Read Kapampangan Tobit 3 Bible Online

Tobit 3 - Kapampangan bible

Tobit 3

¹Mipakarine ku at meligalig; mipakiak kung masikan at sasaingsing kung menalangin. Ngaku:

²O Ginu, makatuliran ka at malunusan. King sablang kekang daraptan, mapaglunus ka, tapat ka, at e mangabiran; ika ing ukum niting yatu.

³E mu ku sana kakalinguan, lawan mu ku at lunusan; e mu ku sa paparusan uli ding kakung kasalanan o ding kamalian a e ku sasarian o ding kasalanan ding kakung makatua.

⁴Lebagan da lang kekang kautusan, inya peintulut mu ing mabihag la at magdusa, at mete ding dakal karela. Nu mang bansa ke miyugse kaylian da kami at pagsisti digpa kekami ing maragul a dine.

⁵Kaku lang kikilalanan ding babie mung kaparusan kaku at karing kakung makatua, uling tune lang mangaintuliran at e mi la pemintuan ding kekang kautusan.

⁶Daptan mu kaku itang buri mu, paburen mung mawala na ining bie ku, paburen mung king gabun magbalik na ku. Mas buri ku ing mete na ku kesa king mabie ku, uling ing insultu a e karampatan kakung daramdaman, at atyu ku king kalungkutan. Ginu, mutus ka ban milako na ku king dusa paburen mung muli na ku ketang alang anggang tuknangan. O Ginu, keka sanang pakiramdaman kakung kayaduanan. Mas buri ku ing mate na ku kesa king mie ku kening karumaldumal a kabilian, at kakung daramdaman a insultu.

⁷King aldo mu ring ita, king siudad ning Ecbatana, Media, ating metung a dalaga. Sarah ing lagyu na; anak neng Raguel. Lepastangan ne ning metung karing ipus nang babaing tata na

⁸uling pitung besis neng mekiasawa i Sarah, oneng bayu ra akuang mikasal apate na na la ning demonyung i Asmodeo. Ngana kang Sarah ning babaing ipus nang tata na, Ika ing mekamate karing asawa mu! Pitu na lang meging asawa mu oneng ni metung alang mebie ban adinan na kang anak.

⁹Ba't ikami ing pagbuysitan mu? Mayap pa ing mate na ka ban akayabe mo ding mete mung asawa! Sana kapilan man e ke manakit anak mu!

¹⁰Tune yang melungkut i Sarah inya mipakiak ya at menik ya babo king kuartu ning bale nang tata na ban magbigti. Oneng migbayu ya isip. Ngana king lub na, Ba't magbigti ku? Siguradung lapastanganan de ring tau i tata ku nung daptan ku ita. Sabian da, Bugtung ya ing anak mung pakamalan at migpakamate ya pa uli da ring problema na. Anti na mong aku ing mitulak kang tata ku king kutkutan ketang ketuan na. Mayap pa ing aduan ku king Ginu ing paten na na ku ban ala na lang lalapastanganan ding tau.

¹¹Kanita tinalakad ya i Sarah arap ning awang; tinas na la ding gamat na ban manalangin. Ngana: O Dios a malunusan, karapatdapat kang purian, dapat yang purian ing kekang lagyu; sablang kekang lelangan ika sana ing karelang purian king kapilan pa man.

¹²O Ginu, lalapit ku kekang maniawad saup.

¹³Mutus ka mu at maging malaya[5] ku, at kanita e ku na damdaman ing pamaglapastangan ding tau.

¹⁴Balu mu, Ginu, king angga ngeni birhen ku pa; ala pang lalaking mekatagin kaku.

¹⁵Kapilan man e ke sinira ing lagyu ku o ing kang tata ku keting bansa nung nu ke miyugse. Aku mu ing kabubugtungan nang anak; ala yang aliwang talapagmana o kamaganak a maging kakung asawa. Pitung besis na kung mebalu, inya ala neng kwenta ining bie ku. Nung e me pa buring kuanan ing bie ku, sana malunus na ka man kaku. E mu na sana paintulut pa ing damdaman kung pasibayu ing pamaglapastangan ding tau.

¹⁶Kabang manalangin ya i Tobit at i Sarah, ing Dios king banua makiramdam ya.

¹⁷Inya tiburan ne ing anghel nang i Rafael ban saupan la. Mituburan ya i Rafael ban ilako ne ing maputing tatakap karing mata nang Tobit ban manakit yang pasibayu, at ban ayusan ing kasal nang Sarah kang Tobias a anak nang Tobit. Pisan neng Tobias i Sarah inya atin yang matulid a pakasalan ne. Mituburan ya naman i Rafael ban itabi ne ing demonyung i Asmodeo a manligalig kang Sarah. King penandit mu ring ita, kabang palako ya i Tobit king patyu ban muli bale na, i Sarah a anak nang Raguel titipa ne man king bale ra.