Read Kapampangan 1 Cronica 15 Bible Online

1 Cronica 15 - Kapampangan bible

1 Cronica 15

¹Pepagawa yang dakal nang bale i David karin king Siudad nang David.[14] Pepasadia nia naman ing metung a lugal para king Kaban ning Dios at pepatalakad yang tolda para kaniti.

²Sinabi na, Bukud mung ding Levita ilang malyaring magdala king Kaban ning Dios, uling ila ding pinili na ning GINU ban magdala kaniti at sumuyu king kapilan pa man.

³Kanita pepayaus na la ngang David ding sablang memalen na ning Israel a mitipun king Jerusalem ban idala ya ing Kaban ning GINU ketang lugal a sidia na para kaniti.

⁴Kaybat na nita, peparakit na la ding lahi nang Aaron at ding Levita.

⁵Ibat king lahi nang Kohat a anak nang Levi, dinatang ya i Uriel a mamahala karing dinalan aduang pulung miembru na ning pamilya na.

⁶King pamilya nang Merari, dinatang ya i Asaia a mamahala karing aduang dalan aduang pulung katau.

⁷King pamilya nang Gerson, dinatang ya i Joel a mamahala karing dinalan atlung pulung katau.

⁸King pamilya nang Elizafan, dinatang ya i Semaia a mamahala karing aduang dalan a katau.

⁹King pamilya nang Hebron, dinatang ya i Eliel a mamahala karing walung pulung katau.

¹⁰At king pamilya nang Uzziel, dinatang ya i Aminadab a mamahala karing dinalan labing aduang tau.

¹¹Pepayaus na lang David ding paring i Zadok at i Abiatar ampon ding Levitang i Uriel, Asaia, Joel, Semaia, Eliel, at i Aminadab.

¹²Ngana karing Levita, Ikayu ding manimuna da ring pamilyang Levita. Pakalinisan yu ing sarili yu at antimu rin ding kalupa yung Levita ba yeng idala ing Kaban ning Kasunduan ning GINUNG Dios ning Israel ketang lugal a pepasadia ku.

¹³Uling e kayu kayabe kanitang dela mi ya ing Kaban ning Kasunduan, mimua ya ing GINUNG kekatamung Dios, uling simban mi ya ing Dios king paralan a e karapatdapat.

¹⁴Inya pekalinis da ring pari at Levita ing karelang sarili ba reng idala ing Kaban ning Kasunduan ning GINUNG Dios ning Israel.

¹⁵Pisanan de iti king kapamilatan da ring tambayuk, agpang king inutus na ning GINU kang Moises.

¹⁶Inutus na namang David karing manimuna da ring Levita ing mamili la karing kayabe ra a biasang magkanta at tigtig masikan karing instrumentong musika antimo ding alpa, lira, at pompiang.

¹⁷Inya pinili de i Heman a anak nang Joel, i Asaf a anak nang Berekia; king pamilya nang Merari, i Etan a anak nang Kusaia.

¹⁸Para magkanta at manigtigan, pinili da la ri Zacarias, Jaaziel, Semiramot, Jehiel, Uni, Eliab, Benaia, Maaseia, Matitia, Elifelehu, Mikneia, di Obed Edom at Jeiel, ding guardia karing pasbul dalan.

¹⁹Pinili da la ri Heman, Asaf, at i Etan ban ila ring tigtig karing tangsung pompiang.

²⁰Ding tigtig karing instrumentong babage karing salteryu ila ri Zacarias, Jaaziel, Semiramot, Jehiel, Uni, Eliab, Maaseia, at i Benaia.

²¹Ding tigtig karing lira ila di Matitia, Elifelehu, Mikneia, Obed Edom, Jeiel, at i Azazia.

²²Ing kumpas karing talapagkanta ya i Kenania, ing manibala karing Levita, uling biasa ya.

²³Ding magbante king pasbul ning Kaban ila di Berekia at Elkana.

²⁴Ding tumiup karing trumpeta arap ning Kaban ning Dios ila ding paring di Sebania, Josafat, Netanel, Amasai, Zacarias, Benaia, Eliezer. I Obed Edom at i Jehia ila ding mepili ban magbante king Kaban ning Kasunduan; kayabe da la ri Berekia at Elkana.

²⁵Inya minta yang masayang-masaya i David at ding manimuna ning Israel ampon ding manimuna da ring libu-libung sundalus king bale nang Obed Edom ban kuanan ya ing Kaban ning Kasunduan[15] ning GINU.

²⁶Miyain lang pitung toro at pitung tupang lalaki ban saupan na la ning Dios ding Levitang magdala king Kaban ning Kasunduan ning GINU.

²⁷Makasulud yang imalan a megawa king masanting diling linen i David, at antimu rin ding talapagkanta, i Kenania a manimuna da, at ding Levitang magdala king Kaban. Susulud nia namang David itang efod a megawa king telang linen.

²⁸Kayabe la ngan ding sablang Israelita inyang milipat ya ing Kaban ning Kasunduan ning GINU king Jerusalem. Kukulisak la ngan king tula at titigtigan da la ring trumpeta, tambuli, pompiang, alpa, at lira.

²⁹Tinando ya king awang i Mikal, ing babaing anak nang Saul, kabang lulub de king siudad ing Kaban ning Kasunduan ning GINU, at ikit neng teterak at lundag-lundag king tula i David. Kesaman ne i David kilub ning pusu na.