Ehipto; abalitan kung ating dakal a pamangan karin. Sali kayu ba ta mung e mate king danup.

³Inya minta la Ehipto ding apulu nang kapatad Jose ban saling pamangan.

⁴E ne pepatukian Jacob i Benjamin karing aliwa nang anak, uling tatakut yang ating malyari kang Benjamin.

⁵Anti na ning miras munaman ing danup king mabilug a Canaan, mekiabe la ring anak nang Jacob karing pupunta Ehipto ban saling pamangan.

⁶Ing gobernador ning mabilug a Ehipto ya i Jose; ya ing mamisaling pamangan karing sablang taung manibatan king mabilug a yatu. Dinatang la ding kapatad na at dinuku la king arapan na angga king ding lupa ra tatagkil na la king gabun.

⁷Ikit na lang Jose ding kapatad na at akilala na la, oneng e re akilala. Mataram yang migsalita karela. Nukarin kayu tau? ngana karela. Ngarang mekibat, Tau ke pu Canaan. Dinatang ke pu keti ban saling pamangan.

⁸Akilala na lang Jose ding kapatad na, oneng ila ali re.

⁹Aganaka na lang Jose ding apaninap na tungkul karela, inya ngana, Ispia kayu ne? Dinatang kayu keti ba yung lawan nung nu ya maina ing Ehipto?

¹⁰Pekibat da, Ali ke pu, makamal! Bisa kami mu pung saling pamangan.

¹¹Mikakapatad kami. Tau kaming apaniwalan at e kami ispia.

¹²Ngana karelang Jose, E ra kayu paniwalan! Dinatang kayu ba yung lawan nung nu ya maina ing bansa mi.

¹³Ngara, Labing adua kami pung mikakapatad at tau ya pu Canaan i tata mi. Melakuan ya pu kang tata mi ing bungsu at ing metung ming kapatad mete ne.

¹⁴Nganang Jose karela, Antimo ing sinabi ku: ispia kayu!

¹⁵Kaniti kayu masubuk. Susumpa ku king lagyu na ning ari, e na kayu makalako keti anggang e ye idala keti ing bungsu yung kapatad.

¹⁶Tuburan ye ing metung kekayu at parakit ing kapatad yu kabang manatili kayu king sukulan ban mayakit nung tutu pin ing sinabi yu. Nung ali, antimo ing sinabi ku king lagyu na ning ari, ispia kayu.

¹⁷At pepakulung na la kilub ding atlung aldo.

¹⁸Karas ning katlung aldo nganang Jose karela, Tau kung atin takut king Dios, oyni ing kekayung gawan ban e ra kayu papate.

¹⁹Nung tau kayung apaniwalan ing metung kekayung mikakapatad manatili yang makakulung kabang ding aliwa muli la, at atdanan da lang pamangan ding kekayung daranup a pamilya.

²⁰Kaybat idala ye kanaku ing bungsu yu. Makanyan kung apatunayan king e kayu maglaram. At e ra kayu papate. Makanyan ing gewa ra.

²¹Kaybat ngarang misabi-sabi, Oyan! Mamayad ta na king depat tamu king kapatad tamung i Jose. Agyamang ikit tamung magpakalunus ya, e ta ya pekiramdaman. Inya ngeni itamu naman ing magdusa.

²²Nganang Ruben karela, Ikit yu na! Sinabi ku nang e ye nananan ing anak. Oneng e yu ku kasi pekiramdaman. Ngeni mamayad tamu king pangamate na.

²³E ra balu king aintindian nang Jose ing sinabi ra uling pakisabian de kapamilatan na ning metung a interpreti.

²⁴Likuan na lang Jose at saka ya menangis. Kaybat belikan na la at mekipagsalita ya karela. Pepakawani ne i Simeon at saka ne pepagapus king akakit da.

²⁵Inutus nang Jose ing katmuan da lang pamangan ding karelang lulanan at ibalik ding salaping pemayad da karing sarasarili rang saku, at saka na la peparinan apangan da king pamaglakbe ra. Metupad ing sablang inutus na.

²⁶Seke da ring mikakapatad ing seli rang pamangan karing karelang asno at meko na la.

²⁷Pangabengi, inyang tuknang la ban magpaynawa, biklat ne ning metung karela ing saku na ban kumang pamangan para king asno na. Ikit na la kilub ning saku ding salaping pemayad na.

²⁸Ngana karing kapatad na, Binalik da la ring salaping pemayad ku; atyu la kilub na ning saku! Kinarug la salu at king takut da ngarang misabi-sabi, Nanu iting depat na ning Dios kekatamu?

²⁹Karas da kang Jacob a tata ra king sakup ning Canaan, belita ra ing heganaganang milyari karela. Ngara,

³⁰Mataram yang migsalita kekami itang taung panibalan da Ehipto at sinabi na king ispia ke kanu!

³¹Pero sinabi mi king ali kami at tau kaming apaniwalan.

³²Sinabi mi naman king labi keng aduang mikakapatad at ing metung ming kapatad mete ne samantalang ing bungsu kayabe ye keti Canaan.

³³Kanita sinabi na kekami ning taung manibala king bansang ita king subukan na kami ba nang abalu nung tau ke ping apaniwalan. Pepalakuan ne kekami ing metung karing kapatad mi at pepagdalan na lang pamangan ding pamilya ming daranup at saka na ke meko.

³⁴Ngana kekami, Ituki ye kanaku ing bungsu yung kapatad. Kanita abalu ku king e kayu pin ispia nune tau kayung apaniwalan. Kanita ibulus ke ing kapatad yung i Simeon at paintulutan da kayung magnegosyu king mabilug a bansa.

³⁵Inyang ilako ne ning balang metung karela ing laman na ning saku na, ikit na la ding salaping pemayad na. Inyang akit da la reti, mitakutan la at pati i tata ra.

³⁶Ngana karelang Jacob a tata ra, Buri yu lang mawala ngan ding kakung anak? Ala ne i Jose; ala nia naman i Simeon at ngeni kakuanan ye pa kanaku i Benjamin? Kabayat na ning kanakung pupusanan!

³⁷Kanita nganang Ruben kang tata na, Paten yu la ding adua kung anak a lalaki nung e ke kayabe muli i Benjamin. Panibala ye kanaku at ibalik kia naman kekayu!

³⁸Nganang Jacob, E ya malyaring tuki keka i Benjamin. Mete ne ing kapatad na at ya na mung makatagan kanaku. Uling matua na ku, nung ating malyari kang Benjamin king pamaglakbe yu, ikamate kung agad uli na ning lungkut.