Read Kapampangan 1 Cronica 16 Bible Online

1 Cronica 16 - Kapampangan bible

1 Cronica 16

¹Dela re ing Kaban ning Dios ketang toldang pepasadia nang David at linub de. Kaybat, minie lang ain-a-durulukan at ain-ning-pamisulusulu para king Dios.

²Inyang ayari na nang David ing pamanain karing ain-sakripisyu, binendisyunan na la ding tau king lagyu na ning GINU,

³at dininan na la ngang pamangan. Dininan neng tinape at kapirasung karning ningnang ampon pasas ing balang metung a lalaki at babaing Israelita.

⁴Tilduan na lang David ding mapilan karing Levita ban manimuna arap ning Kaban ning GINU king pamaniamba, pamagkanta, at pamamie kapasalamatan king GINU, ing Dios ning Israel.

⁵Mitulduan yang manimuna i Asaf at meging kasaup na la di Zacarias, Jeiel, Semiramot, Jehiel, Matitia, Eliab, Benaia, Obed Edom, at i Jeiel. Ila ding tigtig karing alpa at lira. I Asaf ya ing tigtig karing pompiang.

⁶Pari la ding tumiup karing trumpeta aldo-aldo king arap ning Kaban ning Kasunduan[16] ning Dios. Ding pari ila di Benaia at Jahaziel.

⁷Kanitang aldong ita na penibalang David kang Asaf at karing kayabe na ing katungkulan da king pamagkantang kapasalamatan king GINU.

⁸Munie kayung kapasalamatan king GINU, maus kayu king lagyu na; sablang depat na karing tau sabian yu.

⁹Magkanta kayu king GINU, pagkanta yeng kapurian; ibalita ing makapagmulala nang depat.

¹⁰Tumula kayu uli na ning banal nang lagyu; paburen lang tumula ding sasamba king Dios!

¹¹Panintunan ye ing GINU at ing kayupayan na; ing pamanintun king GINU e yu sana kakalinguan.

¹²E yu la sana kakalinguan ding milagrung depat na, at ding sinabi nang kayatulan,

¹³O lahi nang Abraham a talasuyu na, O anak nang Jacob a pinili na ning GINU.

¹⁴Ing GINU ya ing kekatamung Dios, ding kautusan na para king mabilug a yatu la.

¹⁵E ne kakalinguan dit' man ing kasunduan na, ing pangaku na karing libu-libung lahi na.

¹⁶Ing kasunduan a gewa na kang Abraham, ing pangaku na kang Isaac, deti tuparan na la ngan.

¹⁷Ginawa yang kasunduan ing GINU kang Jacob, kasunduan yang manatili kapilan man.

¹⁸Ngana, Keka ibie ke ing gabun ning Canaan bilang mana a kekang pibandian.

¹⁹Kanitang panaun a ita inyang tutu lang ditak pa; dayuan la ngan karin king Canaan.

²⁰Karing miyayaliwang bansa at kayarian miglipat-lipat la.

²¹E na la pepaburen ma-ipus kaninu man, alang-alang karela ding ari belan na la.

²²Ngana, Ding pinili ku e yu la nananan, ding propeta ku e yu la panasakitan.

²³Magkanta kayu king GINU! Magkanta ka king GINU, O meto yatu! Isalita yu aldo-aldo ing pamagligtas na kekatamu!

²⁴Ing kayupayan na karing bansa sabian yu, at ding makapagmulalang dapat na karing sablang tau.

²⁵Uling ing GINU maula ya; sukat yang purian, sukat yang galangan maygit karing aliwang dios.

²⁶Rebultu la mu ding dios-diosan da ring paganu; oneng ing linalang karing banua ya ing GINU.

²⁷Makapadurut ing ligaya ampon ing kamalan na; kayupayan at tula ing atyu king tuknangan na.

²⁸Purian ya ing GINU, ikong sablang tau keting yatu, purian ye ing ligaya na at kayupayan!

²⁹Purian ya ing maligaya nang lagyu; malaus kayu king bale na at ain ibie keya. King banal a gayak samban ya ing GINU.

³⁰Galgal ka arapan na, O meto yatu. Wa, ing yatu matatag ya at e ya maugun king kabilian na.

³¹Paburen yang tumula ing banua; paburen ing yatu magsaya ya, at pati na ing dagat ampon ing sablang atyu king GINU; sabian karing bansa king ing GINU ari ya!

³²Paburen yang mainge ing dagat, at ing sablang atyu keting dagat; paburen yung ding marangle at ding sablang tanam da tumula la.

³³Kanita ding sablang tanaman ning kagubatan magkanta lang matula arap ning GINU potang datang ya ban ukuman neng yatu.

³⁴Munie kayung kapasalamatan king GINU, uling mayap ya; ing lugud nang e kukupas manatili kapilan man.

³⁵Sabian king GINU, Iligtas mu kami, O Dios a kekeng Talapagligtas; ibat karing miyayaliwang bansa tipunan mu kami ban pasalamatan mi ya ing lagyu mung banal at manakit kaligayan king pamamie kekang kapurian.

³⁶Ing GINU, ing Dios ning Israel ya ing purian; purian ye ngeni at king kapilan man! Ngarang mekibat ding tau, Amen. Kaybat na nita, pinuri de ing GINU.

³⁷I Asaf at ding kalupa nang Levita ila ding tilduan nang David mangasiwa king aldo-aldo pamanyamba ketang lugal ning Kaban ning Kasunduan ning GINU.

³⁸Ding kasaup da ila di Obed Edom, ing anak nang Jedutun ampon ding anam apulu't walung katau king pamilya na. I Obed Edom at i Hosa ila ding ating pakibatan karing pasbul dalan.

³⁹I Zadok at ding kayabe nang pari ila naman ding ating pakibatan king kasuyuan pamanyamba king GINU ketang matas a lugal ning Gibeon.

⁴⁰Minie lang ain-a-durulukan king altar neng abak at neng bengi, agpang ketang makasulat king Kautusan ning GINU a binie na king Israel.

⁴¹Kasaup da la karin di Heman at Jedutun ampon ding aliwa pang mepili ban magkantang kapasalamatan[17] king GINU uli na ning alang angga nang lugud.

⁴²Ding ating pakibatan karing trumpeta at pompiang ampon aliwa pang intrumentong musikang titigtigan neng magkantang kapasalamatan ila naman di Heman at Jedutun. Ding pamilya nang Jedutun ila ding ating pakibatan king pamag-guardia karing pasbul dalan.

⁴³Kaybat na nita, minuli la ding tau. Minuli ya naman i David ba neng akayabe ing pamilya na.