Read Kapampangan Judith 3 Bible Online

Judith 3 - Kapampangan bible

Judith 3

¹Inya deting bansa mitubud lang taung makipagpayapa at makipagkasundu kang Aring Nebucadenesar.

²Ngara deting tubud: Talasuyu yu kami pu, O Aring Nebucadenesar; duruku[2] kami arapan yu bilang tanda ning pamamintu mi king nanumang buri yung parapat kekami.

³Atyu la king kekayung kapasyahan ding bale mi, ding tolda, ding marangle ming ating tanam trigu, ding sese ming animal, at ing mabilug ming bansa. Gawan yu ing nanumang buri yung daptan.

⁴Kekayu lang ipus ding memalen mi at agamit yu la ding balen mi king nanumang buri yung gawan.

⁵Kaybat deng aibie ding tubud iting mensahi,

⁶minta ya i Holofernes at ding sundalus na king lele ning dagat. Mibili yang sundalus a magguardia karing sablang balen a pakapader at memili yang mapilan a maging reserbang sundalus karing memalen karing balang balen.

⁷Sinalubung la kang Holofernes ding sablang manuknangan karing siudad at ding kasiping dang balen a magdalang kwintas a bulaklak at teterak la kabang matitigtig la ding pandereta.

⁸Makanyan man, lesak nia mu ring Holofernes ing mabilug dang bansa at sinira ding dutung dang sagradu uling makautus ing lasakan na la ding sablang kikilalanan dang dios. Uli na niti, sinamba yang bukud kang Nebucadenesar ing metung at metung karing bansa, at ya ing dadalanginan da bilang dios ding balang balen.

⁹E miglambat miras ya mu rin i Holofernes king Jezreel, malapit king Dotan. Iti ya ing masanting diling dalan a paukiat karing kabundukan ning Juda.

¹⁰Migkampu la pilatan ning Geba at ning Sitopolis. Menatili la karin kilub ning pabulan ban makapagsadia king kailangan da ring sundalus na.