Read Kapampangan Judith 7 Bible Online

Judith 7 - Kapampangan bible

Judith 7

¹Kabukasan, inutus nang Holofernes karing sundalus na at ding kapanalig dang aliwang sundalus king lakuan da ne ing kampu at sakupan na la ding pidadalanan karing bunduk ban alusub ya ing Betulia.

²Inya migsadia la ngan king aldong ita. Dinalan pitung pulu't libu la ding sundalung e pakakabayu at labing adua lang libu ding pakakabayu. E la pa kayabe kareti ding aliwang grupu a magdalang kagamitan. Inya meko na la

³at migkampu lele ning sibul malapit king Betulia. Maragul ya ing kampu ra inya miraras ya banda king balen ning Dotan at angga king Balbaim, at king kakaba na mamabut ya king Ciamon a katulid ning Kapatagan ning Jezreel.

⁴Mitakutan la ding Israelita inyang ikit da la ring dakal a kalaban, at ngara king metung at metung uli ning takut, Laklakan da ne kanyan ing mabilug a bansa. E la mipagyu karing bunduk at bunduk-bundukan uli na ning keraklan da. Gisanan da na kanyan ing pamangan.

⁵Agyang mitakutan la ding Israelita, kinua da la ring sandata ra, sinindian da la ring sulu karing pader, at kabukas lang migguardia.

⁶Kabukasan, penimunan na lang linage Holofernes ding sabla nang sundalung pakakabayu king akakit da ring Israelitang manuknangan Betulia.

⁷Siniasat na la ding dalan a palub king siudad at ding pikukuanan danum. Sekupan na la deti at mibili yang magguardia bayu ya mibalik king kampu.

⁸Lepitan de ngan ding manimuna da ring sundalung Edomita at Moabita at ding kumander da ring menibat king lele ning dagat.

⁹At ngara, Heneral, nung makiramdam kayu king sabian mi, e la dakal ding mate karing sundalus yu.

¹⁰E la pu manalig ding Israelitang den kareng sandata ra ban idipensa ing sarili da nune karing matas a bunduk nung nu la manuknangan. E la malalaguang aukiatan ding bunduk.

¹¹Inya e ta la pu direderetsung lulusuban ban e tamu kamaten agyang metung mung sundalus.

¹²Manatili na kayu mu king kampu yu at ding sundalus karing tolda ra. Utusan yu na la mu pung sabatan da la ring sibul king lele da ring bunduk,

¹³uling den ilang pikukuanan dang danum ding memalen ning Betulia. Potang mamamate na la king kau kanita na la sumuku kekayu. Ikami na naman pu mukiat kami karing taluktuk da ring makasiping a bunduk; karin kami magkampu at ding tauan mi ban ala metung mang Israelitang milual king siudad.

¹⁴Mate la kanita king danup ding lalaki, ding babai, at ding anak. Agyang e ke pa linusub kumatmu na la ding dalan karing mete ra.

¹⁵Iti ya ing parusa na ning e la bisang sumukung payapa kekayu.

¹⁶Metula ya i Holofernes at ding kayaduangan na kaniting munikala, inya minie yang utus king daptan ing mesambitla.

¹⁷Linakad na la kanita ding Moabita at ding limang libung tau Asiria, at migkampu la king kapatagan ban sabatan da la ring sibul a pikukuanan dang danum ding Israelita.

¹⁸Minukiat no man king bunduk ding Edomita at ding Ammonita at migkampu la king sumangid ning balen ning Dotan. Pepapuntan da la ring aliwa king dane mauli-aslagan a papunta king Egrebel, malapit king Cus lele ning bangin ning Ilug ning Mokmur. Migkampu la king kapatagan ding aliwang kayabe rang sundalung Asiriano. Malualas ya ing lugal a ita at meging maragul yang kampu. Halus kinatmu ya karing tolda at karing kagamitan king pamakilaban.

¹⁹Kanita, minaus la ding Israelita king Ginung karelang Dios. Meina la lub uling makapaligid la karing kalaban at e la bitasang makatakas.

²⁰Mesabat la karing sundalung Asiriano ding dalan a piluluban da at pilulualan ding Israelita kilub ding atlung pulu't apat a aldo. Atyu la karin ding sundalung pakakabayu at e pakakabayu at ding karung panggera. Megisan ing makatipun a danum da ring Israelita.

²¹Melangi[7] la ding talaga; piparti-parti da ing danum oneng e sapat karing mangailangan.

²²Mistula lang mete ding anak uli na ning matinding kau. Milalako la male tau ding babai at ding kayanakan uling tutu lang mau. Mangapase la karing dalan at pasbul ing metung at metung uli na ning mangalambut la.

²³Kanita mitipun la ding lalaki, ding babai, at ding anak arapan nang Uzzia at ding pamuntuk ning balen. Ngarang kukulisak la ding tau,

²⁴Parusan na kayu ning Dios kaniting malilyari uling e kayu bisang makipagkasundu karing Asiriano.

²⁵Ala ngening metung mang sumaup kekatamu. Pepailalam na na katamu ning Dios king upaya da ring kalaban. Mangaina ta na at mamate uli na ning kau.

²⁶Sumuku ta na karela at paburen ta ne i Holofernes at ding sundalus na ing kuanan ne ing balen tamu at ing nanumang buri da.

²⁷Mayap pa ing mabihag tamu. Wa, gawan da katamung ipus da, oneng mabie ta naman at e ta na la akit pang mamate ding asawa tamu at anak.

²⁸Saksi ya ing banua at yatu laban kekayu. Ing Dios a Ginu ding makatua mi ya ing saksi laban kekayu. Parusan na katamu ning Dios uli da ring kasalanan tamu at ding kasalanan da ring makatua tamu. E na sa paintulut ning Dios ing dugpa la kekatamu ding bage makapangilabut.

²⁹Kaybat na nita, menangis lang masikan at menagulele lang menalangin king Ginung Dios.

³⁰Kanita ngana karelang Uzzia, E yu painan ing lub yu, kaluguran ku! Manaya ta pang limang aldo at lawan nung malunus ya kekatamu ing Ginung kekatamung Dios. Balu ku king e na katamu lubus paburen.

³¹Nung ala tamung tanggapan a saup kalabas da ring limang aldo, kanita ku na gawan ing aduan yu.

³²Pepagbalikan na lang Uzzia ding lalaki karing lugal a guguardian da antimo ding pader at ding tore. Pepaulian na no man ding babai at ding anak karing sarasarili dang bale. Itsura yang alang kapanayan ing kabilugan a balen ning Betulia.