Read Kapampangan Ecclessiasticu 10 Bible Online

Ecclessiasticu 10 - Kapampangan bible

Ecclessiasticu 10

¹Tuturu na la ning biasang manimuna ding sasakupan na at dirinan na lang matatag at maayus a kapamahalan.

²Nung nanu ya ing manimuna, makanyan la ding kayabe na king pamanimuna at ding memalen na.

³Siran ne ning ari a alang pegaralan ing kayarian na, oneng ing manimunang ating kabiasnan gawan neng matatag a kabilian.

⁴Atyu king gamat ning Ginu ing pamamahala king mabilug a yatu; king mitakdang panaun parala yang mayap a taung manungkulan.

⁵Atyu munaman king gamat ning Ginu ing tagumpe ning metung at metung karing tau, at parangalan na la ding gagawang kautusan.

⁶E mu tatanam king lub mu ing balang kamalian ning kalupa mung tau. E ka darapat nanumang katampalasan neng mapali ka buntuk.

⁷Parehu na lang kasusumamian ning Ginu at ning tau ing ketasan at ing keyalan hustisia.

⁸Uli na ning keyalan hustisia, ketasan, at kasakiman mibabagsak lang bansa; miliwas-liwas da lang sasakupan ding miyayaliwang bansa.

⁹E ya sukat magmaragul ing tau uling alikabuk ya mu at abu. Malalaso ta na kabang mabibie ta pa.

¹⁰Ma-iinsultu ya gelingan ing doktor king maluat a sakit a e na apapakayap. Mabie ya ngeni ing ari oneng bukas mete ne.

¹¹Potang ing tau mate ya, ing miras king katawan na ila ding ulad, ding lango, at bulati.

¹²Ing pamangalinguan king Ginu ya ing panibatan ning ketasan lub ning tau, ing pamanialangsang na king Talapaglalang na.

¹³Mengari ya ing ketasan lub king metung a batis nung nu sisibul ing pamikasala; mangatmu yang e mayap ing ninumang magbabad. Inya parala yang parusa ing Ginu karing dakal a tau at lubus na lang paten.

¹⁴Leko na la ning Ginu ding ari karing tronu da, at ding likluk na ila ding mapagpakumbaba.

¹⁵Puputputan na la ning Ginu ding yamut da ring bansa at kaybat ding tatanam na ila ding taung mapagpakumbaba.

¹⁶Lesak na la ning Ginu ding kayarian at selanta ing karelang bansa.

¹⁷Lubus na lang lesak ding mapilan inya ding tau e da na la atatandanan.

¹⁸E na tingka ning Ginu ing maging mapagmatas ya at tampalasan ing taung keyang lelang.

¹⁹Ninu ing melalang a sukat parangalan? Ing tau, uling katakutan ne at gagalangan ing Ginu. Ninu ing e sukat parangalan? Ing taung e mamintu karing Kautusan.

²⁰Parangalan de ring mitutubale ing buntuk ning pamilya ra at parangalan na la ning Ginu detang ating takut at biasang gumalang king keyang Kadiosan.[18]

²²Ding mabanding tau, ding pikabaluan a tau, at ding pakakalulu ing bukud mung karelang pagmayabang ya ing takut da at kagalangan king Ginu.

²³E sukat ipagkaymut ing parangal king taung biasa agyang kalulu ya, oneng e ya sukat dinan parangal ing palpikasala.

²⁴Miparangalan la ding ari, ding pamuntuk ning balen, at ing ukum, oneng metung man alang marangal antimo ing taung ating takut at kagalangan king Ginu.

²⁵Suyuan de ring memalen a malaya ing ipus a biasa at e la tumutul ding taung biasa.

²⁶E mu pagmayabang ing gelingan mu neng magobra ka at e ka magmatas king oras ning kekang pamangailangan.

²⁷Mas mayap ing magobra ka at maglapo-lapo ing kekang kabiayan kesa king magmayabang ka, oneng ala ne mang laman ing kekang atian.

²⁸Anak ko, king mitmung kapakumbaban igalang mu ing kekang sarili; e ka sa balamu nung ninu na ika.

²⁹Galangan mu ing sarili mu ban galangan da ka ring tau.

³⁰Malyari deng galangan ding tau ing pakakalulu uli ning kabiasnan na; gagalangan dia naman ing taung ating pibandian.

³¹Nung miparangalan ya ing metung a tau agyang kalulu ya, lalu reng parangalan nung mika atin yang pibandian. Nung malalapastangan ya kabang mabandi ya, lalu reng lapastanganan, nung makalulu ya.