Read Kapampangan 1 Cronica 14 Bible Online

1 Cronica 14 - Kapampangan bible

1 Cronica 14

¹Mitubud yang tau i Aring Hiram kang David; peparala ya namang tablang sedro, manabas batu ampon kalpinteru ban gawan de ing palasyu nang David.

²Kanita na akilalang David king kaburian na ning GINU ing pamaging ari na king Israel, at mibendisyunan ya ing kayarian king uli da ring memalen na ning Israel.

³Mekiasawa ya pa i David karing babai na ning Jerusalem at mikayanak yang dakal.

⁴Ila deti ring anak na: i Samua, Sobab, Natan, Solomon,

⁵Ibhar, Elisua, Elpelet,

⁶Noga, Nefeg, Jafia,

⁷Elisama, Beeliada, at i Elifelet.

⁸Abalitan da ring Filisteo king i David ya na ing mag-ari king mabilug a Israel. Inya miyabe-abe la ba reng bihagan. Abalitan nang David iti at linual ya ba na lang labanan.

⁹Miras la ding Filisteo king Kapatagan ning Refaim at lisuban de.

¹⁰Nganang mengutang David king Dios, Labanan ku la o ali ku la ding Filisteo? Nung labanan ku la, papagtagumpen yu ku kaya karela? Nganang mekibat ning GINU, Wa, labanan mu la at papagtagumpen da ka!

¹¹Inya lisuban na lang David ding Filisteong atyu king Baal Perazim at simbut na la. Nganang David, Ginamit na kung anting kasangkapan ning Dios ban payagusan lang anting danum ding kakung kalaban. Inya meyaus yang Baal Perazim ing lugal a ita.

¹²Inyang tinakas la ding Filisteo likuan da la ring kikilalanan dang dios, at pepasilab na la ngang David deti.

¹³Pasibayu lang linusub king kapatagan ding Filisteo.

¹⁴Inya mengutang yang pasibayu i David king Dios. Nganang mekibat ning Dios, E mo lulusuban keti, nune dumurut ka at king kagulutan mu la salakayan, lele da ring tanaman a balsamu.

¹⁵Potang damdaman mu na ing kaluskus babo da ring tanaman kanita mu la lusuban, uling muna ku kekang salake ba lang masambut ding Filisteo.

¹⁶Memintu ya i David ketang inutus na ning Dios, at simbut na la ding Filisteo manibat king Gibeon angga king Gezer.

¹⁷Mikalat karing sablang bansa ing kabantugan nang David, at mitakutan la kang David uli na ning GINU.