Read Kapampangan Judith 4 Bible Online

Judith 4 - Kapampangan bible

Judith 4

¹Abalitan da ring taung manuknangan king Juda ing sablang bage tungkul kang Holofernes, ing matas diling pamuntuk da ring sundalus nang Nebucadenesar. Abalitan da nung makananu na lang lisuban ding sundalus na ding bansa at lesakan ding templo ra kaybat dang kinua ing nanumang pibandian a buri da.

²Mitakutan lang e mu nanu at bina lang meligalig, magkang makanyan munaman ing gawan nang Holofernes king Jerusalem at king Templo ning Ginung karelang Dios.

³Kaybat da pa kanitang minuli king pangayugse. Kanita re pa aitalaga ing Templo, ding kasangkapan na niti, at ing altar, kaybat deng lepastangan ding kalaban.

⁴Uli na niti, peparala lang babala king mabilug a Samaria, king Kona, king Bet Horon, king Belmain, at king Jerico ban magsadia. Pepayabut da naman iti king Koba at Escora at angga na king Kapatagan ning Salem.

⁵Tinuldu lang tau a magbante karing taluktuk da ring bunduk-bundukan. Mibili la namang pader karing baryu at mitambak dakal a pamangan bilang pamagsadia king pamakilaban; kaybat-ibat da pa kanitang minupul.

⁶Ing pekapun da ring pari kanita king Jerusalem ya i Joakim. Silatanan na la ding tau Betulia at Betomestaim a makayarap king Kapatagan ning Jezreel malapit Dotan.

⁷Pekapanabilin na karela king banten da lang masalese ding pidadalanan paukiat king bunduk uling manibat karin mayan yang luban ing Juda. E la misakitan makiarap karing sundalung salake uli ning makiput ya iting pidadalanan; adua lang tau deng midalan.

⁸Pemintuan da ring Israelita ing inutus nang Joakim at ning konseho a mipulung king Jerusalem.

⁹Menalangin lang mitmung kataimtiman at mig-ayunu[3] la ding lalaki na ning Israel.

¹⁰Misulud lang imalan a magaspang[4] uli na ning lungkut. Makanyan munaman ing depat da ring asawa ra at anak, ding sese rang animal, ding dayuan a makipanuknangan karela, at ing metung at metung karing ipus at ding upahan a makipagobra.

¹¹Ila ngan, lalaki't babai at anak, migsakab la arap ning altar; atin lang abu karing buntuk da at makasulud lang imalan a magaspang uli na ning lungkut.

¹²Tikpan dia naman king telang magaspang ing altar at miyabe-abe la king pamanalangin da king Dios ba na lang iligtas ding asawa ra at anak king pangabihag, at antimu rin ding siudad da. Penalangin da king e ya sana malapastangan ing Templo da karing taung e kikilala king Ginu.

¹³At pekiramdaman na ning Ginu ing panalangin da; melunus ya karela uli na ning gipit dang kabilian. Mig-ayunu ya ing mabilug a Juda at Jerusalem kilub ding dakal a aldo karin king altar ning Ginung Mayupaya.

¹⁴Ing pekapun da ring pari a i Joakim, ding pari, at ding susuyu king Templo makasulud la namang imalan a magaspang neng babie lang ain-a-durulukan, at karing ain-a-kusang-lub dang babie ding tau, at ding ain-panata.

¹⁵Dirinan da lang abu ding turban karing buntuk da at manalangin lang masikan king Ginu ban malunus ya king mabilug a Israel.