Read Kapampangan Ecclessiasticu 21 Bible Online

Ecclessiasticu 21 - Kapampangan bible

Ecclessiasticu 21

¹Anak ko, mekarapat kang kasalanan? E mu na pasibayuan at maniawad kang kapatawaran karing agawa mung kasalanan.

²Nung makananu meng pangilagan ing ubingan makanyan mung pangilagan ing kasalanan. Nung lapitan me, tuktukan na ka. Anti la ding ipan na karing ipan ning leon at mate ka.

³Anti ya king espadang mingatba taram ing pamaglabag karing kautusan; e maulu ing sinugat na.

⁴Mawala ing sablang pibandian ning ninuman, nung palalu ya at mayabang; mawala ing tinipun na.

⁵Pakiramdaman na ning Ginu ing panalangin da ring kalulu, at agad na lang pakibatan.

⁶Ing taung e bisang sasabianan king e ustung depat na lalakad ya king dalan da ring makasalanan, oneng itang tatakut at gagalang king Ginu sisisi ya king mabilug nang pusu.

⁷Pikabaluan ya ing taung biasang magsalita, oneng potang magkamali ya akit dang agad ding biasa.

⁸Ing taung mandam salapi ban italakad ne ing bale na, anti yang manipun batu para king pikutkutan na.

⁹Ing katipunan ding taung lalabag karing kautusan anti ya king kabuntun a pikataman; e lumuat mitaung agad.

¹⁰Ing dalan a tutuntunan da ring palpikasala malualas ya at patag, oneng papunta ya king tuknangan da ring mete.

¹¹Ing ninumang bisang tupad karing Kautusan sukat nang pakibaluan ing pakiduang ning Kautusan. Mika kabiasnan ka, nung katakutan me at gagalangan ing Ginu.

¹²Masakit yang ituru ing taung alang balu; neng misan ing kabiasnan mamungang mapait.

¹³Anti ya king ilug a e kakati ing beluan ning taung ating kabiasnan, anting danum a sisibul ing payu[38] na.

¹⁴Ing isip ning mangmang anti ya king lulanan a ating busbus, mawawala ing kabiasnan a idatuk mu.

¹⁵Potang makaramdam yang mayap a aral ing taung biasa purian na, at mayayagkat ya ban lunto ing aliwa pang kaisipan. Potang ing mangmang ya ing makaramdam pikakasaman na at agad nang kalinguan.

¹⁶Nung makiramdam ka king salita na ning taung mangmang, mangari ka king taung maglakad a ating pupusanan a mabayat. Oneng makayama ing makiramdam king sasabian na ning taung biasa.

¹⁷Matula lang makiramdam ding taung atyu king kapulungan king sabian ning taung biasa, at karelang pibulebulayan ing buri nang sabian.

¹⁸Mengari ing beluan ning taung mangmang king bale a melasak. E na aintindian itang balu na.

¹⁹King mangmang ing pamagaral metung yang tanikala, anti yang posas karing gamat na.

²⁰King taung biasa naman ing pamagaral metung yang gintung alahas, anti yang pulseras a makasulud king gamat na.

²¹Mayli yang masikan ing mangmang; mayli ya mu ing biasa nung aduan ning panaun.

²²Mamalagua yang lungub king bale ing mangmang, oneng ing taung ating sibukan at ating modu manenaya yang paluban.

²³Sisilip ya ing mangmang king pasbul ning e na bale kabang ing ating pegaralan manenaya ya king lual.

²⁴Keyalan modu ing makiramdam keng pasbul, oneng ing ating modu marine nang daptan iti.

²⁵Ulitan na ning madaldal karing aliwa itang dimdam na, oneng titimbangan na pa ning biasa itang sabian na.

²⁶Sasabian na ning mangmang ing nanumang aisipan na, oneng misip ya pa ing biasa bayu ya magsalita.

²⁷Potang isumpa ne ning taung e mayap ing kalaban na ing mismung sarili na ya ing sinumpa na.

²⁸Ing sisiran ning maindredus ya ing sarili nang pangatau, at pikakasaman de ring kasiping nang bale.