Read Kapampangan Judith 6 Bible Online

Judith 6 - Kapampangan bible

Judith 6

¹Inyang metahimik na king tolda nung nu la mipupulung, migsalita ya i Holofernes kang Akior king daramdaman da ring sablang atyu karin. Ngana:

²Akior, ninu wari ika, ika at ding kayabe mung upahan a Ammonita, a balamu propetang magsalita kekami? Ba't sinabi mung e la lusuban ding Israelita uling ingatan na la ning dios da? Atin pa waring dios a maygit kang Nebucadenesar? Gamitan nang Nebucadenesar ing upaya na at palisan na la deting Israelita king yatu, at e no malyaring aligtas ning dios da.

³Talasuyu na kaming Nebucadenesar, inya ibagsak mi lang anting metung mung tau. E la malyaring magluat makilaban karing sundalus ming pakakabayu.

⁴Siguradu mi lang sambutan. Magus ing daya karing bunduk da at mitakpan la karing mete ding kapatagan da. Magisan la ngan a lahi kabud lisuban mi la. Iti ya ing utus nang Nebucadenesar, ing ginu ning meto yatu, at e ya makibiru.

⁵At ika naman, Akior, metung ka ping Ammonitang upahan king labanan, kataksilan ing sinabi mu. E mu na ku akit pang pasibayu anggang e ku mekayablas kareting lahing Israelitang ipus a tinakas ibat Ehipto.

⁶Pamagbalik ku, papate ra ka karing sundalus ku bilang karagdagan karing apate da.

⁷Idala da ka ngeni ding tauan ku king kabundukan at lakuan king metung karing balen ning Israel,

⁸at mate kang kayabe da ring tau karin.

⁹E ka sukat malungkut; nung paniwalan mung e la masambut. Oneng oyni ing siguraduan mu: daptan ku itang sinabi kung gawan karing Israelita!

¹⁰Kanita inutus nang Holofernes karing tauan nang manenaya lual ning tolda king dakpan de i Akior at idala de Betulia at ibie karing Israelita.

¹¹Inya dekap de i Akior at liwal king kampu, at dela de king kabundukan a e marayu ketang sibul a atyu king mababa nang dake ning Betulia.

¹²Inyang ding tau karin ikit da la, kinua da la ring sandata ra at memulayi lang minukiat king taluktuk ning bunduk. Kaybat pepauranan da lang batu ding kalaban ban e la makaukiat king bunduk.

¹³Oneng mekapampan la ding kalaban king metung nang suluk ning bunduk. Karin de ginapus i Akior at likuan de. Kaybat na nita, mibalik na la kang Holofernes.

¹⁴Kinuldas la king bunduk ding Israelita at kelagan de ing tali kang Akior at inuli de Betulia. Inarap de karing pamuntuk da.

¹⁵Ila deti ri Uzzia a anak nang Mikeas king tribu nang Simeon, i Kabris a anak nang Gotoniel, at i Karmis a anak nang Melkiel.

¹⁶Kanita pinulung da la ring makatua ning siudad, ding kayanakan a lalaki at babai. Agad-agad lang migtipun. Miyarap ya karela i Akior at pengutnan neng Uzzia nung nanu ing milyari.

¹⁷Sinabi na ngang Akior ing mepisabi king pulung a penimunan nang Holofernes, nung nanu ing sinabi na karing pamuntuk a Asiriano, at nung makananu nang pigmayabang Holofernes ing daptan na karing Israelita.

¹⁸Inyang dimdam da iti ding Israelita, migsakab la king gabun ban samban ing Dios. At ngarang menalangin:

¹⁹O Ginung Dios ning banua, e mu sa kakalinguan ing kapalaluan da ring kalaban. Malunus ka kekami at saupan mu kami.

²⁰Kaybat pepasiknangan de lub i Akior at pinuri de king depat na.

²¹Kayari ning pulung, tiki ne bale nang Uzzia i Akior at migsadia yang dakal a pamangan para karing makatua. Kabukas lang manalangin king Dios ning Israel at maniawad saup.