Read Kapampangan 1 Cronica 28 Bible Online

1 Cronica 28 - Kapampangan bible

1 Cronica 28

¹Inutus nang Aring David karing sablang opisyal na ning Israel ing mitipun la king Jerusalem. Inya mitipun la king Jerusalem ding sablang opisyal da ring tribu, ding opisyal a mamahala king obra na ning kayarian, ding manimuna da ring balang pamilya, ding mamahala king pibandian at ding sese animal ning ari at ding anak na, ding opisyal ning palasyu, ding pikabaluan a opisyal da ring sundalus, at ding kagalang-galang a memalen.

²Tinalakad ya i David arapan da at ngana karela, Kapatad ku at kabalen, makiramdam kayu kanaku. Malasakit ku at nasa ing mitalakad metung a bale a pagkabilian na ning Kaban ning Kasunduan ning GINU at tuknangan na ning Dios. Sidia ku na ing sablang kailangan para kaniti bilang parangal king Dios,

³oneng ngana kanaku ning GINU, Aliwa ika ing patalakad king bale para king lagyu ku uling metung kang sundalus at dakal ing dayang pepatulu mu.

⁴Makanyan man, ing GINUNG Dios ning Israel pinili na ku at ing pamilya ku ban mag-ari king Israel king kapilan pa man. Ya ing memili king tribu na ning Juda ban maging pamuntuk ya, at keting tribu pinili ne ing pamilya nang tatang ku. At karing anak nang lalaking tatang ku, metula yang pinili na ku bilang ari na ning mabilug a Israel.

⁵Dininan na kung dakal a anak a lalaki, at kareting anak ku pinili ne i Solomon ban ya ing lukluk king tronu na ning kayarian ning GINU king mabilug a Israel.

⁶Ngana pa kanaku ning GINU, Ing anak mung i Solomon ya ing patalakad king kanakung bale at karing patyu uling ya ing pinili ku ban maging anak ku, at aku ing maging tata na.

⁷Gawan keng matatag ing kayarian na king kapilan pa man, nung isundu na lang pamintuan ding sablang kautusan ku ampon tuntunan, antimo ing daraptan na ngeni.

⁸Inya king daramdaman na ning GINU at niting kapulungan, ausan da kayu kapanamdaman king tuparan yu la sanang mitmung katapatan ding sablang utus na ning GINUNG kekatamung Dios ban manatili yang bandi yu iting mayap a gabun at aibie ye bilang mana karing anak yu king kapilan pa man.

⁹At ngana kang Solomon, Solomon, anak ku, kilalanan me sana ing Dios nang tata mu at suyuan me king mabilug mung pusu at king kaisipan at king mitmung katapatan, uling asasalugsugan na la ding sabla tamung isipan at kapagnasan. Siguradung akit me, nung panintunan me; nung lakuan me, lakuan na ka naman king kapilan pa man.

¹⁰Sukat mung tandanan king ika ing pinili na ning GINU ban patalakad king banal nang bale. Magpakatatag ka at daptan mu na itang sukat mung daptan.

¹¹Kaybat na nita, binie neng David kang Solomon a anak na ing planu da ring gusali na ning bale ning GINU, ding kamalig, ding aliwa pang kuartu, at itang Kabanal-banalan a Lugal nung nu la mipatawaran ding kasalanan.

¹²Binie na la naman ding sablang planung inisip na para karing patyu at ding kuartung makapaligid kareti, at ding kamalig para karing kasangkapan na ning bale ning GINU at ding regalu a mitalaga para king GINU.

¹³Binie na la naman ding planu tungkul king kaayusan da ring grupu da ring pari at Levita a sumuyu at magobra king bale ning GINU at ing pamaningat karing kasangkapan a gagamitan king bale ning GINU.

¹⁴Penabilin na ing timbang ning pilak at gintung gamitan king pamangawa karing kasangkapan,

¹⁵karing sulu at karing pitutumpakan-sulu,

¹⁶karing lamesang pilak, at para karing lamesang gintu nung nu la ibili ding tinape a miyain king Dios.

¹⁷Penabilin na naman ing timbang na ning gintung puru at pilak a gamitan king pamangawa karing tinidor, silyo, banga, at pinggan,

¹⁸at ing timbang ning gintung puru a gamitan king pamangawa king altar, nung nu ra dulukan ing insenso at ing pamangawa karing karwahe para karing kerubin a makaladlad a pakpak babo na ning Kaban ning Kasunduan ning GINU.

¹⁹Nganang David, Makasulat ngan iti king planu agpang king penabilin na kanaku ning GINU ban kekang tukian.

²⁰Ngana pang David kang Solomon, Magpakatatag ka at e mu painan ing lub mu. Daptan mu na itang sukat mung daptan at e mu paintulut ing sabatan na ka ning ninuman, uling ing GINUNG Dios a kanakung Dios patnubayan na ka. E na ka lakuan; matnube ya keka angga king apayari mu ing obra para king bale na.

²¹Mitakda naman karing grupu da ring pari at Levita ing obrang sukat dang gampanan king bale ning Dios. Makasadia na la namang magobra ding lalaking mangagaling a pangamat, ding sablang memalen at ding karelang manimuna. Pamintuan da ing nanumang iyutus mu karela.