Read Kapampangan Tobit 4 Bible Online

Tobit 4 - Kapampangan bible

Tobit 4

¹King aldo mu ring ita, aganaka na lang Tobit ding salaping pilak a penilas na kang Gabael ning Rages king Media.

²Ngana king lub na, Anti na ning inawad ku na king Dios ing mate na ku, kailangan ing pakisabian ku ne ing anak kung i Tobias tungkul karetang salapi.

³Inya pepayaus ne i Tobias at inyang atyu ne ngana, Tobias, potang mete na ku, ayusan mu sanang masalese ing pangakutkut ku. Igalang me i ima mu at e me paburen kabang mabie ya. Gawan mu ing buri na at e me pasukalan a lub.

⁴E me sa kakalinguan, anak ku. Ganakan mu ing sinubu ne ing bie na ban ibait na ka keting masala. Potang mate ne ikutkut me siping ku.

⁵E me kakalinguan ing Ginu kabang mabie ka. E ka sana darapat nanumang e ustu o labag karing kautusan na. Kabang atin kang inawa pagsikapan mung e painabu king e mayap.

⁶Magkapilit kang maging tapat at magtagumpe ka king nanumang daptan mu.

⁷Maging maganaka ka karetang tapat mamintu king Dios. E ka maimut kareng kalulu ban e ya maimut keka ing Dios.

⁸Munie ka agpang ketang atyu keka. Nung kapilan darakal ing pibandian mu kanita ka lalung babie dakal. Munie ka mu rin agyang ditak mu ing atyu keka.

⁹King dapat a anti kanyan atin na kang pibandian a kekang kailangan potang miras ka king oras ning kagipitan.

¹⁰Metung yang katanggap-tanggap a ain king Kakataskatasan a Dios ing pamamie limus. Gawan mu iti at mipangilag ka king maralumdum dang kabilian ding mete.

¹²Anak ku, pangilagan mu la deng babaing mababa uri.[6] Makiasawa ka king babaing kayabe tamu king tribu tamu, uling ibat tamu king lahi da ring propeta. E ka makiasawa king e tamu kamaganak. E mo sana kakalinguan di Noe, Abraham, Isaac, at Jacob a mekiasawa karing kamaganak da. Inya naman dininan na lang dakal a anak ning Dios. Ding anak da ilang magmana king gabun ning Israel.

¹³Uli na niti, pakamalan mu la ding kamaganak tamu. E mo pagmaragulan deng kamaganak tamu. Mamili kang metung karela ban maging asawa mu. Uling ing pamagmaragul mamungang kaguluan at kasiran; mengari ya king katamaran a pasari king kakaluluan at danup.

¹⁴Bayaran mu lang agad ding makipagobra keka; e mu pibukas-bukas ing upa ra. Makanyan meng suyuan ing Dios at ya ing munie galal keka. Anak ku, kapilan man e ka sana magaslo kilus at ugali.

¹⁵E mu sana daraptan kareng aliwa itang e mu buring daptan da keka. E ka paisubu keng pamaninum alak ban e maging bisyu keka ing pamaglasing.

¹⁶Pakanan mu la deng danupan at paimalanan deng alang imalan. Nung atin ka, munie kang matula.

¹⁷Nung ating mete mayap a tau, magsadia kang pamangan para karing meulila na,[7] oneng e mu daraptan potang e ya mayap a tau ing mete.

¹⁸Maniawad kang saup kareng biasa at e mu gagawan biru ing ituru da a makakayap keka.

¹⁹Parati meng purian ing Ginung Dios at aduan mu ing bendisyunan na king sablang buri mung gawan. E na babie ing kabiasnan king balang bansa; bukud mung ing Ginu ya ing makaibie king sablang mayap. Nung buri neng ibaba ing tau, iti arapat na, at nung buri neng ibaldug king kutkutan, iti arapat na naman. Uli na niti, anak ku, e mu la sa kakalinguan ding amanung sinabi ku keka. Itanam mu la king isip mu.

²⁰Tobias, buri kung abalu mu king atin kung penilas a maragul a alagang salapi kang Gabael a anak nang Gabeo ning Rages king Media.

²¹E ka sana malungkut uli mong pakakalulu tamu. Oneng mibandi ka nung atin kang takut king Dios at e darapat kasalanan at daptan itang katanggap-tanggap king Dios.