Read Kapampangan Ecclessiasticu 22 Bible Online

Ecclessiasticu 22 - Kapampangan bible

Ecclessiasticu 22

¹Anti ya king dalan a e patag ing taung matamad; pangilagan de ring sabla.

²Wa, ing matamad anti ya king katumpuk a dinat a mabuluk a iyugse rang agad ding mekadamput.

³Maragul a kamarinayan king metung a pengari ing mikayanak yang berat lalung-lalu na nung babai ya.

⁴Ing anak a babaing biasa makapakiasawa ya,[39] oneng ing alang marine kalungkutan ya kang tata na.

⁵Ing anak a babaing masias a buntuk sukal yang lub king asawa na at kang tata na at parehu deng e buring tanggapan.

⁶Anti yang masayang tigtigan king panaun ning kalungkutan ing pamangamanung e makatud king oras, oneng ing pamamarug bilang disiplina makapanaun ya balang oras.

⁷Anti meng papakat ing kuran a mebalbal neng tuturuanan me ing mangmang o kaya anti kang gigising king taung matudtud maniaman.

⁸Anti kang tuturu king mitutundu neng tuturuanan me ing mangmang, at potang meyari ka ikutang na: Nanu na ing sinabi mo?[40]

¹¹Pagkalungkutan ta la reng mete uling limbug ne karela ing aslag ning aldo. Sukat ta lang pagkalungkutan ding mangmang uling ala lang mayap a kaisipan. E tamu masiadung pakadibdiban ing pamanangis kareng mete uling makapaynawa na la, ing pakadibdiban tamung panangisan ila ding mangmang uling ing kabilian da mas grabi kesa king kamatayan.

¹²Pitung aldo ta la mung pagpaldasan ding mete, oneng alang angga ing king mangmang o king alang dios a katawan.

¹³E ka makipagsalitang maluat king mangmang o daralo man king bale ning alang isip. Pangilagan me. Kanita e ka miyawa at mie kang payapa at alang pangabala king kamangmangan na.

¹⁴Mabayat ya ing bakal, oneng maygit yang mabayat ing mangmang. Mangmang ing angkop a lagyu na.

¹⁵Mas mayan yang dalan ing balas o ing asin o ing bakal kesa king makiutus ka king taung mangmang.

¹⁶E ne augun agyang ning ayun ing tanan a dutung a makapakung matatag king bale. Antimu rin e ne augun ning nanumang kagutgutan ing isip a masigasig magaral.

¹⁷Ing kaisipan a bunga na ning masusing pamagaral anti yang pader a matibe a ating palamuti.

¹⁸Manakbag la ding malating batung atyu babo ning pader potang mitiupan lang angin. Makanyan munaman ing mapalyari king isipan ning mangmang potang datang ing makasalikut a kagutgutan.

¹⁹Tulsikan me ing mata at tumulu ing lua. Sugatan me kapanamdaman ing tau, at akit mu ing atyu king lub na.

²⁰Sulapo la ding ayup nung basibasan mu la, at nung samantalanan me ing kakaluguran lakuan na kang lubusan.

²¹Nung sakaling mekapagsalita kang mataram king kekang kakaluguran, e ka milalako kapanayan uling ating panulu kanyan.

²²Nung mipate ko man malyari kayung mikasundung pasibayu. Nung keka yang insultuan at pagmaragulan ampon pataksil a siksak king gulut at bilalag ing keyang lihim, siguradu na kang lakuan.

²³Makipagkaluguran ka king pakakalulung kasiping mung bale, at potang mibandi ya akayabe me king tula na. Saupan me king oras ning pamangailangan na, at potang datang ing mayap nang suerti e na ka kalinguan.

²⁴Masuk pa bayu milablab ing api, inya kaybat ning insultu ing pamanampalasan.

²⁵E ku mikakunung idipensa ke ing kakaluguran at e lakuan king oras ning pamangailangan na.

²⁶Nung mipahamak ya ing bie ku king uli na, ding makabalu kaniti pangilagan da ne.

²⁷Sana ating magbante king asbuk ku at maniara karing labi ku. Kanita e ku makarapat kamalian at milaut ku king kasiran a pasari ning dila ku.