Read Kapampangan 1 Cronica 17 Bible Online

1 Cronica 17 - Kapampangan bible

1 Cronica 17

¹Nganang Aring David kang propeta Natan inyang makatuknang ne king palasyu na, Manuknangan ku king palasyung megawa king dutung a sedro samantalang ing Kaban ning Kasunduan[18] ning GINU atyu king tolda.

²Nganang Natan, Gawan mu itang isipan mung mayap uling ing Dios atyu keka.

³King bengi mu ring ita pekisabian ne ning GINU i Natan.

⁴Ngana, Natan, puntalan me ing talasuyu kung i David at sabian mu king aliwa ya ing patalakad king bale a pituknangan ku.

⁵E ku pa menuknangan king metung a bale manibat na kanitang linual ke ing Israel king Ehipto; menuknangan ku king tolda a pilipat-lipat da karing miyayaliwang lugal.

⁶King kanakung pamaglakbe kayabe da ring Israelita, ala kung kitnan metung man karing manimuna da nung inya e ra ku pepatalakad bale gewa king dutung a sedro.

⁷Inya sabian mu ing anti kaniti king talasuyu kung i David, king aku, ing GINUNG Mayupaya: Leko da ka king pamagpastul mung tupa ban gawan pamuntuk na ning balen kung Israel.

⁸Pitnubayan da ka nu ka man minta, at simbut ku la ngan ding kekang kalaban king kekang panyulung. Gawan da kang pikabaluan a pamuntuk karing sablang manimuna ning yatu.

⁹Dinan keng sarili nang gabun ing Israel, at ibili ku la karin ban e ne misakitan o maligalig pa karing e mayap a tau

¹⁰antimo ing milyari manibat na kanitang memili kung talapanimuna[19] na. Pasukuan ku la ding sabla mung kalaban. Ipatalakad da kang metung a lahi.

¹¹Potang mate ka at mikutkut king kutkutan da ring kekang makatua, gawan keng ari ing metung karing anak mu at gawan keng matatag ing kayarian na.

¹²Ya ing pagawa king bale para kanaku, at papanatilian ku ne man ing kayarian na king kapilan pa man.

¹³Aku ing maging tata na at ya ing maging anak ku. Likuan ke i Saul, oneng ya e ke lakuan. Wa, leko ke i Saul ban ika ing maging ari.

¹⁴Ya ing papamahalan ku karing memalen ku at king kanakung kayarian king kapilan pa man. Ala yang kapupusan ing kayarian na.

¹⁵Sinabi na ngang Natan kang David ing sablang sinabi na ning Dios.

¹⁶Kanita linub ya i Aring David king Toldang tuknangan ning GINU at linukluk ya. Kaybat nganang migsalita, O GINUNG Dios, ninu mo aku at ing pamilya ku ban pagmalasakitan mu?

¹⁷At balamu malati pang bage iti king akakit mu, O GINUNG Dios. Binggitan mu munaman ing tungkul king mayap nang panaun a daratang ning pamilya ku.

¹⁸Nanu pa mo ing sabian ku keka? Lubus mu kung balu, makanyan man parangalan mu ku, ing kekang talasuyu.

¹⁹Para king kanakung kapakanan, aku a maluka mung talasuyu, at agpang king kekang kaburian, depatan mu ngan iting mangaragul a bage at pepakit ing dangalan ku king daratang a panaun.

²⁰O GINU, ala kang kalupa; malambat mi nang balu king alang Dios subali mu ika.

²¹Alang aliwang bansa keti king yatu a kalupa na ning Israel a linigtas mu king panga-ipus ban gawan meng sarili mung balen. Meging pikabaluan ka king mabilug a yatu uli na ning maragul at makapagmulalang dapat a gewa mu para karela. Linigtas mu la ding memalen mu king Ehipto at tinabi ding paganung disnan da.

²²O GINU, gewa mu lang sarili mung memalen ding Israelita king kapilan pa man, at ika naman ing meging Dios da.

²³Ngeni, O GINUNG Dios, tuparan mu king sablang panaun ing pengaku mu kanaku at karing kanakung lahi, at daptan mu itang sinabi mu.

²⁴King anti kaniting paralan ya mirangal ing lagyu mu, at sabian da ring tau, Ing GINUNG Mayupaya ya ing Dios ning Israel. At maging matatag ya king arapan mu ing pamilya na ning kekang talasuyu king kapilan pa man.

²⁵Ika mu rin, O kanakung Dios, ing sinabi king gawan meng matatag ing pamilya ku, ing kekang talasuyu. Iti ing sangkan nung inya atin kung sikanan lub manalangin keka.

²⁶Ika, GINU, ing Dios, at ika ing mengaku a daptan mu la kanaku a talasuyu mu deting mayap a bage.

²⁷Inya bendisyunan me ing pamilya ku ba nang parating tatakman ing kekang kayapan. Ika, GINU, ing mamendisyun karela at manatili ing kekang bendisyun karela king kapilan pa man.