Read Kapampangan Ecclessiasticu 12 Bible Online

Ecclessiasticu 12 - Kapampangan bible

Ecclessiasticu 12

¹Pakibaluan me pa mu ing taung buri mung saupan ban e mayalang kabaldugan ing daptan mung kayapan.

²Miyablasan ing depat mung mayap king taung makadios; nung e na ka man ablasan ing Kakataskatasan ya ing munie ablas keka.

³Ala kang akit mayap a bunga king taung parating darapat e ustu o king taung e biasang munie limus.[19]

⁴Daptanan meng mayap ing taung makadios, oneng e me sasaupan ing taung makasalanan.

⁵Daptanan meng mayap ing taung mapagpakumbaba, oneng ala kang babie king taung e makadios. E me bitasang dirinan pamangan. Abusuan na mu ing ganaka mu at king katataulian ika ing keyang pabayatnan.

⁶Mimimua ya ing mismung Kakataskatasan karing palpikasala, at siguradu na lang parusan king depat dang kasalanan.

⁷Ding saupan mu ila ding mayap a tau. E mo sasaupan kapilan man ding makasalanan. Isadia mu ing dapat mung mayap karing mapagpakumbaba, e karing barumbadu.

⁸E mo abalu ding tune mung kakaluguran king panaun ning kasaplalan, oneng keka lang akilala ding kekang kalaban king oras ning kagipitan.

⁹At king oras ning kagipitan lakuan da ka pati na ding kekang kakaluguran. Oneng potang matagumpe ka anti lang kakaluguran ding kalaban.

¹⁰E me pagkatiwalan kapilan man ing kalaban, uling mengaring manyirang kalawang ing e mayap nang ugali.

¹¹Mingat ka king anti kaniting tau; banten me agyang pang papakit nang matunud ya. Uling mengari ya king salamin a bakal, nung e me lilinisan kanan ne ning kalawang.

¹²E me paburen siping mu magkang kuanan ne ing lugal mu. E me paluklukan king banda mung wanan, magkang kuanan ne ing kekang luklukan. Kanita mu na aintindian ing katutuan ding amanu ku at sumisi ka kabud aganaka mu ing babala a sinabi ku keka.

¹³Ala metung mang taung malulunus potang maket ya ing taung patunud ubingan o karing malyap a animal.

¹⁴At alang malunus keka nung makikiabe ka karing makasalanan at king dapat da.

¹⁵Malyaring manatili yang saguli siping mu ing kalaban, oneng lakuan na ka king oras ning kagutgutan.

¹⁶Mayumu la ding amanu na, oneng kilub nang pusu buri na ing asilu na ka king bitag na. Kunwari makirame ya king kekang kalungkutan, oneng paten na ka kabud mika oportunidad ya.

¹⁷Nung miras keka ing e mayap a kalma kunwari yang datang sumaup keka, oneng ing nasa na ya ing ipalbug na ka.

¹⁸Kanita na na ipakit ing tune nang kule; pipiling-piling neng buntuk na at mamalatak.[20]