Read Kapampangan Exodo 29 Bible Online

Exodo 29 - Kapampangan bible

Exodo 29

¹Oyni ngeni ing sukat mung daptan kang Aaron at karing anak nang lalaki ban aitalaga mu la bilang paring sumuyu kanaku. Kuma kang metung a baintaung toro ampon aduang lalaking tupa a alang kapansanan.

²Gamitan mu ing pekamasanting a arinang trigu, pero alang lebadura at gawa kang tinape singkapan larung olibo. Gawa ka namang e singkapan larung olibo at mapilan pang tinape maimpis a kiskasanan laru.

³Ibili mu la deti king basket at iyain mu la kanaku potang iyain me ing toro at ding aduang lalaking tupa.

⁴Ituki me i Aaron at ding anak na king lele na ning pasbul ning Toldang tuknangan ku at karin mu parapat ing seremonia ning pamaglinis.[51]

⁵Kaybat na nita, piblasan me i Aaron karing imalan pari, ing kamisa, ing efod, ing barung makaba a makababo king efod, ing takap-salu, at ing sinturun.

⁶Itumpak me king buntuk na ing turban at itali me kaniti itang sagradung simbulu na ning pangatalaga na nung nu makadukit ing Makatalaga king GINU.

⁷Kaybat, kuanan mu ing larung paglania at itugtug mu iti king buntuk na at lanian me.

⁸Ilapit mu la kanita ding anak nang lalaki at pasuluran mu lang kamisa;

⁹babatan mu la karing paha at itali mu la ring turban king buntuk da. Makanyan meng ordinan pari i Aaron at ding anak nang lalaki. Ila at ding maging lahi ra ilang sumuyu kanaku bilang pari king kapilan pa man.

¹⁰Idala me ing toro arap ning Toldang tuknangan ku at sabian mu kang Aaron at karing anak na ing itumpak da la ring gamat da king buntuk ning toro.

¹¹Paten me kanita mu rin king banal kung arapan ing toro king tulid nang pasbul ning Toldang tuknangan ku.

¹²Kuma kang ditak king daya ning toro at king metung mung taliri ikaskas mu iti karing sagu ning altar. Kaybat itugtug mu ing makatagan a daya king talpakan ning altar.

¹³Kuanan mu ngan ing tabang makabalut karing laman lub, ing pekamasanting nang dake ning ate, at ding aduang batu ampon ing taba ra. Dulukan mu ngan iti king altar bilang ain kanaku.

¹⁴Oneng dulukan mu king lual ning kampu ing laman ning toro, ing balat na, at ding bituka na. Iti maging ain para mipatawaran ing kasalanan.

¹⁵Kuanan me ing metung karing aduang lalaking tupa at sabian mu kang Aaron at karing anak na ing itumpak da la ring gamat da king buntuk na ning tupa.

¹⁶Paten me ing lalaking tupa; saluran mu ing daya at kaybat ipisik mu karing apat nang suluk ning altar.

¹⁷Kaybat, pangilian me ing lalaking tupa; luglugan mu ing laman lub at pati na ding bitis at ibili mu iti babo nang buntuk, at karing aliwa pang dake a megili.

¹⁸Dulukan me ing lalaking tupa king altar bilang ain-a-kakanan. Babie tula kanaku, ing GINU, ing bau na niti.

¹⁹Kuanan me ing metung pang lalaking tupa, itang megamit king pamitalaga. Kaybat, ipatung na la ding gamat nang Aaron at ding anak na king buntuk ning tupa.

²⁰Paten me ing lalaking tupa at kuma kang ditak king daya na at ikaskas mu karing pingul nang balugbug a wanan Aaron at ding anak na, at karing tindaragul da ring gamat dang wanan ampon karing tindaragul da ring bitis dang wanan. Isabug mu ing mitagan a daya karing apat nang suluk ning altar.

²¹Kuma kang ditak king dayang atyu king altar at ditak king larung paglania. Ipisik mu iti kang Aaron, king imalan na, karing anak nang lalaki, at karing imalan da. Mitalaga ne kanita kanaku i Aaron, ding anak na, at ing imalan da.

²²Kuanan mu ing taba ning lalaking tupa, ing taba na king iki at itang makabalut king laman lub, ing pekamasanting nang dake ning ate, ding adua nang batu, ing taba ra, at ing wanan nang puad.

²³Kuma kang tunggalan karing atlung uring tinape karing makabasket a miyain kanaku: metung a tinape singkapan larung olibo, metung karetang e singkapan laru, at metung karing tinape maimpis.

