Read Kapampangan Ing Kabiasnan Nang Solomon 1 Bible Online

Ing Kabiasnan Nang Solomon 1 - Kapampangan bible

Ing Kabiasnan Nang Solomon 1

¹Ikong pamuntuk ning yatu, luguran yu sa ing hustisia. Ibili ye king isip yu ing Ginu at pagkapilitan yeng panintunan king mitmung katapatan.

²Akit de retang lubus manalig king Dios at pakit ya karetang alang duda king kadiosan na.

³Oneng mikawani la king Dios detang ating marinat a isip, at mangmang ka pin nung subukan me, at mangapakarine ka mu.

⁴E ya lungub ing Kabiasnan king taung ating e mayap a kapagnasan, at e ya manuknangan kapilan man king taung ipus ning kasalanan.

⁵Dumayu ya king mapamirait iting banal a espiritung talaturu; e ya magdatun king taung ating marinat a isip at labanan na ing alang hustisia.

⁶Metung yang espiritu ing Kabiasnan a mitalaga para king ikakayap da ring tau, oneng e ne patawaran ing ninumang magsalitang kalapastanganan king Dios, uling balu na ning Dios ing kekatamung panamdaman at isipan, at daramdaman na ing balang amanung kekatamung sasabian.

⁷Anti na ning atyu ing espiritu ning Ginu king mabilug a yatu at atyu king gamat na ing sablang bage, balu na ing balang amanung sasabian da ring tau.

⁸Siguradu neng apansin ing ninumang magsalitang e ustu at e lumuat parusan neng alang pamangabiran.

⁹Masiasat ing nanumang pamalak da ring taung alang Dios a katawan; miras la king Ginu ding amanu ra, at kaybat miyatulan lang kaparusan uli na ning dapat dang e mayap.

¹⁰E na paintulut ning Dios ing ating lumaban king Dios; at anti na ning daramdaman na ing sabla, e mu asalikut king Dios ing kekang pamanialangsang at pamagreklamu.

¹¹Inya e ka magreklamu uling alang mayap ibie ita; pangilagan ing nanumang paginakit. Siguradung mabalu ing nanumang sasabian mung lihim at ing pamaglaram ya ing makasira keka.

¹²E mu sana panintunan ing sarili mung kamatayan king kapamilatan na ning e ustung pamibiebie o ning e mayap a dapat.

¹³E ne lelang ning Dios ing kamatayan; e ya tutula king kamatayan da ring lelangan na.

¹⁴Lelang na ing sabla-sabla ban manatili kapilan man, at mayap at masanting ing sablang lelang na. Alang lasun a makamate king lelang na. E ya mag-ari keti king yatu ing kamatayan

¹⁵uling ala yang kamatayan ing hustisia ning Dios.

¹⁶Ding taung e mayap ilang makipasari king kamatayan uli na ning e mayap a sinabi ra at depat. Ila mismu ding mignasang mekipagkalaguyo king kamatayan. Ila mismu ding mekipagkaluguran king kamatayan. Uli na niti, mangaintulid karela ing kamatayan.