Read Kapampangan 2 Cronica 32 Bible Online

2 Cronica 32 - Kapampangan bible

2 Cronica 32

¹Lipat ning katapatan a pepakit nang Hezekia, dinatang ya pa mu rin king Juda i Senakerib, ing ari ning Asiria; kibkuban na la ding siudad a pakapader ban alusub na la.

²Inyang abalitan na iting Hezekia,

³sinangguni ya karing pamuntuk na at karing opisyal militar, at pikayari da ing sabatan da ing agus ning danum lual ning siudad ban ala lang akuang danum ding Asiriano potang miras na la Jerusalem.

⁴Minaus lang dakal a tau at sebatan da la ring sablang batis at agus ning danum a lulual king karelang lugal ban ala lang akuang danum ding kalaban potang datang la.

⁵Pepalarin na la ning ari ding sirang pader a peka dipensa ning siudad at pepakabit yang tore at pepagawa ya namang aliwa pang pader king lual. Pekatibe ne ing Milo ning Siudad nang David. Pepagawa ya namang dakal a sandata at kalasag.

⁶Tinuldu yang opisyal militar ban manimuna karing lalaki ning balen. Tinipun na la king plasa arap ning pasbul dalan ning siudad. Migsalita ya karela ban pasiknangan no lub.

⁷Ngana, Magpakatatag kayu; e yu painan ing lub yu. E kayu sukat mitakutan o paisira lub king ari ning Asiria o karing sundalus a panimunan na uling ating metung a mas mayupaya a kayabe tamu kesa ketang karela.

⁸Takde la mung tau ding kayabe na, oneng ing kayabe tamu ya ing GINU tamung Dios. Ya ing sumaup kekatamu at ing makilaban karing kekatamung pamakilaban. Mesikan la lub ding tau uli na ning sinabi nang Hezekia.

⁹Kaybat ning mapilan a panaun, kabang atyu ya king Lakis i Senakerib at ding sundalus na, peparala na la ding tubud na king Jerusalem ban ipayabut ing amanu kang Aring Hezekia at karing memalen na ning Juda a atyu kanita king Jerusalem.

¹⁰Aku, i Senakerib, ing ari ning Asiria. Makiramdam kayu kanaku. Kibkuban da na kayu! Obat manatili kayu pa ken? Ninu ing panaligan yu?

¹¹Lilinlangan na kayu mung Hezekia neng sasabian nang iligtas na kayu ning GINUNG kekayung Dios king gamat ku ban kanita mate kayu king danup at kau.

¹²Aliwa wari i Hezekia mismu ing pepalasak karing altar at karing lugal a pisasamban, at ing minutus king metung nia mu ing pisasamban at ing pidadaunan ain?

¹³E yu wari balu ing depat ku at ding makatua ku karing aliwang tao? Aligtas da la ring dios da king gamat ko?

¹⁴Ninu kareting dios da ring bansang lesak da ring makatua ku ing mekapagligtas karela? Makananu na kayu ngening iligtas kanaku ning kekayung dios?

¹⁵Inya e kayu paipirait kang Hezekia, antimo ing gagawan na ngeni kekayu. E kayu maniwala keting tau uling alang dios ning ninumang bansa o kayarian ing malyaring makapagligtas karing tauan na karing gamat ku o karing makatua ku. Lalu na kayung e aligtas king gamat ku ning dios yu!

¹⁶Dakal la pa sinabi ding tubud nang Senakerib laban king GINUNG Dios at kang Hezekia.

¹⁷Atin ya pang sinulat i Aring Senakerib a maglapastangan king GINU, ing Dios ning Israel. Ngana ning sulat: Ding dios da ring bansa e ra la aligtas ding memalen da king gamat ku. Inya e na la naman aligtas ning dios nang Hezekia ding memalen na.

¹⁸Kilisak dang masikan iti ding tubud king salitang Hebreo karing memalen na ning Jerusalem a atyu lele da ring pader ban pamatakutan da la at painan a lub layun bihagan ing Jerusalem.

¹⁹Migsalita la tungkul king Dios ning Jerusalem a balamu mo wari kalupa de ring dios da ring aliwang bansa, ding idolo a gewa da ring gamat ding tau.

²⁰Inya menalangin ya i Aring Hezekia at i Isaias a propeta a anak nang Amoz at meniawad lang saup king Dios.

²¹Mitubud yang anghel ing GINU at gisan nong pete ding sundalus at ding opisyal nang Aring Senakerib. Migbalik yang mengapakarine ing ari ning Asiria king kayarian na. Misan a aldo, kabang atyu ya ketang templo ning dios na, pete de ring mapilan karing anak nang lalaki king kapamilatan da ring espada ra.

²²King anti kaniting paralan ne linigtas ning GINU i Hezekia at ding memalen na ning Jerusalem king gamat nang Senakerib a ari ning Asiria at karing aliwa pang kalaban. At mika kapayapan ya karing kasiping dang bansa.

²³Dakal lang tau ding memamunta king Jerusalem ban miyain ain king GINU at mangamal a regalu para kang Hezekia. Manibat na kanita kilala da neng mayupaya ding sablang bansa i Hezekia.

²⁴Kanita mu ring panaun a ita, mesakit ya i Hezekia at digsu nia mete. Menalangin ya king GINU at pekiramdaman na ne man at dininan neng metung a tanda king kumayap ya.

²⁵Oneng migmatas ya i Hezekia at e ya pepasalamat king Dios. Inya mimua ya ing GINU kang Hezekia at king Juda at king Jerusalem.

²⁶Oneng e miglambat migpakumbaba ya at sinising abe ding memalen na ning Jerusalem. Inya e digpa ing mua ning GINU king kayarian kabang mabie ya i Hezekia.

²⁷Meging mabandi yang mabandi at kagalang-galang i Hezekia. Pepagawa yang lugal a pisisinupan karing pilak na, gintu, mal a batu, pabanglu, kalasag, at aliwa pang mangamal a bage.

²⁸Pepagawa ya namang mangaragul a kamalig ban pipagponduan karing pupul na a binutil, king bayung alak ampon larung olibo. Pepagawa ya namang kural para karing miyayaliwa nang sese animal antimo ding baka at tupa.

²⁹Pepatalakad yang dakal a siudad uling dininan neng dakal a tupa at baka at pibandian ning Dios.

³⁰Ya mu rin i Aring Hezekia ing sinabat king agus ning danum ning Gihon king dane matas, at pepayagusan na papunta king kilub ning Siudad nang David. Migtagumpe ya i Hezekia king sabla nang depat.

³¹Agyang inyang dinatang la ding tubud ning Babilonia ban mangutang tungkul king makapagmulalang malilyari king kayarian, likuan ne ning Dios ban subukan ne nung nanu ing gawan na at ban abalu na ing laman ning pusu na.

³²Makasulat king Vision[44] ning Propeta Isaias a anak nang Amoz at king Istoria da ring Ari ning Juda at Israel ing sablang mayap a depat nang Aring Hezekia pati ing dakal a kayapan a pepakit na.

³³Mete ya i Hezekia at mikutkut ketang dane matas nang lugal ding kutkutan da ring ari. Perangalan de ring sablang memalen na ning Juda at Jerusalem inyang mete ya. I Manase, ing anak na, ya ing menalili bilang ari.