Read Kapampangan Judith 16 Bible Online

Judith 16 - Kapampangan bible

Judith 16

¹Kanita i Judith migkanta yang metung a kanta ning kapurian at kapasalamatan king Dios, at pekiabayan deng mitmung tula ding sablang Israelitang atyu karin.

²Ngana ning kanta nang Judith: Magkanta kayung kapurian king kakung Dios. Keko yang pasalamatan; tigtigan lang tambul at pompiang. Gawa kayung bayung kanta; parangalan ye at maus king lagyu na.

³Uling ing Ginu ya ing Dios a maglako king gera; linigtas na ku karing kalaban, at binalik king balen na.

⁴Ibat king norting kabundukan dinatang lang Asirianong kalaban, at ding laksa-laksa rang sundalus. Karela lang sebatan ding ilug at ding kapatagan; mitakpan lang kabundukan uling tutu lang dakal ding karelang pakakabayung sundalus.

⁵Buri deng silaban ing kekatamung bansa, at paten ding kayanakan; pati anak karela lang durugan at bihagan; ding babai naman buri da lang salbahian.

⁶Oneng lininlang na la ning Ginung Mayupaya; ginamit ne ing metung a babai ban kalaban e la magwagi.

⁷E ya mete ing karelang pamuntuk king gamat ding kayanakan a sundalus; aliwa ding matapang ding mekapabagsak o tinabtab king batal na nune i Judith, ing babai a anak nang Merari. Ginamit nang Judith ing lagu na, at pamuntuk ding kalaban metabtab ya batal.

⁸Ban magtagumpe ya ing Israel a balen, likas nang Judith ing paldas nang imalan, at miniblas yang imalan a linen; migpabanglu ya at tinali neng lasu ing buak na ban kalaban tuksuan na ya.

⁹Kareta mung sandalyas nang makasulud, megayuma neng kalaban at pusu na bihag ne ning lagu nang tagle; kaybat nita, tibtab ne batal ing kalaban.

¹⁰Uli ning tepangan na, ginalgal la king takut ding Persianong dakal; ding tau Medes misdan no man.

¹¹Kanita ding mipasakitan kung kabalen king tula migbiba la uli ning pangakabus da; at tinakas lang kalaban.

¹²Ding anak ding Israelitang babaing ipus tegalan da lang kalaban, at pete do ngan anting ipus a makasalanan. King armada ning Ginu limbug lang kalaban.

¹³Magkanta kung bayung kanta king kakung Dios. O Ginu, tune kang mayupaya, at king kamalan ala kang kalupa. King tagle mung sikanan e la maniambut ding kalaban.

¹⁴Paburen sablang melalang ing ika ing karelang suyuan, uli ning kekang amanu ing sabla linto, king pangisnawa mu mebie la ding tau. Ala metung man ing makasalangsang king amanung kekang sabian.

¹⁵Gagalgal lang kabundukan at ding dagat, mangalaso lang batu king kekang arapan; oneng malulunus ka karetang mamintu keka.

¹⁶E ya tutula ing Dios karing ain-sakripisyu o karing ain a mabanglu; oneng tutula ya karing taung mamintu karing utus na.

¹⁷Dugpa ing kapahamakan king isanu mang bansang lumaban king kakung balen; king Aldo ning Pamanukum parusan na la ngan ning Ginung Mayupaya. Ibie na la ding katawan da king api at karing ulad, at manangis la king kapilan pa man uli ning kasakitan.

¹⁸Inyang dinatang na la king Jerusalem ding memalen, lininis na ning metung at metung ing sarili na at simban ne ing Dios. Minie lang ain-a-durulukan, kusang lub a ain, at aliwa pang ain.

¹⁹Binie na at telagang Judith king Dios ing sablang pibandian nang Holofernes a binie ding memalen. At bilang makabukud a ain king Ginu binie ne ing kulumbung kinua na king pagkeran nang Holofernes.

²⁰Miras atlung bulan ing pamagsaya da ring tau karin king arap ning Templo ning Jerusalem, at menatili yang kayabe ra i Judith.

²¹Inyang meyari na ing pamitipun da, minuli ne king bale na ing balang metung karela; minuli nia naman i Judith king asyenda na king Betulia nung nu ya manuknangan. King kekaban ning bie na, meging pikabaluan ya king mabilug a bansang Israel.

²²Dakal la ding lalaking miglolo kang Judith, oneng e ne mekiasawa manibat na inyang mete ya ing asawa nang i Manase.

²³Miras ya king idad a dinalan limang banua, at e bitasang meko king tuknangan ning meyangu bie asawa na. Mete ya i Judith king Betulia, at libing de ketang kutkutan nung nu ya milibing ing asawa na.

²⁴Pitung aldo reng penangisan ding memalen ning Israel ing kamatayan na. Bayu ya mete, pipartian-partian na ing pibandian na karing kamaganak nang Manase, at antimu rin karing kamaganak na. Binie na king ipus na ing kalayaan.[20]

²⁵Inyang mabie ya i Judith at kalabas ding dakal a banua ning kamatayan na, ala nang mengangas pang gawang kaguluan karing memalen na ning Israel.