Read Kapampangan 1 Cronica 13 Bible Online

1 Cronica 13 - Kapampangan bible

1 Cronica 13

¹Sinanggunian na lang David ding opisyal da ring tia libu at tia dinalan a sundalus.

²Kaybat, nganang sinabi karing sablang Israelitang atyu karin, Nung paintulut yu at nung kaburian na ning GINUNG kekatamung Dios, mitubud tamung tau ban agkatan la ngang mitipun keti ding kabalen tamung alayu keti at pati na ding pari at Levitang manuknangan karing karelang siudad at baryu.

³Kanita abe-abe ta yang kuanan ing Kaban ning Dios a mekalinguan inyang i Saul ya ing ari.

⁴Metula la ding memalen kaniting munikala at pemayapan de.

⁵Inya tinipun na lang David ding Israelita manibat king Sihor ning Ehipto angga king Pidadalanan ning Hamat ban kuanan ya king Kiriat Jearim ing Kaban ning Dios at kaybat idala ya king Jerusalem.

⁶Minta ya i David at ding memalen king siudad na ning Baala a alang aliwa nune ing Kiriat Jearim king sakup ning Juda ban kuanan ya ing Kaban ning Dios nung nu ya atyu ing lagyu na ning GINUNG makatronu babo da ring kerubin.

⁷Ibat king bale nang Abinadab, linual de ing Kaban ning Dios at seke re king bayung karitun. Ding pakuliut king karitun ila di Uzza at Ahio

⁸kabang i David at ding sablang memalen teterak lang alang tuknang ban parangalan ya ing Dios. Migkanta la at tinigtig da la ring karelang lira, alpa, tambul, pompiang, at trumpeta.

⁹Inyang malapit na la king lugal a pidadaran nang Tsidon, mitisud la ding bakang kukuliut king karitun, inya telan neng Uzza ing Kaban.

¹⁰Kanita mu rin mimua ya kang Uzza ing GINU at pete ne karin uling telan ne ing Kaban.

¹¹Iti ing sangkan nung inya manibat na kanita inaus deng Perez Uzza ing lugal a ita. Tutu yang meligalig i David kaniting milyari kang Uzza.

¹²Mitakutan ya i David king Dios. Ngana, Makananu ke ngening iyuli ing Kaban ning Dios?

¹³Inya e na ne delang David ing Kaban king Jerusalem. Likuan na nia mu ing Kaban king bale na ning taung milagyuan Obed Edom ning Gat.

¹⁴Menatili ya karin ing Kaban ning Dios kilub ding atlung bulan, at binendisyunan ne ning GINU ing pamilya nang Obed Edom at ing sablang atyu keya.