Read Kapampangan Judith 8 Bible Online

Judith 8 - Kapampangan bible

Judith 8

¹Abalitan nang Judith ing sablang malilyari king balen. I ima na ya i Merari at i apu na ya i Ox, at ing ingkung na king tud ya i Jose a ibat king lahi nang Oziel, Elkias, Ananias, Gideon, Rafaim, Ahitub, Elias, Hilkia, Eliab, Nathanael, Salamiel, Sarasadai, at Israel.

²Ing asawa nang Judith ya i Manase a ibat munaman king karelang lahi at makatua. Mete ya i Manase inyang panaun na ning pamamalut sebada.

³Panibalan na la kanita ding taung manaling sebada king marangle inyang bigla yang mibual uli na ning pali ning aldo. Kinera de king pagkeran, oneng mete ya king Betulia nung nu ya mibait at meragul. Libing de king kutkutan da ring makatua na ketang marangle pilatan ning Dotan at Balamon.

⁴Atlu neng banua at apat a bulan a mebalu i Judith.

⁵Inyang mebalu ne, pepagawa yang malating kuartu king kadua nang palapag ning bale na.[8] Karin ya migdatun a makaimalan magaspang bilang pamagpaldas.

⁶Parati yang mag-ayunu kilub ding panaun a deta subali mu neng makabawal: neng bespera ning Aldo ning Sabbath at Aldo ning Sabbath, neng bespera ning Piesta ning Bayung Bulan at neng Piesta ning Bayung Bulan, at aliwa pang aldo pagselebran king Israel.

⁷Tune yang malagu at pibuburian a babai i Judith. Migmana yang gintu at pilak, ipus a lalaki at babai, dakal a baka ampon gabun inyang mete ya ing asawa na. Ya ing mamahala kaniting pibandian a likuan nang Manase, ing asawa na.

⁸Ala metung man a makapagsalitang e mayap kang Judith, uling metung yang babaing tune tapat.

⁹Abalitan na namang Judith ing makarine depat ding tau kang Uzzia at karing pamuntuk ning balen uli na ning alang danum, at nung makananu yang mengaku i Uzzia a isuku na ne ing siudad karing Asiriano kalabas ning limang aldo.

¹⁰Uli na niti, inaus ne ing ipus nang babai a mamahala king sabla nang pibandian. Tinubud ne karing makatua ning siudad ban ipakisabi kang Uzzia, Kabris, at Karmis king munta la bale na at makikit la kang Judith.

¹¹Nganang Judith karela inyang dinatang na la, Makiramdam kayu sana kanaku, ikong pamuntuk ning siudad ning Betulia. Ala kayung matulid sabian karing tau ing asabi yu na. E kayu sukat mengaku king daramdaman ning Ginu king isuku ye ing siudad karing kalaban tamu, nung ing Ginu e na katamu saupan kilub ning mapilan a aldo.

¹²Ninu ikayu ban subukan ye ing Dios king panaun a anti kaniti? Maygit ko pa wari king Dios?

¹³Ing Dios a Mayupaya ya kanyan ing susubukan yu. E na kayu wari mebiasa?

¹⁴Anti na ning e ye atataruk a pilubluban ing tau at e yu balu ing atyu king isip na, lalu yung e balu itang king linalang king tau? Agyu ye waring tarukan a pamisip ing Dios? Agyang makananu ali ye! Kakaluguran, e ye sana pipilitan mimua ing Ginung kekatamung Dios.

¹⁵Nung sakaling e na katamu man saupan kilub ding limang aldo, malaya[9] yang saupan na katamu nung kapilan na buri o paburen na na katamu pin pamaten da ring kalaban.

¹⁶E ye sukat dirinan kondisyun ing Ginung kekatamung Dios; e ya malyaring balan ing Dios o makitawaran uling e ta ya kalupa.

¹⁷Inya manaya tamu king pamagligtas na. Samantala, maniawad tamung saup king Dios. Magkang pakiramdaman na katamu, nung mabisa ya.

