Read Kapampangan Judith 2 Bible Online

Judith 2 - Kapampangan bible

Judith 2

¹Kanitang kaduang pulu't aduang aldo ning mumunang bulan ning kalabing walung banuang pamag-ari nang Nebucadenesar, mika pulung king palasyu. Mepisabi keting pulung nung makananung daptan ing pengaku nang mablas ning Aring Nebucadenesar karing bansang e sinaup king kayarian na.

²Pepayaus na la ding heneral at aliwa pang pamuntuk at sinabi na karela nung makananu reng pigtaksilan deting bansa.

³Kaybat pikayari da ing paten da la ring tinangging sumaup. Binie ne karela ing planu nung makananu da la reting lusuban.

⁴Inyang meyari na ing pulung, inaus neng Nebucadenesar a ari munaman king Asiria, i Holofernes. I Holofernes ya ing pamuntuk da ring heneral at ya ing wanan nang gamat ning ari. Ngana ning ari,

⁵Aku ing maulang ari at ginu ning meto yatu. Utusan da kang ituki mo ding magaling mung diling sundalus: labing aduang libung pakakabayu at dinalan aduang pulung libung e pakakabayu.

⁶Lusuban yu la ding bansa king albugan a tinanggi inyang miniawad kung saup karela.

⁷Sabian yu karela king ipagsadia ra kung gabun at danum ban patunayan king bisa lang sumukung alang kapikakunuan. Sukat lang magsadia uling lusuban ke ing balang dake ning bansa ra karing dakal kung sundalung mamuksa karela.

⁸Kumatmu la karing mete da ring kapatagan at mangabara la ding batis at ilug at lumapo la uli da ring bangke.

⁹Bihagan ku la at iyugse karing suluk na ning yatu detang e mate.

¹⁰Muna na ka kanaku at sakupan mu la ding bansa para kanaku. Nung sumuku la, banten mong masalese angga king datang ing aldo a parusan ku la.

¹¹E me pakitanan lunus ing ninumang lumaban. Paten la at kuanan ing pibandian da ring bansang sakupan mu.

¹²Antimo ing asabi ku na, ing sinabi ku ya ing daptan ku uling aku ing ari at ing malilyari buri.

¹³Ala kang lalabagan king inutus ku keka. E mu kakalinguan king aku ing ari mu. King malalaguang panaun daptan mu ing sinabi ku, at e mu piliban-liban antimo ing inutus ku keka.

¹⁴Meko ya king arap ning ari i Holofernes, at kaybat inaus na la ding heneral at aliwa pang pamuntuk ding sundalus ning Asiria.

¹⁵Bilang kapamintuan king ari, mekatipun yang labing aduang libung sundalung pakakabayu at biasang mamana. Mekatipun ya namang dinalan aduang pulung libung sundalung e pakakabayu.

¹⁶Inayus na la at sidia ban makiarap king labanan.

¹⁷Migdala ya namang dakal a kamelyu, asno, at kabayung talapagdala king karga ra. Dakal la naman ding dela rang tupa, baka, at kambing para pamangan da.

¹⁸Labis-labis ing rasyun dang pamangan ding sundalus at dakal ing tinggap dang gintu at pilak bilang bayad na karela ning ari.

¹⁹Inya linakad ne i Holofernes at ding sundalus na uling inutus na ning ari ing muna ne ban lusuban la ding bansang atyu dane ning albugan. Atin lang karwaheng pakigera at sundalung magaling mamana.

²⁰Atin pang aliwang sundalus a tinuki karela. Milalu la king karakal; balamu durun lang lulusub o balas a e mu abilang-bilang.

²¹Meko la king Nineve at kalabas ding atlung aldo ning pamaglakad da miras la king kapatagan ning Bectilet. Manibat karin, migkampu la king lele da ring bunduk dane norti ning Cilicia.

²²Penimunan na la karin Holofernes ding sundalus na, ding e pakakabayu, at ding pakakabayu, at ding pakakarwahe king pamanlusub karing balen a atyu karing bulubundukan.

²³Ganap na lang lesak ding bansang Libya at Lydia.[1] Kinua na ing sablang pibandian da ring memalen ning Rassis at ding Ismaelitang manuknangan king angganan ning disyerto papunta dane mauli ning sakup da ring Kelean.

²⁴Kaybat dinalakit la king Eufrates, dinalan la king Mesopotamia, at ganap da lang lesak ding pakapader a balen a atyu lele ning Ilug ning Abron angga king dagat.

²⁵Sekupan ne ing bansa ning Cilicia at papaten ne ing ninumang lalaban. Miras ya angga king angganan na ning Jafet dane nang mauli papuntang Arabia.

²⁶Kibkuban na la ding Midianita, silaban na la ding tolda ra, at pete ding tupa ra.

²⁷Panaun na kanita ning pamamupul king kapatagan ning Damasco inyang linusub la karin. Silaban da ing sablang atyu king marangle. Gisan da lang pete ding tupa at baka. Kinua ra ing sablang pibandian da ring siudad. Sinira de ing kabilugan a kapatagan, at pete do king tabak ding sablang kayanakan a lalaki.

²⁸Mikatmuan lang takut at galgal ding manuknangan king Tiro, Sidon, Sur, Osina, at Jamnia. Ginalgal la naman king takut ding tau Asdod at Askelon.