Read Kapampangan 1 Cronica 18 Bible Online

1 Cronica 18 - Kapampangan bible

1 Cronica 18

¹Kalabas da ring mapilan a panaun, lisuban na lang pasibayung David ding Filisteo, at simbut na la. Sekupan ne ing siudad ning Gat at ding baryung makapadurut kaniti.

²Simbut na la naman ding Moabita at meging ipus na la at memayad lang buis.

³Kaybat, lisuban neng David i Aring Hadadezer ning Zoba ning Siria malapit king sakup ning Hamat, uling buri neng pasibayung sakupan i Hadadezer ing matas nang dake ning Ilug ning Eufrates.

⁴Ikua na la namang David ding libung karung panggera, at abihag ding pitung libung sundalung pakasake kabayu, at ding aduang pulung libung sundalung e pakasake kabayu. Memili yang kabayu para karing dinalan a karung panggera na, at kaybat pemile na la ring mitagan.

⁵Inyang parala lang sundalus ding tau Siria ning Damasco ba reng saupan i Aring Hadadezer, inarapan na lang David at pete na la ding aduang pulu't aduang libung sundalus.

⁶Kaybat na nita, pepatalakad yang kampu na king sakup da at meging ipus na la at mamayad lang buis. Papagtagumpen ne ning GINU i David nu ya man munta.

⁷Dela na lang David king Jerusalem ding gintung kalasag a ikua na karing opisyal nang Hadadezer.

⁸Dakal ya naman ikuang tangsu king Tibhat at Kun, ding siudad a sakup nang Hadadezer. (Iti ing tangsung ginamit nang Solomon inyang pagawa yang kawa, asias, at aliwa pang kasangkapan para king bale ning Dios.)

⁹Abalitan nang Aring Toi ning Hamat king simbut na lang David ding sundalus nang Hadadezer.

¹⁰Inya tinubud ne ing anak nang i Joram ba neng dinan mayap a oras i Aring David uling simbut ne i Hadadezer a akalaban na namang Toi king dakal a pamakilaban. Migdala yang regalung megawa king gintu, pilak, at tangsu i Joram para kang David.

¹¹Telaga na lang David deti para gamitan king pamanyamba at ding pilak at gintung ikua na karing bansang simbut na antimo ing Edom, Moab, Ammon, Filistia, at ing Amalek.

¹²I Abisai a anak nang Zeruia mekapate yang labing walung libung tau Edom king Kapatagan ning Asin.

¹³Mitalakad yang kampu na king mabilug a sakup ning Edom, at meging sakup na lang Aring David ding memalen karin. Papagtagumpen ne ning GINU i David nu ya man munta.

¹⁴Mig-ari ya i David king mabilug a Israel, at pepatupad na ing hustisia at ing katuliran na ning metung at metung karing memalen na.

¹⁵I Joab a anak nang Zeruia ya ing gewa nang pekapun da ring sablang sundalus na; i Jeosafat a anak nang Ahilud ya ing gewa nang talaingat karing listahan;

¹⁶i Zadok a anak nang Ahitub at i Ahimelek a anak nang Abiatar ila ring tilduan nang pari; i Seraia ya ing kalihim;

¹⁷i Benaia a anak nang Jeoiada ya ing pekapun da ring Kereteo at Peleteo a pansarili nang guardiang David; at matas la katungkulan ding sablang anak nang Aring David.