Read Kapampangan Tobit 9 Bible Online

Tobit 9 - Kapampangan bible

Tobit 9

¹Inaus neng Tobias i Rafael at ngana,

²Azarias, puntalan me king bale na i Gabael ning Rages. Mituki kang apat a ipus at aduang kamelyu. Ibie me iting kasulatan kang Gabael ba na lang ibie keka ding salaping penilas nang tata ku keya. Kaybat kumbiran me at ituki king anda ning kasal ku.

³E makalingad keka king bibilangan na lang tata ku ding aldo angga king makapagbalik ku. Pihung e ya mipaindatun agyang metung mung aldo, nung mayantala ku.

⁴Balu mu munaman king buri na ning katuangan kung i Raguel ing manatili ku pa keti, at makarine naman nung e ke pamintuan.

⁵Inya minta ya i Rafael at ding apat a ipus king Rages ning Media, at tinaglus la king bale nang Gabael. Binie neng Rafael kang Gabael ing kasulatan, at belita na king makiasawa ya i Tobias at kukumbiran neng tumagun king kasal na. Memalagua na lang binilang Gabael ding suput ding salapi a e bitasang metagin at seke na la karing kamelyu.

⁶Inyang mikabukasan na, maranun lang meko ban e mitauli king kasal. Inyang milub na la di Rafael at Gabael king bale nang Raguel, ikit de i Tobias libutad ning kasayahan. Agad-agad neng lepitan i Gabael inyang ikit ne at kinomustan ne. Tutulu ing lua nang Gabael inyang atuan ne i Tobias at ngana, Tobias, mayap kang anak; tune anak na ka pin ning marangal a tatang a mapaniapat mayap. Bendisyunan na ka sa ning Ginu at antimu rin ing asawa mu, ding katuangan mu, at pengari. Pasalamatan ke ing Dios uling mikit kata a kamaganak ku. Kalupa na kang tata mu.