Read Kapampangan Tobit 6 Bible Online

Tobit 6 - Kapampangan bible

Tobit 6

¹Meko ya i Tobias at ing anghel at tinuki ya karela ing asu nang Tobias. Disnan na la ning bengi king paglakbe ra king Media, at pepalabasan de ing bengi king lele ning Ilug ning Tigris.

²Dinulung ya king ilug i Tobias ban manos bitis, oneng bigla yang linundag ing metung a maragul a asan at buri neng akmulan a bitis i Tobias. Kinulisak ya i Tobias.

³Ngana ning anghel, Tikma me at pakatalnan at e me paburen mabubulus! Inya tinikma neng Tobias ing asan at sinaka ne king pampang.

⁴Ngana ning anghel, Gilian me at kuanan ing atdu, ing pusu, at ing ate na, at kaybat isikap mu la uling masanting lang panulu ren. Iyugse mu ing aliwang laman lub ning asan.

⁵Inya gili neng Tobias ing asan at kinua na at sinikap ing atdu, ing pusu, at ing ate ning asan. Kaybat linutu ne ing asan at pengan. Dinaing na ing aliwang dake ning asan ban bakalan da. Tiglus da ing paglakad da angga king miras na lang malapit king Media.

⁶Kanita nganang Tobias king anghel a kayabe na, Abe,[10] nanung sakit ing aulu na ning pusu, ate, at atdu ning asan?

⁷Pekibat nang Rafael, Dulukan ya ing pusu at ing ate ning asan at gamitan ban itabi ya ing demonyu o ing e mayap a espiritung manligalig king tau. Tuknang neng manligalig kanita at mipayapa ne ing tau.

⁸Gamitan ya ing atdu bilang panulu king mata a ating tatakap a maputi. Ikuskus me king mata at kaybat labulan me ing tatakap a maputi king mata na, at manakit neng pasibayu ing taung e manakit.

⁹Inyang miras na la king bansa ning Media at malapit nang miras king siudad ning Ecbatana,

¹⁰migsalita ya i Rafael. Ngana, Tobias. Nanung buri mu? nganang Tobias. Pekibat nang Rafael, Makitudtud kata ngening bengi king kamaganak mung i Raguel. Metung ya mu ing anak na; babai ya at ing lagyu na Sarah.

¹¹Ika ing pekamalapit nang kamaganak, inya atin kang matulid a pakasalan me at magmana king pibandian nang tata na.

¹²Maisip ya i Sarah, matapang ya at tune yang malagu; at tau yang kagalang-galang i tata na. Pakisabian ke ngening bengi i tata na tungkul keka ban paintulut nang ayasawa me ing anak na. Pamagbalik tang ibat king Rages, kanita na ing kasal. Pihung mabisa ya i Raguel uling balu na king ika ing ating matulid a maging asawa na ning anak na. Nung pakasal ne king aliwa pihung miyatulan yang kamatayan, agpang king Kautusan nang Moises. Inya makiramdam ka kanaku. Manik kata bale potang bengi at kayabe ta ne potang muli ta nang ibat king Rages.

¹³Kanita nganang Tobias kang Rafael, Azarias, miras na kanaku ing balita king pitu na la ding meging asawa nang Sarah, at pawa la ngang mete king kabengian ning karelang kasal.

¹⁴Abalitan ku king demonyu ya ing mekamate karela. Inya tatakut ku uling papaten ne ning demonyu ing ninumang lalaking lalapit kang Sarah. Oneng e ne nananan a balang i Sarah. Aku mung bukud ing anak da ring pengari ku, at nung mate ku anti na mong aku ing mitulak karela king kutkutan da. Ala kung kapatad a mangutkut karela.

¹⁵Nganang Rafael, Kelinguan mu na ata ing panabilin nang tata mu keka? Penabilin na keka king makiasawa ka king metung karing kamaganak mu. Makiramdam ka kanaku at kalinguan me itang demonyung ita. Pakasalan me i Sarah uling ngening bengi paintulut nang tata na ing mikasal ya keka.

¹⁶Potang lungub ka king silid nang Sarah idala me ing ate at ing pusu ning asan, at kaybat ibulug mu la king maduduluk a insenso.

¹⁷Kumalat kanita ing bau at mako ya ing demonyu kabud abau na, at e ne magbalik kapilan man king siping nang Sarah. Oneng bayu kayu magkera talakad kayu at manalangin. Aduan yu king Ginu ing malunus ya sa at iligtas na kayu. E ka tatakut uling mitakda ya para keka i Sarah bayu ya pa melalang ing yatu. Iligtas me king demonyu at tuki ya kekang muli. Mika anak kayung dakal at maging mal la keka deting ayanak yu. Inya e ka sukat migaganaka! Pegaralan na at pibulayan masalese Tobias ing sinabi nang Rafael. Peniwalan na king tune neng kamaganak kang tata na i Sarah. Uli na niti, mengatmu yang lugud kang Sarah at telaga na ing sarili na ban ayasawa ne.