Read Kapampangan Ing Kabiasnan Nang Solomon 4 Bible Online

Ing Kabiasnan Nang Solomon 4 - Kapampangan bible

Ing Kabiasnan Nang Solomon 4

¹Mas mayap ing e mikayanak oneng menatiling malinis a pamibiebie uling e makalinguan iti kapilan man. Kilalanan na ning Dios at ning tau ing kalinisan.

²Ing malinis a pamibiebie babie yang mayap a alimbawa karing tau. Panintunan da, nung alayu iti. Ya ing mal diling galal[4] a malyaring apakirasan na ning tau at manatili yang maulaga king kapilan pa man. Ing malinis a pamibiebie ya ing mayap diling pibandian a abandi ning tau.

³Agyang pang dakal la ding anak a bunga na ning pamakipangatawan, ala la mu ring ulaga uling anak la king kilual. E la mipaindatun at e la manatili.

⁴Anti la karing tanaman a mababo uyat. Agad lang tumubu oneng e la magluat uling agad lang mibubual potang mitiupan lang angin.

⁵Mapakli la sanga bayu la dagul; e la lululut a bunga at ala lang kwenta.

⁶Potang datang na ing Aldo ning Pamanukum deting anak a bunga na ning pamakipangatawan magtestigu lang laban karing kasalanan da ring pengari da.

⁷Oneng makatagpu lang kapasnawan ding taung matulid agyang pang anak la pamu mete na la.

⁸Uling aliwa naman ing makabang bie o ing dakal a banua ing panyukad king marangal a bie.

⁹Ing kabiasnan at ing katuliran ila ding tanda na ning ketuan a isip a kakambal ning matuang idad.

¹⁰Kanitang misan a panaun ating metung a taung mibiebie kalugud-lugud king Dios at kaluguran ne ning Dios. Enoc ing lagyu na. Kabang mabibie ya libutad da ring taung makasalanan, kinua na ne ning Dios

¹¹ban ing kaisipan na at kaladua e la miyawa king e mayap at king kalaraman.

¹²Balu tamu king bubulagan na la ning e mayap ding tau ban e ra akit ing katutuan at ing kayapan. Malilinlang la deng taung alang malit neng ing karelang isipan ya ing sarili dang kapagnasan.

¹³King makuyad mung panaun ikua nang kimtan Enoc ing kabanalan a e ra disan ding dakal agyang makaba ing bie ra.

¹⁴Metula ya ing Dios kang Enoc, inya memalagua neng leko keting e mayap a yatu. Balu ding tau ing paglako na, oneng iti e ra aintindian ni mekapagaral kaniting mepalyari

¹⁵king maganaka ya ing Dios at malunusan karing taung pinili na at ingatan na la.

¹⁶Agyang pang mete na la at ala ding taung matulid, pamakarinayan da la pa mu rin ding taung likuan dang mabibie king e ustung paralan. King ketuan da ring taung e mayap mangapakarine la karing kayanakan a miras king pangasakdal.

¹⁷Mapalyaring akit da ring taung e mayap ing kamatayan da ring biasa, oneng e ra aintindian king iti paralan na ning Ginu ban maingat la.

¹⁸Wa, kaylian da ing kamatayan na ning taung biasa, oneng e lumuat ila ding kailian na ning Ginu. E la miparangalan potang mate la. Masumami la at mainsultu king kapilan pa man libutad da ring mete.

¹⁹Iyugse na la ning Ginu king gabun at mapipi la. Mangari la karing bale a meugun a pundasyun; mibagsak la at malasak. Misakitan la at makalinguan karing tau.

²⁰Mitakutan la king Aldo ning Pamanukum uling tunggal-tunggal lang mabilang ding kasalanan da. Ing depat dang pamanialangsang king kautusan ya ing mangondena karela.