²⁴Ibili mu ngan iting pamangan king gamat nang Aaron ampon ding anak na, at iyutus mu karela ing iyain da iti kanaku bilang makabukud a ain.

²⁵Kaybat kuanan mung pasibayu karela, at dulukan mu king altar, babo ning dilukan a ain, bilang ain-a-kakanan a makatalaga kanaku. Ing bau na niting ain babie tula kanaku.

²⁶Kuanan me ing pitsu ning lalaking tupa a megamit king panga-ordinan nang Aaron, at iyain me kanaku bilang makabukud a ain. Ing dake nang iti ning animal ya ing para keka.

²⁷Potang miyoyordinan ya ing metung a pari, ing pitsu na at puad ning lalaking tupa a magamit para king seremonia ning ordinasyun sukat lang miyain kanaku bilang makabukud a ain, at ya ing ilele bilang dake ra ding pari.

²⁸Sukat mipatupad manibat ngeni at king kapilan pa man iti: potang ding taung pinili ku yayampang da la ring ain-ning-pamisulusulu, ing pitsu, at ing puad ning animal a yayain da mangaintulid ya karing pari. Iti ya ing peka regalu da ring tau para kanaku, ing GINU.

²⁹Sukat lang ipamana ding imalan pari a ginamit nang Aaron karing lahi na pangamate na ban isulud da naman potang miyordinan la.

³⁰Ing anak nang Aaron a manalili mismu kang Aaron bilang pari at lulub king Toldang tuknangan ku ban sumuyu kilub ning Banal a Lugal, sukat na lang isulud deting imalan kilub ding pitung aldo.

³¹Kuanan mu ing laman ning lalaking tupang megamit king ordinasyun nang Aaron at ding anak na, at ipabukal mu iti king metung a sagradung lugal.

³²King tulid nang pasbul ning Toldang tuknangan ku karin da kanan iti a kayabe da ring tinape mitagan king basket.

³³Sukat dang kanan itang megamit king seremonia ning pangapatawaran kasalanan inyang miyordinan la. Bukud mung ding pari ilang mangan kaniti uling iti sagradu.

³⁴Nung atin king karni o atin karing tinape a e mepangan karas na ning abak, iti sukat dulukan; e na sukat mapangan, uling iti sagradu.

³⁵Gampanan mu ing seremonia ning ordinasyun nang Aaron at ding anak nang lalaki kilub ding pitung aldo antimo nung makananu kung penabilin keka.

³⁶Miyain kang metung a toro balang aldo bilang ain para king pangapatawaran ning kasalanan. Iti ing makalinis king altar. Kaybat kuskusan me king larung olibo ban maging sagradu ya.

³⁷Daptan mu iti balang aldo kilub ding pitung aldo. Kanita maging lubus yang banal ing altar, at ninuman o nanumang mitagkil kaniti manasakit ya king upaya na ning kabanalan na.[52]

³⁸King sablang panaun, mibili kayung ain king altar aldo-aldo, aduang biserung tupa a pabanua tua.

³⁹Iyain ye ing metung neng abak at ing metung neng sisilim na.

⁴⁰Kayabe ning mumunang biserung tupa kailangan kayung miyain aduang librang arinang primera klasi a singkapan kulang king metung a litrung larung olibo a alang samut. Mitugtug kayu namang kulang king metung a litrung alak bilang ain a tutugtug.

⁴¹Iyain ye ing kaduang biserung tupa potang malapit nang datang ing bengi at kayabe na iyain yu naman ing arina, larung olibo, at alak a kasing dakal na nitang king abak. Iti maging ain yang kakanan a miyain kanaku, ing GINU, at babie tula kanaku ing bau na niti.

⁴²Sukat gampanan alang patugut iti king sablang panaun bilang ain-a-durulukan king arapan ku keta king tulid ning pasbul ning Toldang tuknangan ku. Karin ke pakitagpuan ing balen ku at karin ku makipagsalita kekayu.

⁴³Karin ke pakitagpuan ing balen Israel at ing masala nang aslag ning panga-atyu ku ya ing munie kabanalan king lugal a ita.

⁴⁴Gawan keng banal ing Toldang tuknangan ku ampon ing altar, at ibukud ke i Aaron at ding anak nang lalaki ban sumuyu la kanaku bilang pari.

⁴⁵Manuknangan ku libutad ning balen Israel, at aku ing maging Dios da.

⁴⁶Abalu ra kanita king aku ing GINUNG karelang Dios a milual karela karin Ehipto ban akua kung makapanuknangan kayabe ra. Aku ing GINUNG karelang Dios.