Read Kapampangan Ing Kabiasnan Nang Solomon 8 Bible Online

Ing Kabiasnan Nang Solomon 8 - Kapampangan bible

Ing Kabiasnan Nang Solomon 8

¹Ing upaya na mamabut angga karing wakas na ning yatu at ayusan nang masalese ing sablang bage.

²Pakamalan ke ing Kabiasnan at migkapilit kung panintunan ke manibat na kanitang kayanakan ku. Pignasan keng anti ing babaing pakasalan ku at pilsintan ku ing lagu na.

³Lalung maging maligaya ing marangal nang pangabait king kapamilatan na ning pamakilaguyo na king Dios, ing Ginu ding sabla, ing malugud.

⁴Balu na la ding malalam nang lihim ning Dios at pipilinan na ing sukat nang daptan.

⁵Nung buring akua ing pibandian keting bie, lalu yang pakikuanan ing Kabiasnan a pakimut king sablang bage.

⁶Nung atin mang pakinabang king beluan, lalung maragul ing pakinabang king Kabiasnan a babie itsura king sablang bage.

⁷Nung pakamalan mu ing kayapan e mu sa kakalinguan king ing sablang kayapan bunga na la ning Kabiasnan antimo ing pamamigil king sarili, ing beluan, ing hustisia, at ing tepangan. Ala nang maygit pang maulaga king bie nung aliwa deti.

⁸Bisa kang mika maragul a sibukan king bie? Balu na ning Kabiasnan ing milabas a panaun at balu nang sabian ing daratang pa. Balu nang dinan kabaldugan ing sasabian da ring tau at nung makananu lang lutasan ding problema na ning bie. Balu na la ding milagru a daptan ning Dios at nung nanu ing mapalyari king yatu.

⁹Inya inari ku king lub ku king maging katubale ke ing Kabiasnan, uling balu ku king dinan na kung mayap a payu at pasiknangan a lub king panaun ning problema at kalungkutan.

¹⁰Ngaku king lub ku, King uli na maging pikabaluan ku king katipunan da ring tau. Galangan da ku ding makatua agyang pang anak ku pa mu.

¹¹Akit da king malalam la ding kaisipan ku at galangan da ku ding atyu king kayupayan.

¹²Potang tahimik ku, panayan da ku ban magsalita, at pota namang magsalita ku, makiramdam la. Agyang pang makaba ing sabian ku makiramdam la mu rin king mitmung kataimtiman.

¹³Mie ku king kapilan pa man uling milakuan kung alang anggang katandanan karetang salisi kanaku.

¹⁴Mamahala ku karing dakal a tau at sakupan ku lang dakal a bansa.

¹⁵Mitakutan la kanaku ding taksil a mamuntukan kabud dimdam de ing lagyu ku. Ipakit ku karing kanakung sasakupan king mayap kung ari at mayap a sundalus.

¹⁶Potang muli na ku keta kekami, makatagpu kung kapaynawan king Kabiasnan uling alang pamisalangsangan o sakit lub neng kayabe ya; pawang tula at kaligayan ing atyu king Kabiasnan.

¹⁷Inya api-isip-isip ku king ing pamakisanmetung king Kabiasnan bie yang alang angga;

¹⁸ganap a tula ing luguran ya, alang kalupang pibandian ing daptan ing parapat na, pamanatul a alang pamangabiran ing pamakiabe king Kabiasnan, at babie karangalan ing makipagsalita kaniti. Inya inari ku king lub ku ing makisanmetung king Kabiasnan anting kakung asawa.

¹⁹Atin na kung mayap a pangatau agyang inyang anak ku pa. Mapalad ku uling atin kung tinggap a mayap a kaladua o metung a masanting a pamikakatawan uli na ning tagle kung kayapan.

²⁰Makanyan man, akilala ku king e ku sa tinggap ing Kabiasnan, nung e ne binie kanaku ning Dios. Balu ku king bukud mung ing Dios ya ing makaibie kanaku king Kabiasnan. Iti metung yang tanda ning beluan. Inya, king mitmung kataimtiman menalangin ku king Ginu at king mabilug kung pusu ngakung mekisabing mayap: