Read Kapampangan Judith 14 Bible Online

Judith 14 - Kapampangan bible

Judith 14

¹Kanita nganang Judith karing memalen, Kakaluguran, makiramdam kayu kanaku. Kuanan ye ing buntuk nang Holofernes at ibitin ye king lual ning pader.

²Potang saslag ne ing aldo, ing metung at metung kekayung masikan a lalaki kuma yang sandata na at lumual ya king siudad. Mamili kayung manimuna kekayu, at kaybat pakit yung pupunta kayu king kapatagan ban lusuban la ding kalaban a sundalung Asiriano, oneng e kayu kukuldas king bunduk-bundukan.

³Kuanan da la kanita ding Asiriano ding sandata ra, at mulaying munta king kampu ra ban gisingan da la ring pamuntuk da. Munta no man deting pamuntuk king tolda nang Holofernes oneng e re akit. Kanita na la mangalitu at mamanakas.

⁴Tagalan yu la kanita, ikayu at ding sablang manuknangan kilub ning angganan ning Israel. Paten yu la ngan ding atagal yu.

⁵Bayu yu daptan yan, idala ye pa keni kanaku i Akior, ing tau Ammon, ban akit ne at kilalanan ing buntuk ning lalaking meninsultu king Israel at minisip king mate yang kayabe tamu i Akior.

⁶Inya dinakit de i Akior king bale nang Uzzia. Inyang datang ne ikit ne ing buntuk nang Holofernes a tatalnan na ning metung karing memalen; mewalan yang male tau at mipase ya king gabun.

⁷Tinikdo re oneng migsakab ya arap nang Judith bilang pamamie galang at ngana, Mananu na sanang purian na ka ning balang pamilya king bansa ning Judea, at mananu na sanang galgal ya king takut ing balang bansa kabud damdaman de ing lagyu mu.

⁸Malyari mung sabian kanaku ngeni ing depat mu karing milabasan a aldo? Inya king daramdaman da ring tau, sinabi nang Judith ing sablang depat na manibat na inyang meko ya angga na king penandit a babie yang balita karela.

⁹Kayari nang migsalita, kinulisak la king tula ding memalen. Mengatmu yang tula ing mabilug a siudad.

¹⁰Inyang dimdam nang Akior ing sablang depat ning Dios, meging metung ya karing talasalpantaya king Dios ning Israel. Mesirkunsisyun[18] ya at meging miembru king balayan ning Israel. Meging miembru la naman ding lahi na angga ngening kasalukuyan.

¹¹Kabukasan, inyang sinlag ne ing aldo, binitin de ing buntuk nang Holofernes king lual ning pader ning siudad. Kaybat, ing metung at metung karing lalaki kinangwa yang sandata at grupu-grupu lang minta king katalindikingan na ning bunduk.

¹²Inyang mayakit la karing sundalung Asiriano agad-agad dang pepabalu iti karing opisyal da. At deti naman minta la karing pamuntuk da.

¹³Minta no man deting pamuntuk king tolda nang Holofernes at ngara kang Bagoas, Gisingan me ing heneral! Magtangka lang lumusub kekatamu ding Israelitang ipus. Ila nang manintun ngeni king kamatayan[19] da.

¹⁴Linub ya king tolda i Bagoas at inaus ne ing panginuan na a isipan nang matudtud pang kasiping nang Judith.

¹⁵Inyang alang mekibat, linele ne ing tabing; linub ya at ikit ne ing mete a alang buntuk a makapase lele ning bangkito.

¹⁶Kinulisak yang masikan; menangis ya at menagulele at ginabak ing susulud nang imalan uli na ning lungkut na.

¹⁷Kaybat minta ya king tolda nang Judith. E ne ikit i Judith, inya linual ya at nganang kinulisak karing tau,

¹⁸Alinlang da katamu ding ipus! Dininan neng maragul a kamarinayan ning metung a babaing Hebreo ing kayarian nang Nebucadenesar. Atyu king kilub ning tolda ing bangke nang heneral Holofernes, oneng ala yang buntuk!

¹⁹Inyang dimdam de ring pamuntuk da ring sundalung Asiriano, ginabak da ing susulud dang imalan uli ning kalungkutan. Mika kaguluan king kampu at meramdam ing masikan a kulisakan at tangisan.