¹⁸Ala metung man ngeni karing tribu tamu o lahi o pamilya o baryu o balen a sasambang dios a gewa ding tau. Wa, sinamba la kareti ding makatua tamu.

¹⁹Inya naman pepaburen na la ning Dios a pamaten da la ring kalaban, at meyakua ing pibandian da. Mibagsak lang alang kalupa!

²⁰Oneng itamu ala tamung aliwang kikilalanan a Dios nune mu ing Ginu, inya panatag tamu bili king e ne tanggian[10] ing ninuman karing kalahi tamu.

²¹Nung mabihag tamu mangabaldugan ing pangabihag tamu king pangabagsak ning mabilug a Judea, at ing pangapanakawanan na ning kekatamung Templo. Siguradung itamu ing pamarsalanan na ning Dios king pangalapastangan ning Templo.

²²Ing pamakamate at pangayugse da ring kabalen tamu, at ing pangalasak ning bansa tamu ya ing parusa na kekatamu nu mang lugal a idala da katamung ipus ding paganu. Lawan da katamung mababa uri at gawan pikaylian ding maging panginuan tamu.

²³E ra katamu luguran ding kalaban tamu, nung sumuku tamu karela. Gamitan na la ning Dios ban pamakarine na katamu.

²⁴Uli na niti, kakaluguran ku, kailangan ing munie tamung alimbawa karing kabalen tamu, uling ing bie ra makapanalig kekatamu pati na ing Templo at ing altar.

²⁵Sukat tamu pang pasalamat king Ginung kekatamung Dios uling susubukan na katamu antimo ing depat na karing makatua tamu.

²⁶E yu sa kakalinguan king sibukan ne i Abraham at i Isaac. Ganakan yu itang milyari kang Jacob inyang atyu ya king Mesopotamia, at sinuyu ya bilang pastul da ring sese nang animal ning bapa nang i Laban.

²⁷E na katamu pailalam ning Dios king mabayat a kapagsubukan ban lawan ing kekatamung katapatan o mamablas kekatamu, nune didisiplinahan na katamu ning Ginu ban itulid ing kamalian tamung talasamba na.

²⁸Kanita nganang Uzzia kang Judith, Ustu ing sinabi mu; ing sablang sinabi mu katutuan at alang makapayali.

²⁹Aliwa mu iti ing mumunang oportunidad a pepakit mu ing kekang kabiasnan. Malati ka pa mu ikit mi na ing kayapan ning pamisip mu at ing pamagsalita mung alang pamangabiran.

³⁰Oneng mangamate na la king kau ding memalen, inya mepilit kaming mengaku at sinumpang gawang paralan.

³¹Anti na ning babai kang mapanalangin, obat e ka manalangin para karing memalen. Aduan mu king Ginu ing pauran ya ban kumatmu la ding pikukuanan tamung danum, at e na ke mangalyu uli na ning alang danum.

³²Nganang Judith, Makiramdam kayung pasibayu kanaku. Atin kung gawan at iti e ra na malyaring kalinguan ding memalen tamu king sablang panaun.

³³Magguardia kayu potang bengi king pasbul dalan, at lumual kung kayabe ing ipus ku. Bayu ya datang ing aldo a pengaku yung isuku ing siudad tamu karing kalaban, iligtas na ne ning Ginu ing bansang Israel king kapamilatan ku.

³⁴Oneng e na kailangan pa kekayu ing pakibaluan yu ing gawan ku. E ku sabian ing gawan ku anggang e metupad iti.

³⁵Nganang Uzzia at ding pamuntuk, Nung makanyan Judith, lumakad na ka at babie mi keka ing bendisyun mi. Mananu na sanang mantabe ya keka ing Dios king pamanablas a gawan mu karing kalaban tamu.

³⁶Kaybat na nita, meko na la king pibalebale nang Judith at migbalik la karing puestu ra.