Read Kapampangan Ing Kabiasnan Nang Solomon 17 Bible Online

Ing Kabiasnan Nang Solomon 17 - Kapampangan bible

Ing Kabiasnan Nang Solomon 17

¹Makapagmulala la, O Ginu, at masakit lang pakaintindian ding kekang kayatulan. Uli na niti, malilili la detang e mekapagaral kareti.

²Kanitang isipan da ring taung alang pansin king kautusan king atyu ya king upaya da ing balen mung banal, ila mismu ding bihag na ning karalumduman ning kabengian. Makakulung la kilub dang bale at makawale la king alang angga mung ingat.

³Bala ra king alang makibalu karing makasalikut dang kasalanan at isipan da king makapampan la king matuling nang tabing ning pamangalinguan, oneng ngeni gagalgal la king takut, balisa la, at magugulu la isip karing balamu multung akakit da.

⁴Agyang pang makasalikut la king madalumdum luluban na la mu rin ning maragul a takut, uling makapadurut la king makapangilabut a inge a kakabling at akakit da la ring makatakut a multu.

⁵E na la agyung dinan sala ning nanumang api, at ala lang akarapat ding masalang batuin ban itabi ing makamate dalumdum.

⁶Ing bukud mung babie sala karela ya itang makatakut a api a e na sinindian ning tau, at king karelang takut maniwala la king ing yatu e ya mayap, agpang ketang isipan da.

⁷Mewalang kabaldugan ing pamaglinlang a bunga na ning karelang pamagsalamangka at antimu rin ing karelang pagmaragul a kabiasnan.

⁸Pigmaragul da king atabi da ing takut at ing kabalisan da ring taung magugulu isip, oneng ngeni ila mismu ding menamdaman king takut a e naman tune takut.

⁹Agyang alang bage sukat pitakutan, makanyan man gagalgal la king takut agyang king kaluskus da ring galagalang animal at ubingan.

¹⁰Mete lang gagalgal king takut at e la bisang mibuklat a mata, oneng e ra no man apiak ding karelang mata.

¹¹Tune atyu king e mayap a tau ing takut, ya mismu ing babie kayatulan king sarili na. Ya naman neng misan ing susukilkil king konsiensia na at pasari king kasakitan na.

¹²Ing takut ya ing bunga na ning e pamangamit king saup a babie na ning isip.

¹³Neng e ka lubus manalig king isip, kanita luban na ka ning takut a pasari na ning kamangmangan.

¹⁴Oneng king kapitangan ning bengi balisa lang matudtud deting tau agyang ala yang upaya karela ing dalumdum uling ibat ya iti king alang upayang tuknangan da ring mete.

¹⁵Tatagal la karela ding balamu multu at e la makakimut king takut a biglang dinatang karela.

¹⁶Bigla na lang mibual at e la mekakalabius king tanikala na ning takut a makapaluput karela.

¹⁷Mebihag la ding ortelanu, ding pastul, at ding magobra king marangle king metung mung kapalaran at migapus la king tanikalang e mayayakit busal ning karalumduman.

¹⁸Pitatakutan da ing tiup ning angin o pasiuk ding ayup a atyu karing sanga da ring tanaman o king danum a mamagus

¹⁹o king inge da ring batung mananabu o king inge da ring e mayayakit a melalang a pupulayi o ding gagaleung a malyap a animal o ing kabling ibat karing bunduk.

²⁰E ne man mayayabala ing mabilug a yatu king sadia nang daraptan libutad ning maslag a aldo.

²¹Bukud mung ding taung deta ilang makabalut kaniting madalumdum a bengi. Larawan ne ning madalumdum a kamatayan ing manenaya karela. Oneng lalu yang mabayat ing pusan a karelang daralan kesa king karalumduman.