Read Kapampangan Judith 1 Bible Online

Judith 1 - Kapampangan bible

Judith 1

¹Kanitang kalabing aduang banua na ning pamag-ari nang Nebucadenesar karing tau Asiria king sentrung siudad ning Nineve, i Arfaxad naman ya ing sasakup karing tau Medes king siudad ning Ecbatana.

²Pepabakud neng pader Aring Arfaxad ing mabilug a siudad karing tinabas a batung apat at kapitnang talampakan king kapal at siam a talampakan king kaba. Dinalan at lima yang talampakan king katas at pitung pulu't lima yang talampakan king kapal ing pader.

³Pepagawa yang tore a dinalan limang pulung talampakan king katas king balang pasbul dalan a ating pundasyun siam apulung talampakan king kapal.

⁴Dinalan at lima yang talampakan king katas at anam apulung talampakan ya king lualas ing balang metung karing pasbul dalan ban mayan lang lumual at lungub ding sundalus.

⁵Kanitang panaun a ita, mekilaban ya i Aring Nebucadenesar kang Aring Arfaxad ketang malualas a kapatagan a sakup ning Rages.

⁶Dakal lang bansa ding sinaup kang Aring Arfaxad; seupan de ring manuknangan karing bunduk-bundukan, ding taung manuknangan king lele da ring ilug Eufrates, Tigris, at Idape, at pati na ding manuknangan karing kapatagan a sakup nang Ariok, ing ari ding Elamita. Dakal la ding bansang mekiabe kaniting labanan.

⁷Kanita pepadala yang mensahi i Aring Nebucadenesar karing tau Persia at karing taung manuknangan dane albugan, ding tau Cilicia, Damasco, Lebanon, at Antilebanon, at karing sablang manuknangan lele ning dagat.

⁸Miras ya naman ing mensahi na karing tau Carmel, Gilead, karing taung manuknangan dane norti ning Galilea, at karing atyu king malualas nang Kapatagan ning Jezreel.

⁹Pepadala ya namang tubud karing tau Samaria, karing makapaligid nang siudad ning Samaria, at king dane albugan ning Jordan angga king Jerusalem, Betania, Kelus, Kades, at Ilug ning Ehipto. Miras la naman ding tubud na king Tapanhes, Rameses, at king sakup ning Gosen,

¹⁰Tanis, Memfis, at karing sablang memalen ning Ehipto angga na king angganan ning Etiopia.

¹¹Oneng e ra pinsinan ding sablang taung manuknangan kareting mesabing lugal ing kapaniausan nang Aring Nebucadenesar. E la bisang makiabe king ari king pamakilaban at e la naman tatakut king ari uling balu ra king magdili-dili nia mu. Inya minuli lang marine at ala lang agawa ding mituburan.

¹²Uli na niti, mikalabkab ing mua nang Nebucadenesar at pengaku na king mablas ya karing sablang tau Cilicia, Damasco, at Siria; gisanan na la ngang paten king tabak ding tau Moab, Ammon, ing mabilug a Juda, at ding manuknangan king Ehipto at pati na ding manuknangan lele da ring aduang dagat.

¹³Kanitang kalabing pitung banua na ning pamag-ari nang Nebucadenesar, penimunan na la ding sundalus na laban kang Arfaxad. Mesambut ya king labanan i Arfaxad. Simbut na lang Nebucadenesar ding sundalus na at pati na ding pakakabayu at pakakarwahe.

¹⁴Sekupan na la ding siudad ning Media. Kaybat na nita, tinaglus ya king Ecbatana. Abihag na la ding tore ding pader, gisan na la laman ding palengki, at lesak ne ing malagung siudad.

¹⁵Arakap ne i Aring Arfaxad karing bunduk a makapadurut Rages, at pete ne king kapamilatan na ning sibat.

¹⁶Kaybat na nita, mibalik ne i Nebucadenesar at ding sundalus na pati na ing ikua da king Nineve. Karin la migpakasikan pasibayu at migpiesta kilub ding apat a bulan.