Read Kapampangan Ecclessiasticu 26 Bible Online

Ecclessiasticu 26 - Kapampangan bible

Ecclessiasticu 26

¹Maligaya ya ing lalaking ing ayasawa na mayap ya; kumaba ya bie king uli na.

²Tula ne ning lalaki ing asawang tapat, inya payapa yang mibiebie kabang mangisnawa ya.

³Metung ya ing mayap a asawang babai karing regalung binie na ning Ginu karetang tatakut at gagalang arap na.

⁴Mabandi la man o kalulu masaya la at matiman.

⁵Ating atlung bage a katakutan ku, at ing kapat tutu keng katakutan. Ila deti: ing indredus a kakalat king mabilug a balen, ing katipunan da ring taung mag-rebeldi, at ing sangkanan da ka king kasalanan a e mu depatan. Mas mabagsik la deti kesa king kamatayan.

⁶Oneng ing babaing mangalalu king katunggali na pasari yang sakit lub at kalungkutan; maniugat ya ing dila na king kenu man.

⁷Mengari ya ing e mayap a asawa king paud a e lapat. Anti kang tatalan alakdan king pamakiutus king asawang makanyan.

⁸Ing asawang babaing lasinggera makasora yang lalawan; e na malyaring takpan ing keyalan nang kamarinayan.

⁹Agad meng aulata ing e tapat a asawa king magaslo nang kimut at ing mata nang kindat-kindat.

¹⁰Banten meng masalese ing anak mung babaing masias a buntuk, uling samantalanan na ka potang makabalikid ka.

¹¹Mingat ka king lawe nang pasulyap, pota pamakarine na ka.

¹²Mengari ya king taung maglakbe a mau; nanumang danum a akit na inuman na. Magkera ya nu man karin ban makisiping king ninumang lalaking maki buri king katawan na.

¹³Tula ne ning lalaki ing mayap nang asawa, at ing kayalistuan na pasiknangan ne ing katawan na.[47]

¹⁴Ing e masalitang asawang babai regalu ne ning Ginu, maygit ya king salapi ing malagung nang ugali.

¹⁵E kukupas ing leguan ning asawang babai a mahinhin; e no abut sabian ning amanu ing malinis nang puri.

¹⁶Ya ing aslag ning pibalebale; anti ya king aldo saslag king maleparan nang banua ning Ginu.

¹⁷Anti ya king aslag a manibat king sagradung sulu ning Templo ing malagu nang lupa at ing balangkinitan nang katawan.

¹⁸Anti la king gintung pun ning pilak a talpakan ding malagung butit na ampon matatag a bitis.[48] [49]

²⁰Saliksikan me ing mabilug a bansa ban manakit kang gabun a mataba at tamnan me karing sarili mung bini at magtiwala king mayap mung lahi.

²¹Kanita dakal la ding kekang anak at ipagmaragul de ing pamilyang mayap a karelang ibatan.

²²Anti yang lura ing babaing magtinda king katawan na; ing babaing talasawa a makipaglalaki pasari yang kamatayan karela.

²³Ing lalaking e tutupad king batas makapakiasawa yang babaing e mayap, oneng ing lalaking gagalang king Ginu makapakiasawa ya king babaing tapat.

²⁴Ing talasawang babai a alang marine tula na ing siran na ing mismung sarili na, oneng ing mayap a talasawang babai mahinhin ing ugali na agyang ilang adua ning asawa na.

²⁵Marawak ya kareng tau ing babaing masias a buntuk, oneng ing babaing ating marine parangalan ne ing Ginu.

²⁶Makilala yang biasa ing babaing gagalang king keyang asawa, nung siran ne dangalan ing asawa na, makilala ya karing sabla bilang taung marok at alang Dios a katawan. Mapalad ya ing lalaking mekatagpung mayap a asawa uling kumaba ing bie na.

²⁷Ing babaing maindredus at masalita mengari ya king trumpetang babie senias king pamaglusub, at ing ninumang lalaking ating asawang makanyan anti yang makigera kabang mabie ya.

²⁸Ating aduang bage a babie kalungkutan kaku, at ing katlu pamuan na ku. Ila deti: ing sundalus a mekalulu, ing biasang tau a e ra gagalangan, at ing taung banal a meging makasalanan. Parusan neng kamatayan ning Ginu ing taung anti kaniti.

²⁹Masakit nang pangilagan ning mangalakal ing pamaniapat pamikasala; e ya malyaring e mikasala ing ninumang magtinda.