Read Kapampangan Tobit 8 Bible Online

Tobit 8 - Kapampangan bible

Tobit 8

¹Inyang mekapangan na la ngan at mekainum at oras na ban magkera, tiki de ring pengari nang Sarah i Tobias at tiru de ing kuartung pitudturan na at i Sarah.

²E na kelinguan Tobias ing panabilin nang Rafael tungkul king ate at pusu ning asan. Inya kinua na la deti king pidatukanan na at inabe king maduduluk a insenso.

³Ing bau ning ate at pusu ning asan ya ing mitabi king demonyu at tinakas yang minta king Ehipto. Penagal neng Rafael at arakap ne karin at ginapus ding gamat na at bitis.

⁴Inyang ila na namung adua ding bayung kasal at makasara ya ing pasbul, mibangun ya i Tobias at ngana kang Sarah a asawa na, Mibangun ka kakung pakamalan at manalangin kata. Aduan ta king Ginu ing malunus ya kekata at ingatan na kata.

⁵Mibangun ya i Sarah at kaybat nganang menalangin Tobias kabang makatalakad la: O Dios da ring makatua mi, karapatdapat kang pasalamatan, pupurian mi ya ing lagyu mu king kapilan pa man. Pupurian da ka ring sablang kekang lelangan.

⁶Keka yang lelang i Adan, at binie me i Eva ban maging katambayan na, at ila ding meging pengari da ring sablang tau ning yatu. Sinabi mu, E mayap ing magdili-dili ya ing tau; igawa keng karapatdapat a katambayan na a kalupa na.

⁷Tatanggapan ke ngeni bilang asawa kung pakamalan, e uli ning pita ning laman nune king tune pamiyasawa. Ibie mu kekeng adua ing kekang lunus, at e ke sa mikawani angga king tumua kami.

⁸Ngarang agnan sinabi: Amen.

⁹Kaybat na nita metudtud na la. King bengi mu ring ita, mibangun ya i Raguel at inaus na la ding ipus na. Kayabe na lang linual ban gawang kulkul a pikutkutan mete.

¹⁰Nganang mimisip Raguel, Mete ya naman siguru i Tobias at pihung gawan da keng pikaylian ding tau.

¹¹Inyang meyari na lang kinulkul, mibalik ya king bale i Raguel at inaus ne ing asawa na at sinabi na,

¹²Edna, tuburan me ing metung karing babaing ipus at palawe mu nung mabie ya pa i Tobias. Nung mete ne, ikutkut ta ne ban alang makabalu.

¹³Sinindi yang sulu i Raguel at binie ne king babaing ipus at biklat ne ing pasbul. Sinabi na king ipus king lungub ya king kuartu, at ikit na lang maniaman a tudtud ding bayung miyasawa.

¹⁴Linual ya ing babaing ipus at nganang memalita, Mabie ya pa pu i Tobias at e ninanu balang.

¹⁵Kanita pinuri ne at pesalamatan Raguel ing Dios a atyu banua. Ngana: Pasalamatan da ka, O Dios, king mabilug kung pusu. Paburen mung king kapilan pa man ing purian da ka ding sablang tau.

¹⁶Pasalamatan da ka uli ning binie mung tula kaku; pupurian da ka uling e milyari itang pitatakutan ku, nune pepakit mu kekami ing maragul a lunus mu.

¹⁷Ing kapasalamatan babie ku keka, uli ning lunus a pepakit mu kareting bayung miyasawa, deting kabubugtungan a anak da ring pengari da. O Ginu, lunusan mu la at iligtas pa, at dinan bie makaba a mitmung lugud at saya.

¹⁸Kaybat nang menalangin, inutus na lang Raguel ding ipus ban tambunan da ne ing kulkul bayu datang ing abak.

¹⁹Kaybat na nita, pekisabian neng Raguel ing asawa na king maglutu yang dakal a tinape. Kinangwa ne mang aduang baka at apat a lalaking tupa ban papulkeru karing ipus para king maragul a anda ning kasal.

²⁰Inaus ne i Tobias at ngana, Tobias, manatili ka pang aduang dominggu keti. E ka mamako. Minum kata at mangan at paligayan me ing asawa mu ban makalinguan na ing delanan nang kasakitan.

²¹Kaybat, kuanan mu na ing kapitna king pibandian ku at muli na kayung payapa at alang kasasagkulan karing pengari mu. Miyabie keka ing mitagan a kapitna potang mete na ku at ing asawa ku. E mu sa pagdudan ing lugud mi keka. Anak da na ka namang kalupa nang Sarah. Matua mu na kami naman. Inya e ka sa migaganaka.