Read Kapampangan Tobit 13 Bible Online

Tobit 13 - Kapampangan bible

Tobit 13

¹Nganang Tobit: Purian ya ing Dios a mabie at mag-ari kapilan man.

²Mamarusa ya at papakit lunus; darala na lang tau king malalam a kutkutan, at lalako king maragul a kasiran. Ala metung mang makatakas king kayupayan na.

³Ikong memalen a Israelita libutad da ring bansa nung nu na kayu inugse, pasalamatan ye king daramdaman da.

⁴Karin ing kayupayan na kekayu pepakit na. Purian ye king akakit ding sabla, uling ya ing Ginu at Dios; ya ing Ibpa at ing Dios tamu king alang angga.

⁵Perusan na kayu uli ning kekong dapat a e ustu, oneng keko ngan ipakit na ing lunus na. Ibat karing bansa, nung nu na ko kinalat tipunan na kayu.

⁶Nung mibalik kayu king mabilug yung pusu't kaladua, at manatiling tapat, kanita kekayu mibalik ya, at e na ne isalikut pa kekayu ing lupa na. Ganakan yu la ngeni ding depat na kekayu, at king masikan a siwala munie kayung kapasalamatan king Ginu. Purian ye ing Ginung e mangabiran, at purian ing Aring alang kayangganan. Munie kung kapasalamatan king Ginu king bansa nung nu ku miyugse, at kakung sabian ing sikanan na at kayupayan king bansang makasalanan. Ikong darapat kasalanan, magbalik na ko ngan king Ginu, daptan yu itang matulid king akakit na. Marahil malunus ya at tanggapan na kayu.

⁷Kaku yang purian ing Dios, at tumula king Ari ning banua.

⁸Paburen lang tau ban isalita ing kamalan na, at pasalamat king Ginu karin king Jerusalem.

⁹O Jerusalem, Banal a Siudad, parusan na ka uli ding depat da ring kekang anak, oneng pasibayu yang maging malunusan karing makatuliran.

¹⁰Pasalamatan ye ing mayap a Ginu, at purian ing Aring alang kayangganan. Pasibayu yang mitalakad ing kekong Templo ban tumula kayu. Sana dinan na lang kaligayan ding taung miyugse karing aliwang lugal, at lingapan na la sana ding sablang atyu king kalungkutan, at ding kekong maging anak karing panaun a daratang.

¹¹Sunlag yang masala ing kekang sulu karing sablang bansa na ning yatu; ding dakal a marayung bansa datang la keka; ibat karing sablang suluk ning yatu datang la king banal mung lagyu; karing karelang gamat atin lang daralan a regalu ban ibie king Ari ning Banua. Karing kekang dalan dakal lang salising lahi ding magkanta kekang kapurian; manatili ya kapilan man ing kekang lagyu bilang siudad a pinili ning Dios.

¹²Detang magsalitang e karampatan keka misumpa la, pati na detang manlasak keka, at karing pader mu't tore mandagsa, at manyilab karing kekang tuknangan. Oneng detang keka parangal mibendisyunan la king kapilan man.

¹³Sukat kang tumula, Jerusalem, uli ding kekang taung makatuliran ibat king bansa nung nu la miyugse kaku lang tipunan ban ing Ginu karela yang purian, ing Dios a alang kayangganan.

¹⁴Masaya la ngan detang keka malugud, at matula king kekang kanawan; detang tatangis ngeni uli ning kasakitan a digpa keka; tumula la keka at king kapilan pa man akit da ing kekang tula.

¹⁵Kaku yang purian, ing Aring mitmung kayupayan

¹⁶uling mitalakad neng pasibayu ing Jerusalem ban yang maging tuknangan na king kapilan pa man. Jerusalem, tune maging maligaya ku potang ding kakung maging lahi akit dang kekang kamalan, at king Ari ning Banua munie lang kapasalamatan. Ding kekang pasbul dalan magawa la karing iyas a safiro at esmeralda, at ding kekang pader karing batung mangamal. Magawa lang kekang tore king gintu, at ding kekang kuta king purung gintu.

¹⁷Ding kekang dalan karing rubi at iyas a mangamal karin la mipalamutian.

¹⁸Karing pasbul mung dalan maramdam ing masayang kantahan, at karing sablang kekang bale mikulisak: Purian ya ing Ginu! Purian ya ing Dios ning Israel! Jerusalem, bendisyunan no ning Dios ding kekang memalen, at ila naman karela yang purian ing lagyu nang banal king kapilan pa man. Kareting amanung deti ne pinupus Tobit ing kanta nang kapasalamatan.