Read Kapampangan Judith 9 Bible Online

Judith 9 - Kapampangan bible

Judith 9

¹Kaybat na nita, mibili yang abu i Judith king buntuk na; biklat ne ing imalan na at linto ing imalan a magaspang a susulud na at migsakab ya. Oras na kanita ning pamiyain king pambenging insenso king Templo ning Jerusalem, at menalangin yang masikan i Judith. Ngana,

²O Ginung Dios na ning makatua kung i Simeon! Binili me king gamat na ing metung a espada ban mablas karetang dayuan a dinukut kang Dina a metung a birhen, karetang ginabak king imalan na ban salbahian da ing pangababai na agyang binawal mu ing e ra sukat daptan ita.

³Uli na nita, binie mu la ding manimuna ra karing Israelita at pete da la. Mitmu ya king daya ra ing mismung pagkeran nung nukarin de sinalbahian i Dina. Pete mo ngan, ipus la man o prinsipi o aring makalukluk karing tronu da.

⁴Pepaburen mu lang meyakua karing pakamalan mung Israelita a tapat tutupad king kaburian mu ding babaing asawa ra, at dela da lang bihag ding dalaga ra, at meyakua ing pibandian da. Mua la ding kapatad nang lalaking Dina king kalapastangan a milyari king pamilya ra. Inya minaus lang miniawad saup keka. O Dios a kakung Dios, pakiramdaman mu sa ing panalangin ku, ing panalangin na ning babaing mebalu.

⁵Ing sablang milyari kanita, bayu at kaybat merapat, ikang makipasari. Ding bage malilyari ngeni at ing mapalyari pa, ika ing maki tangka.

⁶Itang buri mung marapat ya ing tune mararapat.[11] Balu mu nang makauna ing sablang buri mung daptan at itang buri mung marapat.

⁷Akakit mu ngeni ing sikanan da ring sundalung Asiriano. Pagmayabang da la ring kabayu da at ding makasake, pagmaragul da la ring dakal dang sundalung e pakakabayu, at manalig la karing kalasag da at sibat at pana ampon paslu. E ra balu king ika ing Ginu a manyupil karing gera; Ginu ing lagyu mu.

⁸Isambulat mu king upaya mu ing upaya ra at lasawan mu ing sikanan da king mua mu, uling binalak da nang lapastanganan de ing Templo mu nung nu ya misasamban ing maligaya mung lagyu. Buri da naman ing panabakan da la karing espada ra ding sagu ning altar mu.

⁹Lawan mu ing kapalaluan da, ibagsak mu ing mua mu karing buntuk da. Agyang metung ku mung babaing mebalu, dinan mu kung sikanan ban arapat ku itang minamayap kung daptan.

¹⁰Gamitan mu la ding maglinlang kung amanu ban apate mu la nganipus la man o panginuan. Ibagsak mu ing kapalaluan da king kapamilatan na ning gamat ning metung a babai.

¹¹E manalumpakan ing upaya mu king keraklan o sikanan da ring sundalus. Dios da ka ding mapagpakumbaba; sasaupan mu la ding kalulu at ding maina, idipensa mo ding alang akarapat, at ika ing talapagligtas da ring alang kapanayan.

¹²O Dios na ning makatua kung i Simeon, O Dios a panaligan ning Israel, Ari ning banua, ning yatu, at ding dagat, ing Linalang king meto sikluban, pakiramdaman mu sana ing panalangin ku.

¹³Paburen mung ding mapaglinlang kung amanu ilang maniugat at makamate karetang mibalak bigsikan laban king kekang kasunduan[12] at king banal mung Templo, laban king Bunduk ning Zion, at king bansa a binie mu karing memalen mu.

¹⁴Ibie mu king mabilug a bansa at king metung at metung karing tribu ing beluan king bukud mung ika ing Dios, ing Dios a mayupaya king sabla-sabla,[13] at king ika mung bukud a talapamingua[14] ning Israel.